الموضوع: تغيير عرض الكاوتش

المقاس الاصلي اية للجنط ال15 ؟؟
يعني لو حبيت اغير من 50-195 60 علي كام

شكرا علي توضيحك يا استاذ محمد طيب انا شاري عربيتي وفيها الكاوتش 195/50
لما احب اغير المفروض الصح 195/60 ؟؟
وتنصحني بنوع ايه يكون في الحنين علشان هغير 4 فرد (الكومهو مثلا ؟؟) ويعملوا كام

المشاركة الأصلية كتبت بواسطة mohamedway

أنا عربيتى 1600 مانوال موديل 2006 زيك بالضبط و مركب بالفعل 205/60/15 بدل ال195/60/15 و مفيش أى مشكله و الفرامل تحفه بس خلى بالك ان نوع الكاوتش أهم من انك تزود مقاسه يعنى لو كاوتش رفيع نوع غالى و نضيف هيبقه تماسكه بالأرض و الثبات أفضل بكتير من كاوتش عريض بس رخيص و ماركة أى كلام (أفضل كاوتش جربته فى الثبات و الملفات هو بريللى P6 أو P7 أو p Dragon وده بجد تحفه و ده اللى جربته فعلا و مش لاقيها فى السوق دلوقتى خالص و لو لاقيتها انت قولى جبتها منين أو عندك بريدجستون بوتنزا أدرينالين وده بقه فرده جبارة ورمز سرعتها W ) و ان كان المكافىء لل195/60/15 هو ال205/55/15 و ليس 205/60/15 و أنا أنصحك بـ 205/55/15

عاوز اشرح لحضرتك معلومة مهمه

205/55/15

الـ205 يعنى عرض مداس الكاوتش 205 مم

الـ 55 يعنى إرتفاع جانب الإطار = 55% من الـ 205 يعنى = 205 مضروبة فى 0.55 = 112.75مم
طبعا ال15 ده قطر الجنط بالبوصة




195/60/15

الـ195يعنى عرض مداس الكاوتش 195 مم

الـ 60 يعنى إرتفاع جانب الإطار = 60% من الـ 195 يعنى = 195 مضروبة فى 0.60= 117مم
وال15 قطر الجنط بالبوصة


205/60/15

الـ205 يعنى عرض مداس الكاوتش 205 مم

الـ 60 يعنى إرتفاع جانب الإطار = 60% من الـ 205 يعنى = 205 مضروبة فى 0.60= 123مم
وطبعا ال15 ده قطر الجنط بالبوصة.


أظن حضرتك دلوقتى تقدر تحسب ارتفاع أى مقاس كاوتش

يعنى حضرتك لو ركبت 205/60/15 بدل 195/60/15 العربية هتعلى عن الأرض 6مم (123-117) و على فكرة العربية هتكون فى الحقيقة أسرع من قراءة عداد السرعة بمقدار 2% يعنى لو العداد قارىء 100كم/س يبقى ان فى الحقيقة ماشى على 102كم/س

لو ركبت 205/55/15 العربية هتوطى على الأرض بمقدار 4.25 مم و ده هيخلى العربية أبطأ من قراءة العداد شوية (ال100كم/س على العداد = إنك ماشى تقريبا 98كم/س)

طبعا ال205/55/15 أحسن لأن كل ما جنب الإطار قل الثبات بيزيد و العكس صحيح و كون ان جنب الإطار هيقل 4مم فده رقم قليل مش هيعمل معاك مشكلة و لا هيبقه فيه بالونات و لا خوف من المطبات ولا حاجة و إرتفاعه حلو مش قليل خالص و ال4 مم دول أصلا بيخسو طبيعى فردة الكاوتش نتيجة التآكل و ممكن يحصلو نتيجة فرق ضغط نفخ الإطار ....إلخ يعنى من الأخر ممكن تعتبره زى ال195/60/15 بالضبط و مفبش غلط فى العداد كمان لأن أصلا فى تصميم العربية معمول سماحية لقطر العجلة نتيجة العوامل المتغيرة فى الكاوتش اللى انا لسة ذاكرها(الضغط و التآكل اللى لازم بيحصل).

أرجو انى أكون أفدك
لو سألتنى طيب انت حاطط عندك 205/60/15 ليه ما دام مقتنع بال205/55/15 أكتر هقولك انى كان عندى فردتين جداد 205/60/15 و كنت عاوز أجيب فردتين جداد تانيين عشان أشغلهم مع بعض فجبتهم 205/60/15 عشان يبقوا زى اللى عندى و سواء كده ولا كدا الفرق مش رهيب و زى ما قولتلك نوع الكاوتش أهم حاجة و ده أكتر حاجه مؤثرة

شكرا ياأخ محمد ....
على المعلومات الرائعه منك والنصيحه ولكن فى المنتدى نصحونى بتركيب Bridgestone TURANZA GR-80 made in japan بالشيب الجديد وكمان رأى التوكيل أنى مغيرش المقاس الاصلى وده الرد بتاعهم
بعرض السؤال على المهندس احمد عناني مدير الورشة بمركز الخدمة الرئيسي بقليوب رد بأن التغيير سوف يؤثر على استهلاك العفشة بقدر ضئيل وسوف يزيد من استهلاك البنزين بقدر طفيف وسوف يزيد ثبات السيارة في السرعات ويزيد من ارتفاع السيارة بقدام 6 ملم
انسب اطار للسيارة هو الموصي عليه من المصنع وتم تركيبه في السيارة 15/60/195

معلومات قيمه بالفعل
أنا سمعت الكلام ده قبل كده من واحد وكان عنده برنامج بتديلو مقاس العربية الأصلى وتقوله مقاس العرض الجديد وهوا يحسب ويقولك المفروض تركب كام والسرعة عن العداد هتفرق كام بالمائة زي ما أستاذ محمد تفضل وقال

ممكن تحسب عن طريق الموقع دة برضه
Tire Size Calculator - tire & wheel plus sizing

المشاركة الأصلية كتبت بواسطة EngGamail

معلومات قيمه بالفعل
أنا سمعت الكلام ده قبل كده من واحد وكان عنده برنامج بتديلو مقاس العربية الأصلى وتقوله مقاس العرض الجديد وهوا يحسب ويقولك المفروض تركب كام والسرعة عن العداد هتفرق كام بالمائة زي ما أستاذ محمد تفضل وقال

هو ده الموقع بتاع حساب مقاس الكاوتش www.kouki.co.uk

أحب أضيف حاجه يارجالة

زيادة عرض الكاوتشك لا تؤثر على العفشة ، بالعكس زيادة العرض بتقلل الأحساس عموما بالنقر الصغيرة

لكن اللي بيفرق هو تغيير الجنط في حالتين :

إن يكون إجمالي وزن الجنط الجديد مع الكاوتش أثقل من القديم

علشان كده لو هاتغير لجنط من نوع أخر يفضل يكون أخف في الوزن من القديم أو على الأقل بنفس الوزن

الحاجة التانية ، لو غيرت لجنط مقاس قطره كبير جدا مما يتبعه لتغيير الكاوتش لـ Low Profile

لأن في الحالة دي كل رد الفعل من المطبات بيروح للعفشة مباشرة مما يؤدي للأستهلاك السريع