الموضوع: اللي متضايق منها يتفضل يمشي بسلام

علي فكرة مش المصريين بس اللي بيشتكوا كل الناس سواء في دول العالم المتقدمه او العالم الثالث كله بيشتكي لان كل دوله في الاحسن منها يعني الخليج مثلا مش جنه و لا حاجة ممكن يكون احسن من مصر في العيشة بس كفايه الجو و كفايه انك بتبقي عايش في درجه اقل من صاحب البلد لسة زميلي راجع من السعوديه هاجج من هناك و قرفان اخر قرف
و كمان الناس الاوروبيين اللي عايشيين في اوروبا مش مبسوطين من احوال بلدهم و بيشتكوا اعرف ناس هولنديين بيشتكوا ان في الشتا بعض الايام حركه القطارات بتقف نتيجه لنزول الجليد و انهم دوله متخلفه مش زي سويسرا اللي بتمرر تيار كهربي في القضبان علشان تسيح الجليد و حركه القطارات متتأثرشي

و اوربا كلها بتشتكي من ساعه تغيير العمله لليورو ان المرتبات مبقتشي موازيه للعيشة و ان الاسعار ديما في ازدياد يعني نفس الشكوي بتاعتنا مع الفارق طبعا

من حق اي حد انه ينتقد اي شيء شافه غلط في البلد و الغلطات كتير بصراحه و بتدفع اي حد انه يخرج من هدومه مش ينتقد و بس و كل اللي خرج من مصر اكيد خرج علشان الحاجات اللي الناس جواها بينتقدوها
انا مقدر ان اللي عايش برة البلد عنده حنين جامد ليها و دي ميزة البلد دي تعمل مهما تعمل و الواحد برضة قلبه متعلق بيها بس برضة لازم اللي شايف الصورة من برة يقدر شعور الناس اللي جوة الصورة و ايدهم في النار فعلا

الاخوة المسافرين برة لما بيجي مصر في اجازة الصيف بيقعد حوالي شهر بيبقي عارف انه أجلا ام عاجلا ماشي تاني يعني بيبقي الشهر دة اجازة بالنسبة ليه بيخرج يتفسح لكن مش بيعاني زي الناس و هو رايح شغله الصبح و هو راجع اخر النهار و الزحمه و اللي الناس بتعمله في الطريق انا لما باخد اجازة اسبوع من الشغل بحس ان البلد مقبوله و ممكن اعيش فيها بقوم من النوم براحتي و بنزل في المواعيد اللي الطرق بتبقي فاضيه فيها يعني وقتي ملكي مش ملك شغلي فالشهر اللي بيقعده اي حد مسافر بعيد عن مصر مختلف تمام عن الناس اللي عايشة فيها ليل نهار

متزعلشي مني بس دة رأيي

المشاركة الأصلية كتبت بواسطة human12

ماتزعلشى منى بس هو الموضوع مستفز جدا و اللى حضرتك كاتبه مستفز اكتر
لما تنفع ترجع بلدك و تعيش فيها وتاكل و تشرب منها ابقى اتغزل فيها براحتك
لما تحس انك مواطن شريك فى البلد و صوتك مسموع ابقى هاجم اللى مش عاجبهم الوضع
لما تعمل حاجه عشان تفيد البلد ابقى انقد اللى هيطقوا منها

بس مش قاعد انت فى بلد تانيه و بتحوش قرشين و سايبها تخرب ما تعمر و متضايق عشان فيه ناس شايفه البلد انتهت
لو ماكنتش انتهت ماكنتش هتبقى عند اللى انت عندهم و مديرك اصغر منك فى الخبره و تقوله حاضر و يبقى ليك كفيل هو المسئول عنك عشان هما شايفينك مواطن ماتنفعش تبقى مسئول عن نفسك او بلدك ماتقدرش تبقى مسئوله عنك

حوش القرشين و ارجع و اقعد احكى على النضافه و الاكل و مش عارف ايه عشر سنين قدام زى كله ما بيعمل

(كلامى مش موجه لحضرتك بالذات-كلامى موجه عام لشريحه كبيره ينطبق عليها اللى انا كاتبه)

استاذ human 12 ممكن طلب من حضرتك
حاول تقرأ اللي انت كاتبه المفروض انه رد عليا او علي وجهه نظري بس حط نفسك مكاني وشوف هاتضايق ولا لاء من كل الكلام اللي مكتوب والمفروض انه لشخص ماتعرفهوش انا مش عارف ارد اقول لحضرتك ايه بس ممكن حد تاني كان يرد عليك رد مش كويس بس دي مش طبيعتي
تاني حاجه انا بشتغل في فرع شركتي المصريه في قطر وقبله كنت بتنقل من محافظه لمحافظه تاني داخل مصر يعني انا مش تحت كفيل والكلام ده وبعدين كون اني اسافر احوش فلوس اصرفها دي حاجه تخصني ماتخصش حد تاني وانا اعرف اتصرف وافكر لنفسي كويس شكرا لحضرتك ووفر النصايح لحد يكون محتاجها وانا مش هارد في الموضوع ده تاني واوعدك لما الاقي حد بيشتم علي مصر والمصريين وبيقول انهم متخلفين هابقي اشتم عليها علشان مابقاش عايش في وادي والناس عايشه في وادي تاني وشكرا

هو اللي كاتب الموضوع ميعرفش ان اللي باخد فيزا سياحة بنقولة مبروك ؟

دة واضح انة سايب مصر ايام ما كانت مصر 5 مليون

يا عمي هو حد عارف يطلع اصلا، انا شخصيا بمجرد ما يبقي عندي فرصة كويسة برة حخلع اسرع ما تتخيل، و يا سلام لو في فرصة جنسية تانية كمان

و الله انا شايف ان البلد دى محتاجة تتفرمت (دولة وشعب و نظام و حكومة وكل حاجة) وتتسطب من الاول وجديد لان العيب مش فى حاجة واحد العيب بقى فى كل حاجة وربنا ينتعنا بالسلامة من اللى بقينا فية دة

المشاركة الأصلية كتبت بواسطة Ahmed Samy

لازم علشان تنال لقب وطني انك تكون "شهيد الوطن"

بالظبط هي دية