ماهو العلاج الامثل للصدأ ؟ أرجو الافادة .

**kimo** · 21-02-2008 06:13 PM

عن تجربة فية انبوبة اسبراى عديمة اللون ب 7 جينة ترش مكان الصدا بعد السنفرة كويس

**road_devil** · 21-02-2008 06:24 PM

هقلك أنا على فكرة كويسة وعملية جدا ومنت باستخدمها مع أى حاجة معدن خايف عليها من الصدأ ومش هتكلفك حاجة تقريبا. بص يا سيدى أنت تصنفر مكان الصدا ده كويس وبعد كده تنضف مكان الصنفرة كويس جدا , ونيجى بقى على المهم أنت تجيب طلاء الأظافر (المانيكير) الشفاف وتدهن بيه الحتة دية بالكامل وتغطيها كويس وتسيبه لغاية ما ينشف كويس وبعد كده تدهن طبقة كمان وتسبها لغاية لما تنشف . وأنس بقى موضوع الصدأ ده نهائى لأن طلاء الأظافر الشفاش هيمل طبقة تعزل المعدن وتمنعه من الأكسدة وطبعا طلاء الأظافر مش بيبان لأنه شفاف. وسيبك من موضوع المعجنة والكلام ده لأن زى مانت عارف فى مصر وقت ما تيجى تبيع بنتلكك على أى حاجة عشان نبخس الحاجة قيمتها وخلاص وبالأخص فى موضوع السيارات ده. جرب الى قلتلك عليه وهتدعيلى أن شاء الله.

**AYMAN4PLUS** · 24-02-2008 10:54 AM

شكرا ياجماعة على مساعدتكم لى ،

ياريت الاستاذ كيمو يقولى اشترى الاسبراى ده منين ، واذا كان الاسبراى عديم اللون معنى كده ان مكان تقشيرة البوية حيفضل بنفس اللون الاسود اللى عليه دلوقت ، مع الوضع فى الاعتبار انى عايز أخللى اللون كله واحد وماشى مع بعضه (لون العربية نبيتى ) ، فهل الاسبراى الشفاف ح يدينى نفس درجة لون العربية ، ياريت تفيدنى فى الجزئية دى خاصة انك جربت الموضوع ده قبل كده ، ودى حاجة جديدة بالنسبة لى .

والله ياأستاذ Roud-devil أنا بادعيلكم من غير حاجة ، لانى دايما باقول "ان الله فى عون العبد مادام العبد فى عون أخيه" وأكيد أى انسان بيساعد أخيه فى أى أمر من أمور الحياة أكيد له الاجر والثواب عند الله .

بالنسبة لموضوع المونيكير الشفاف دى فكرة جديدة ، فهل المانيكير الشفاف بعد ماأحطه ح يدينى نفس درجة لون العربية ، ياريت تفيدنى فى هذه الجزئية .

ان شاء الله انا فى انتظار ردودكم .

**road_devil** · 24-02-2008 09:01 PM

للأسف يا أستاذ أيمن مش هيديك نفس لون العربية هو مجرد هيعمل طبقة شفافة تعزل المعدن عن الهواء وبتالى تمنع الأكسدة الى هى بتسبب الصدأ أنت ممكن لو عاوز تدارى الحتة دية ممكن بنقطتين بوية من نفس لون العربيية باستخدام فرشة ألوان بس للأسف كده هططر تجيب أقل حاجة ربع بوية ومش هتستخدم منه غير نقطتين يعنى هتجيبه وهيعد يبوظ على الفاضى , بص فيه حل تانى وطالما بدأناها مونوكير يبقى أديها مونوكير :) يعنى ممكن تشوف لون مانيكير قريب من لون عربيتك وتداوى بيه الحتة دية براحة

**AYMAN4PLUS** · 25-02-2008 08:56 AM

والله انا فكرت نفس تفكيرك ، وقلت أنا ممكن أشترى مونيكير بنفس درجة لون العربية وأحطه على الجزء ده ، طبعا ده بعد ماأكون استخدمت الصنفرة فى المكان المذكور ، أنا سألت الجماعة فى البيت قالوا لى ان جميع درجات المونيكير النبيتى موجودة بالسوق ، وفعلا أنا ح أجرب الطريقة دى مع استخدام المونيكير الشفاف كمجرد غطاء بعد ماأحط المونيكير النبيتى عشان يدينى نفس درجة لمعان العربية .

ان شاء الله ح أقولكم على النتيجة بعد التنفيذ .

شكرا جزيلا ياأخى على فكرتك الجديرة بالتجربة ، وشكرا جزيلا لكل من حاول مجرد التفكير فى مساعدتى .

جزاكم الله جميعا خيرا .