الموضوع: ثبات عدم جدوي القطع الجديده

المشاركة الأصلية كتبت بواسطة ahmed samy

ما فيش حاجة اسمها عيب سواقة في شكوى جماعية

و لو التوكيل ده محترم (وهو مش محترم) كان اعلن أنه منزل عربية بتقنية جديدة

و يعمل تيست درايف قبل الشرا ...انما هو تعمد ان العربيات تنزل مرة و احدة في السوق و الحجز مفتوح و العربيات مش موجودة في الشو روومز أساسا ...و الموزعين كانو عارضين خليجي أوتو حضرتك


و بعدين التوكيل الكداب فضل يقول ان الفتيس مش هايتغير و ما فيش نية لتغييره

و ان الـ mmt ها يفضل ينزل و أهوه خلص اللي عنده و باعه برخيص و خسر الناس فلوسها بمنتهى عدم المسؤولية .....

و ثبت تقنيا ان السيستم فيه مشكلة و شرحها اتكتب هنا أكتر من مرة

و الشكوى موجودة في اوروبا برضه على فكرة وفي المستحمل و فيه لأ

و هنا برضه في اللي مستحمل و فيه اللي مش مستحمل و فيه الل باع العربية بخسارة وصلت لحدود 60ألف لعربية تمنها 160 الف

أولا , العيب انتشر بسبب الكلام , يعني اللي راكب العربية بقى يتلكك حتى لو محصلش حاجة واللي مش راكب أهو بيزيط و خلاص
ثانيا, التوكيل وضح الفتيس و أنا معايا بروشور مشروح فيه و في مقارنة مع المانيوال والاوتوماتيك إستلمته في معرض اوتومك 2008
زائد إن أنا مخرجتش من العربية من التوكيل (العباسية ) غير لما خرج معايا مندوب المبيعات و وراني إزّي أسوء (على الرغم إني مكنتش عايز و كنت قاري كتيييير قوي عن الفتيس بس هو صمم)
ثالثا, ال mm-t مازال موجود في اوروبا . يعني ماتلغاش ولا حاجة زي مالبعض بيدعي بس هم ريحوا الناس
رابعا, السيستم مفيهوش حاجة و قصص اوروبا دي كلها في الموديلات 2004 2005 كده إنما مفيش حاجة في الجديد (عشان في ناس هنا بيلعبوا عالنقطة دي و فرحانين قوي بس مش بيقروا التواريخ )
خامسا, اللي باع العربية بـخسارة هو الخسران عشان هو صدق كلام ناس مش راكبين العربية و بيهاجموها عشان محدش يلتفت للبلاوي اللي في عربيات بعضهم.

المشاركة الأصلية كتبت بواسطة mohamed gamal

مش معنى أن العربية معانا اننا ندافع عنها بالأسلوب ده حتى لو محصلش أي مشاكل معاك.
العربية معايا والحمد لله مفيش مشاكل بخصوص الفتيس لغايت دلوقتي ومبسوط منه بس المشاكل حصلت مع ناس كتير وأكيد حقهم يتدايقوا خصوصا أن في عربيات تانية أقل بكتير في المستوى وبتمشي كتير جدا بدون أي مشاكل تماما.
حتى توقيع حضرتك mmt can be only enjoyed by an engineer ده هو أكبر عيب ممكن تكون تويوتا عملته لأنها عربية المفروض أي حد ركب عربيات قبل كده أنه يسوقها بدون مشاكل. (العربية بتحتاج رخصة سواقة مش بكالوريوس هندسة)

أنا كلامي كان تقيل شوية بس ده مش عشان أنا قصدي أضايق حد بس صدقني تعبت من الحاجات اللي بشوفها هنا.
الأسبوع اللي فات كنت بأتكلم مع أحد مهندسي الصيانة في تويوتا التجمع وكنا بنضحك على واحد كاتب هنا إن الفتيس بتاعه بيسخن و لما سألوه عرفت منين رد و قال أصل المقبض كان سخن. صدقني أنا لقيت إن خسارة فيه الوقت اللي هاضيعه في الرد عليه.
نقطة تانية إن أكتر ناس بتقول كلام هم اللي معندهمش العربية من أصله أو كان نفسهم فيها ولسبب ما منفعش يجيبوها فـشمتانين في الباقين
و العربية مش عايزة بكالوريوس هندسة ولا حاجة, هي عايزة واحد ساق منيوال قبل كده مش اوتوماتيك بس و حتى مش شرط بس عايزة واحد يفتح دماغه معاها
و برده أنا مش بأتكلم عن نفسي و بس, أنا متابع بـشكل شخصي 6 عربيات غير عربيتي: 4 اصحابي و 2 اتعرفت عليهم من منتدى تاني و قابلتهم و الحمدلله مشيوا مبسوطين بالعربية ( علما إن واحد منهم طبيب بشري عنده 56 سنة و العربية ما شاء الله عاملة معاه 27 ألف و زي الفل)
ال 4 اصحابي واحد عامل 48 والتاني 24 والتالت 22 و الرابع 12 و مفيش حد فيهم حصلتله ادنى مشكلة منها ولا غير طقم دبرياج ولا حاجة و 3 منهم بيطلعوا عين اللي جابوها بس عارفين إزّي يتعاملوا مع الفتيس و يستمتعوا به.
بالاضافة ل 3 عربيات تانين 2 منهم تبع أهل واحدة زميلتي ( الأب راكب 2008 والأم 2009 و هي معاها ال 2007 ) والتالتة تبع ابو واحد صاحبي قوي و هو شخصيا معاه ال 2005 و برده مفيش حد من دول اشتكى علما إن الأهل ناس كبيرة نسبيا في السن و مش كله مهندسين بس مبسوطين


أنا عايز بس أوضح نقطة مهمة جدا, أنا قبل ما أركب العربية دي (شهر 7 2008 ) كنت من أكتر الناس اللي بيكرهوا تويوتا (بحترمها آه بس بتخنق منها ) و كنت هموت على ال 308 ( أنا بيجو حتى النخاع يعني و عندنا 504 و 405 و 605 والتلاتة جدي جايبهم من فرنسا جداد مش استعمال الخارج يعني كل واحدة في سنتها و شحنهم على هنا و لا مجال للمقارنة بين أي واحدة فيهم و مثيلتها اللي كانت بتيجي مصر ) و لولا إن سعر البيجو كان كاسر الميزانية مكنتش هفكر لحظة في أي عربية تانية .
و لما لقيت إن ال 308 هتبقى مستحيلة قلت خلاص يبقى السيفيك و كانت عاجبني جدا لغاية ما قريت بالصدفة عن ال mm-t في البروشور اللي اخدته في اوتومك 2008 ( و ده كان أول لقاء ليَّ مع الكورولا علما إني كنت رايح أصلا أعرف إيه نظام حجز السيفيك و إذا كانوا عاملين أي تخفيضات بـمناسبة المعرض) و بدأت اقرا عنه و عجبتني جدا فكرته بس السيفيك كانت شداني أكتر عشان شبابي و العدادات حكاية . بدأت أعمل مقارنة تفصيلية رهيبة بين الكورولا والسيفيك على شكل نقط كده و كسبت الكورولا و رحت حجزتها في شهر 7 2008