الموضوع: استفسار بخصوص الاسبرانزا المستعمل

استفسار بعد اذن اجمل شباب فى الدنيا
لغاية دلوقتى والحمد لله لسه فى الحيرة المفزعة اللى عايش فيها بخصوص شراء العربية

المهم واحد صاحبى جاره شغال فى مصنع ابوالفتوح - كلمته وسألته على ال m11 وال 516
طبعا كانت ردوده تقريبا نفس الكلام اللى احنا عارفينه ما عدا انه كل شوية كان بيحاول يقنعنى بال تيجو 1600

....رجاء التركيز من أول هنا....
واحنا بنتكلم قلت له ان فيه واحد معاه عربية 516 عامله 11000 كيلو فقط وعايز يبعها - كان رده مباشرة خدها منه على طوووووووول - قلت له ماشى هاجيبهالك وتشوفها - قال لى ماشى لكن المهم السعر - قلت له الراجل بيتكلم فى 55.000 - عارفين انا لو شتمت الراجل مكنش هايبقى هو ده رد فعله - الراجل بيكلمنى ان العربية بالكتييييييير تجيب من 47-49 الف

بقوله اشمعنى يعنى قال لى ان الاسبرنزا كل ما بيعدى على العربية سنة سعرها بينزل (العربية موديل 2008) - وان كسر الزيرو 2010 بتعمل 55000 - 2009 بتعمل 50000 - واللى تحت كدة بيبقى من 42000 الى 47000 بالكتييييييييييييير مهما كانت الحالة

قلت له ده الناس اللى قبلتها اغلبها بتتكلم فى اسعار غير ديه - قال لى انزل سوق العربيات واتفرج الناس بتنزل فى عربيتها قد ايه علشان تبيعها خصوصا ال 620 - الراجل بيحلف لى بالله ان الفصال فى الاسبرانزا بال 5000 مش بالالف والاثنين زى ما احنا متعودين

المهم سألته على كسر الزيرو فى ال m11 - قال ان الدنيا لسه ما وضحتش قوى فى الm11 لكن على الاقل كسر الزيرو بتاعها برضو هاتبقى خسرتها كبيرة نسبيا والكسر بتاعها مش هايزيد عن 60.000 بأى شكل من الاشكال

بالمناسبة الراجل نسبيا بيشكر فى ال m11 وان كان بيعيب عليها ان قطع غيارها نسبيا اغلى من ال 516 ,وغير منتشرة بره التوكيل زى ال 516
لكن الراجل بيتوقع ان العربية ديه فى الفترة اللى جاية هاتبقى اكتر عربية منتشرة فى مصر بسبب مميزات كثيرة موجوده فيها (والنبى بلاش هجوم عليه - الراجل هو اللى بيقول مش أنا)

طبعا هو بيقول ان العرض اللى ابوالفتوح عمله على ال 516 و ال m11 سبب رئيسى لأنهيار ثمن كسر الزيرو والمستعمل - حتى لو فعليا العرض اتوقف بنهاية الشهر

نيجى بقى لرأيكم - ال516 كسر الزيرو 2010 ممكن فعلا توصل ل 55.000 وأقل ولا لأ
فعلا ال m11 كسر الزيرو فعلا ممكن تنزل عن ال 60.000 ولا لأ

المشاركة الأصلية كتبت بواسطة esam722

لو عايز عربية تقعد معاك بشرط انك تحافظ عليها مش تدور وتمشى يبقى خد ال516 ونصيحة حط التيجو ال1600 فى دماغك عربية ركوبة فعلا وسعرها مش بعيد للدرجة وعلى العموم ربنا يوفقك ولما تسمع من حد اسمع من حد مجرب مش سامع وبيردد زى البغبغان

ممكن حضرتك توضحى لى شوية يعنى ايه مش تدور وتمشى - ويعنى ايه احافظ عليها
بخصوص السمع والله حضرتك انا فعلا زهقت لدرجة انى بطلت اسمع غير من اصحاب العربيات نفسها
الراجل اللى اتكلمت معاه كل الناس بتشتم فى الاسبرانزا من غير ما تكون حتى ركبتها - الراجل بمنتهى الحيادية كان بيرد عليه فى كل نقطة كنت بكلمه فيه - أقوله العفشة ناشفة يقولى فعلا بس ده مايعبش العربية - اقوله على مشكلة الدينامو اللى ظهرت فى الm11 يقولى حالات نادرة ومش كتير زى ما الناس بتقول - أكلمه على عيوب التقفيل يقول لى فعلا التقفيل عندنا مش حلو

بالمناسبة الراجل ده قالى كلمه غريبة - كل واحد شارى اسبرانزا بيقارنها بالمرسيدس وال bmw علشان كده ظهرت كلمة .... انتى شارى عربية صينى.... علشان يخلصوا من زن النااااااس

المشاركة الأصلية كتبت بواسطة aftr

هجوم ايه بس متخفش احنا معاك ملاك m11 العربيه كده كده جامده حتى لو فيها عيوب احسن من عربيات تانيه

والله حضرتك انا كل ما تيجى سيرة ال m11 احس ان الناس متحفزة جدا للهجوم - على فكره انا قلبا وقالبا مع الناس اللى تشترى عربية ويطلع فيها مصيبة - ده برضو بيبقى شقى عمر وده واضح لأننا تقريبا كلنا من نفس الطبقة اللى بتلم ثمن العربية بالعافية - يارب كل الناس تبقى عربياتها زى الفل ويريح الناس كلها