إمبارح كان ميعاد صيانة ال 15000 وحسب إتفاق سابق مع المهندس/أمجد "العبور" حجزت أول ميعاد الساعه 8:30 علشان أضبط عضة المارش بجانب الصيانه العاديه وبالمره قلت لهم على الزجاج الأيسر "كنت بسمع فيه طقطقه" لما أفتحه نصف فتحه و كمان يبصوا على الزوايا من باب الإحتياط.... المهم العربيه دخلت الساعه 9 وأنا كان ورايا كام مشوار في مصر الجديده فأخدت الباص بتاع التوكيل ورحت أخلص إللي ورايا وعلى الساعه 12:30 كلموني و قالوا العربيه جهزت وكل حاجه إتعملت.

رجعت مع نفس الباص الساعه 3 علشان أستلم العربيه وفعلا لقيت كل حاجه تمام و زي ما أنا كنت عايز وفعلا العضه ذهبت إلي غير رجعه و كمان الفتيس بقي سلس جدا جدا جدا وتحس إنه عايز ينقل لوحده و كمان الزجاج عملوه والموضوع طلع سهل زي ما بيشوي قالي.

وأخيرا ...فعلا العربيه إختلفت تماما ولذلك شكرا توكيل رينو على إهتمامه بعملائه وراحتهم ......وآسف للإطاله...وتقبلوا تحياتي.