ماهو العلاج الامثل للصدأ ؟ أرجو الافادة .

**AYMAN4PLUS** · 20-02-2008 10:46 AM

السلام عليكم ورحمة الله وبركاته ،

يوجد بالسيارة قطعة بوية مقشرة فى حجم العملة المعدنية (العشرة قروش) وذلك فى المكان (العمود) اللى بيصد فيه باب السيارة تحت القفل بحوالى 30 سم ، ومكان البوية المقشرة توجد طبقة سواد رقيقة (صدأ) .

الميكانيكى شافها قاللى اديها صنفرة وسكينة معجون وادهنها عادى ، وآخرين حذرونى من فعل ماقاله الميكانيكى لان العربية كده تبقى معيوبة وزى ماتكون عاملة حادثة وده يؤثر على سعر البيع (أنا مش ناوى أبيع السيارة بس عايز أحافظ عليها ، لانى لسه مشتريها) ، ونصحونى أحط شحم على مكان التقشيرة (الصدأ) وحسب ماقالوا ان الشحم عدو الصدأ والبارومة .

الحقيقة أنا حطيت شحم ، ولكن عايز أتأكد من حضراتكم ان هو ده التصرف السليم .

الموضوع ده شاغلنى شوية وعايز أستريح من ناحيته ، أرجو الافادة ماهو الحل الامثل لهذا الصدأ ، وياريت عن تجربة عملية من حضراتكم أو من أحد أصدقائكم.

وشكرا مقدما على الردود .

**ahmed_3omda** · 20-02-2008 02:03 PM

عن تجربـه شخصـيه الشحم فكره كويسه بس مؤقته ياعني بعد غسيل للسياره حيطلع الشحم وحضرتك حتنشف مكان البرومه كويس وتحط شحم تاني ..

نصيحتي ليك :-

- راجع بنفسك كاوتش الابواب ممكن يكون بيه ثقب بينقط علي المنطقه دي وحيزود البرومه (الوقايه خيرا من العلاج). :D

- تنسفر المنطقه دي بحذر شديد بحيث متجرحش البويه المحيطه للبرومه وبعد كدا ممكن حضرتك تشتري قلم دوكو قريب من لون السياره وتلون بيه منطقه البرومه :)

- او ممكن بعد السنفره تنظف المكان كويس وتضع استيكر يكون خامته كويسه يمنع وصول الماء للبرومه :)

وبالتوفيـق يااستاذ أيمـن ;)

**Xpert** · 20-02-2008 02:41 PM

انا نصيحتي ليك تروح لسمكري يعملهالك بمعرفته و انت واقف جنبيه .. و ترجع ترش الجزء من القايم اللي السمكري عمله (مايعبش .. انت مابترشش دواخل ) .. بس اهم حاجه اللي هايرش يظبط درجه اللون عشان الشل العام ..
هيا العربيه نوعها ايه ؟

**AYMAN4PLUS** · 20-02-2008 05:17 PM

شكرا ياأستاذ أحمد وياأستاذ Xpert على الرد الكريم ،

العربية نوعها كيا سبكترا ولونها نبيتى .

طبعا ياأستاذ أحمد موضوع الشحم ده عايز متابعة باستمرار وممل .

وبالنسبة لموضوع كاوتش الابواب أنا شفته قبل كده ومافيش مياه بتتسرب منه .

الصدأ موجود تحت ترباس الباب مطرح ماالباب بيقفل ، واللى انا فاهمه ان المكان ده يعتبر من الدواخل ، ياريت توضحولى ايه المقصود بكلمة دواخل السيارة ممكن تكون معلوماتى غلط .

السؤال دلوقت هل السمكرى الشاطر ممكن يدارى الموضوع ده تماما ، ولا ده صعب ؟

أرجو التواصل معى ، وشكرا مقدما .

**ahmedezzat78** · 20-02-2008 05:18 PM

لو العربيه دواخل فابريقة يبقى الاستيكر احسن و اسهل و اسرع

**Xpert** · 20-02-2008 05:24 PM

اصل الشحم ده عشان تمنع تكون الصداء .. انما انت اولريدي عندك صداء .. فلازم الصداء ده يتعالج عشان ما "يتوغلش و ينتشر و يستمر و يستمر و يستمر.." علس راىء الراجل بتاع الفليت ده .. لازم الصداء يتشال و بعد كده ليس شحم براحتك

**ihab** · 20-02-2008 06:20 PM

ممكن لومكانها متدارى و مش ظاهر تتعمل بلك و ده لو فكرت تبيع العربية بشوية تنر يطلع على طول

**AYMAN4PLUS** · 20-02-2008 11:27 PM

أفتكر ان الرأى الصح هو الحل الدائم يعنى لو فى صنايعى كويس يقدر يمعجن ويرش المكان ده و يدينى نفس لون العمود وبنفس الحرفية ، هوه ده الحل الامثل لسببين :

الاولانى : ان الصدأ مايزيدش وأقضى عليه تماما .

الثانى: ان موضوع الشحم ده أنا عملته ولكنى حاسس ان ده حل مؤقت وليس حل دائم .

وأفتكر ان موضوع الاستيكر والبلك برضه حل مؤقت وليس حل دائم .

ياريت تتفضلوا بالرد على سؤالى الاخير ، هل الصنايعى الشاطر يقدر يعالج ويدارى الموضوع ده تماما ، ولا صعب ؟

الحاجة الوحيدة اللى انا خايف منها ان يظهر آثار شغل فى مكان هذا الصدا ويمكن ده يعيب العربية ، عشان كده ياريت لو تعرفوا صنايعى شاطر فى هذا المجال تقولولى عليه .

وشكرا مقدماعلى الردود .

**Xpert** · 20-02-2008 11:31 PM

مش يقدر يعالج ولا لاء .. لازم يعالج ! .. يمعجن دي لاء .. عشان لازم الصداء يتطهر الاول .. لو معجن فوق الصداء الصداء بيسرح و يخرب القايم كله !

**AYMAN4PLUS** · 21-02-2008 11:19 AM

أنا فاهم انه لازم يصنفر الاول عشان ينضف ونتأكد ان الموجود ده صدأ ولا صاج العربية الاصلى ، وبعد كده يمعجن ويرش .

سؤالى اللى ماحدش رد عليه :

مين يقدر يعمل الشغلانة دى بحرفية تامة بحيث تكون 100% وغير ملحوظة ، ويعالج الموضوع ده مضبوط عشان مافكرش فيه ثانى .

مين الجهة أو الصنايعى الشاطر وعنوانه أو تليفونه واسمه .

أنا مستنى الرد وشكرا جزيلا .