الموضوع: ما هي طريقة تركيب ساعة في لانوس 2 على اسلاك الدفيرة

المشاركة الأصلية كتبت بواسطة jojowork1

بص بصراحه انا مش فاكر اللوان او الفرادي وحتي لو رسمتلك مخطط مش هاقدر احط عليه الوان اسلاك
بس هحاول اساعدك شويه
تعالي نمسك الفرادي واحده واحده
الارضي ممكن بمنتهي البساطه توصله في الارضي اللي في الكاسيت وده لونه اسود طبعا هاتقشر السلك بمكوه لحام او قطر من نصه بحيث ما تفصلهوش وتوصل فيه فرده السالب للساعه
نمسك تاني فرده وهي الموجب اللي هايفضل شغال علطول عشان يحافظ علي الوقت
انت هاتجيب افوميتر وهتفك الكاسيت ووش مفاتيح التكيف وبعدين هتكون فاصل الكونتاكت ومطلع المفتاح بره اصلا وهاتوصل فرده الافوميتر السالب في اي حاجه سالب حتي لو جسم العربيه او الفرده السوده وبعدين ها تبدي تقيس تقريبا هي فرده لونها اصفر داخله علي فيشه الكاسيت هتلاقي فيها موجب ديه اللي هاتروح للفرده الموجب اللي بتحافظ علي الساعه
وبعدين هاتفتح الكونتاكت وتقيس بنفس الطريقه هتلاقي تقريبا فرده لونها احمر وصله علي فيشه الكاسيت برده هتاخد منها الموجب اللي هايشغل الساعه مع الكونتاكت
وبعدين هتقيس علي فيشه اللي داخله علي وش التكيف وانت فاتح نور التبلوه هتلاقي كذا فرده عليها موجب هاتطفي نور التبلوه وتشوف الفرده اللي هاتطفي معاك وبكده هاتبقي هي التبلوه او هتلاقي برده في فرده داخله علي مفتاح الانتظار من تحت هما فردتين لوحديهم وحده منهم موجب بيشتغل مع التبلوه اللي بينور اللمبه اللي جوه مفتاح الانتظار مع التبلوه هتاخد من ده او من ده وهتوصل بنفس الطريقه انك بتقشر الفرده من النص وتوصل فيها ويفضل انك تلحم بمكوه لحام وترجع تقفل علي السلك بشريط لحام او الهيت كافر
طيب تعالي كده نرتب الخطوات
1- ارضي من ارضي الكاسيت او اي ارضي ديه سهله خالص وبرده كل الاحتملات هتلاقي ارضي داخل علي وش التيكف وعلي مفتاح الانتظار
2- الموجب اللي بيحافظ علي الساعه يعني لازم يكون موجب شغال طول الوقت هتلاقي عندك فرده صفره في فيشه الكاسيت او فرده احمر في اصفر في مفتاح الانتظار واتئكد بالقياس
3- الموجب اللي بيشغل الساعه مع الكونتاكت وبرده عندك ده موجود في فيشه الكاسيت لونه احمر او برتقالي اتئكد بالقياس
4 - الفرده اللي بتهدي الاضائه مع التبلوه هتلاقي عندك في وش التكيف عشان بينور مع التبلوه او مفتاح الانتظار او الضباب لان كل ده بينور مع التبلوه برده اتئكد بالقياس

طيب ازاي نعرف الفرادي ديه في الساعه
لو عندك الفيشه هتلاقي في فرده سوده ده الارضي القصه انتهت غالبا هيبقي اللون الاصفر الموجب المستمر الي بيحافظ علي الساعه واللون الاحمر الموجب اللي بيشتغل مع الكونتاكت والفرده الرابعه اللي مع التبلوه
طيب لو الفيشه الوانه مش واضحه هتلاقي السالب اسود اكيد وصله في السالب علي البطاريه او حتي محول 12 فولت في البيت قبل العربيه وبعدين هتوصل فرده فرده علي الموجب في فرده منهم هاتنور الساعه كده ديه اللي بتشتغل مع الكونتاكت هاتسيب الفرده ديه متوصله يبقي كده باقي عندك فردتين فرده للحفاظ علي الساعه وفرده اللي بتشتغل مع التبلوه
هتوصل واحده واحده من الاتنين الباقين واحد منهم هتلاقيها قللت من اضائه الساعه كده ديه فرده التبلوه والفرده الاخيره هي اللي بتحافظ علي الساعه
ياريت اكون عرفت اشرح لاني عارف اني مش تربوي او معنديش قدره علي توصيل معلومه
جرب وحاسب وربنا يسهل
اتئكد من الالوان بالقياس لاني ممكن جدا اكون ناسي الالوان او مختلفه من عربيه لعربيه

تسلم و تعيش يا كبير
انتظر ردي اخر الاسبوع كدا ان شاء الله علشان اعرف املص من الشغل و ابتدي اشتغل على الموضوع
و ان شاء الله خير و هحاول اصور الخطوات و اعملها موضوع جديد و النتيجة بعد التركيب ان شاء الله
يارب كلنا نستفيد

جرب الساعه بره في الاول حتي لو علي محول 12 فولت هاتشتغل عادي
وبعدين راجع علي الخطواط براحه بعد ما تتئكد انها شغاله اصلا وتعرف اطرفها مظبوطه ولا لا