الموضوع: يجب فحص السيارة جيدا حتى لو كانت زيرو

السلام عليكم ورحمة الله وبركاتة
بحكم سفرى المتكرر من المنصورة الى القاهرة والعكس بلاقى وخصوصا بعد الساعة 12 او 1 بعد نص الليل عربيات زيرو لسة معلقتش نمر خارجة من القاهرة ورايحة المحافظات
كل معرض باعت واحد او اتنين او تلاتة يستلموا العربيات من القاهرة ويوصلوها لغاية المعرض
وبيبقوا طايرين بيها ( طايرين فعلا) مش اقل من 160 او 180 - طبعا ماهو الطريق ليل وفاضى
اولا العربيات دى المفروض تليين لانها زيرو وطبعا مش مشكلة ماهى مش باينة
ثانيا مش هتعرف انها جت ماشية مش منقولة على عربية لانهم بيبقوا شايلين سلك العداد عشان ميسجلش كيلو متر
ثالثا والاهم - (( الحوادث ))
كتير بلا قى بعد ما يعدونى بشوية الاقى ناس ملمومة على حادثة ابص الاقى عربية من اللى كانوا طايرين دول ( الزيرو )
طبعا انا بشوف ناس هنا فى المنصورة تخصص تصليح عربيات زيرو عاملة حادثة وبيرجعوها زى الاول ولا باين عليها - اكياس الكراسى بتبقى لسة عليها مش بس كدة الاستيكر الابيض كمان مش بيتشال من عليها ولو اتشال بيلزقوا غيرة ومعظم العربيات دى او تقريبا كلها من محافظات تانية
انا شفت مرة وانا ماشى عربية الانترا زيرو مركبة ربع خلفى العربية لونها فضى والربع لونة سماوى العربية سليمة لدرجة انى شكيت انى شايف اللون غلط - تعمدت انى اراقبها لغاية لما تخلص عشان اشوف شكلها بعد الرش - لقيت قدامى عربية كانها زيرو واقفة قعدت اسال هى دى قالولى ايوة - مش ممكن تطلع فيها اى عيب وكانت ملاكى القاهرة - لدرجة انى فقدت الثقة فى شراء اى عربية

الموضوع دة منتشر جدا وكتير
ياريت اللى يشترى عربية زيرو يكشف عليها كويس جدا جدا جدا

وحاجة كمان
سمعة العربيات ملاكى الدقهلية وحشة جدا فى السوق
وتكلم واحد يقوللك اوعى تقرب من اى عربية ملاكى دقهلية
انا كنت عاوز اصحح المعلومة دى
بتوع المنصورة ناس( ركيبة ) يعنى بيحبوا يركبوا العربية السليمة جدا
عشان كدة بينقل الملكية لنفسة
لكن انا عاوز اوصللكم ان معظم العربيات اللى بتتوضب هنا فى المنصورة من محافظات تانية وبيجيبوها هنا عشان عندنا احسن ناس صنايعية وبترجع تانى بلدها
يعنى مش شرط ملاكى الدقهلية تكون مش سليمة - بالعكس جدا
انت لو اشتريت عربية ملاكى دقهلية من صاحبها ( مش من تاجر )تاكد انها هتكون سليمة - الا نادرا جدا لكن الغالبية محافظين ونضاف جدا مع عربياتهم

انا اسف للاطالة بس حبيت اوضح والكلام جاب بعضة