قبل أى حاجة مبارك على البيبى الجديد ويجى بالسلامة ان شاء الله
بخصوص التصويت انا لم اشترك فيه وهاتعرف السبب دلوقتى
نبدأ بالطفل الاول
أول لما عرفت ان زوجتى حامل فضلت احمد ربنا وكنت فى غاية السعادة ومستنى يوم تشريف الباشا بفارغ الصبر - ده غير الاهتمام الغير عادى بصحة والدته - كل شوية تحاليل وسونار والكلام اللى كلكم عارفينه
وصل مروان باشا بالسلامة لأرض الوطن وفعلا بدأت قصة حب عنيفة بينى وبينه - أى مكان بيبقى معايه - بدأت أخلية ياكل بدرى لمجرد انى أأكله بأيدى - مروان تحول فعليا الى حياتى كله
فجأه وبدون مقدمات ظهر فى الافق خبر ان المدام حامل (فرق بين مروان واخوه سنه بالظبط) نسبيا كانت صدمه خصوصا انى كنت لسه ما فوقتش من ولادة ومصاريف مروان
المهم بدأت (خلى بالكم من كلمة بدأت) العناية بصحة زوجتى بنفس الطريقة ايام حملها فى مروان - روحت لنفس الدكتور وعملت متابعة - روحنا مره وهيه فى الشهر الثالث - ومره وهيه فى الثامن - و3 مرات قبل الولادة
دكتور السكر - لأن زوجتى كان عندها سكر حمل المفروض اننا نروح له مرتين فى الاسبوع - روحنا له فى بداية الحمل 3 أو 4 مرات - وقبل الولادة بشهر روحنا له - والله انا فاكر رد فعل الدكتور انه فعلا اتخض لأنه كان فاكر ان مراتى سقطت ومفيش بيبى - ولما قلنا له اننا لسه مستمرين على جرعات الانسولين كان هايغمى علية لأنه قال انى زوجتى محتاجة على الاقل اربع اضعاف الجرعة وأكيد البيبى هايكون حصل له حاجة لكن الحمد لله اتأكدنا ان كل حاجة كويسة
الطفل الثانى
شرف الشاب الوسيم عبدالرحمن (اسمه الحقيقى حسام) الى ارض الوطن برضو - لكن فى وجود مروان قلب الاسد - المهم أول حاجة انى كنت زهقااااااااااان مووووت من عياطه ومن مصاريفة ومن الدكاتره اللى بيروح لهم - وفى نفس الوقت حبى لمروان بيزيد بطريقة مفزعه
كنت كل شوية اتلكك علشان نخرج انا ومروان لدرجة ان مروان اقتنع ان العربية بتاعتى انا وهو بس - ومش مسموح لأى شخص تانى يركبها معانا
كل العائلات لما بيجى طفل جديد بيستحوذ على الاهتمام والطفل القديم دايما بيكون مشكله ليهم ووالدتى نبهتنى للنقطة ديه - العكس تماما هو اللى حصل - اهتمامى بمروان تقريبا 80% والدته 15% وحسام 5%
شوية شوية بدأت اخد بالى ان عندى طفل تانى وانى لازم اهتم بيه - لكن برضو مروان كان هو اللى بيكسب فى الفترة ديه
لغاية لما مروان بدأ يفرض سيطرته على البيت (الجملة صحيحة - على البيت مش على اخوه الصغير) واصبح هو الاامر الناهى فى البيت - فى الوقت ده بدات اميل شوية لحسام وفعليا كنت بقول ان ده من باب الشفقة علشان مروان هو الاقوى والاعنف فى كل ردود أفعاله
بعد فتره فعلا أتأكدت انى بحب حسام جدا - يمكن مش زى مروان لكن فعلا بحبه ولما برجع البيت بلاقية نايم بكون فعلا متضايق
شوية بقيت عامل زى المرجيحة شوية اقول انا بحب ده اكتر وشوية اقول انى بحب ده اكتر لغاية لما اكتشفت انى فعلا بدوب عشقا فى الاثنين - لكن ممكن نقول ان مروان اكتر شوية علشان العشرة - والله مش هزار فعلا علشان هو عايش معايه اكتر من اخوه بسنة بالاضافة انى خضت معاه اغلب تجارب الاب مع الابن (من الاخر كنت باجرب فيه )
المهم تقريبا نقول ان الاثنين زى بعض ماعدا انى دايما باقف فى صف حسام ضد مروان لما بيكونوا بيتخانقوا
ربنا يبارك لنا فى اولادنا ويارب يكون حظهم احسن من حظنا ونصيبهم احسن من نصيبنا
المفضلات