مشكلة ممكن تواجهك في اللانوس بالنسبة لدورة التبريد
السلام عليكم و رحمة الله و بركاته
احبائي في الله ... عاوز النهارده اشرح و اضيف عن عطل ممكن يواجه البعض منا و انا حبيت اني انزله في المنتدى الجميل ده علشان الشباب كلهم يستفادوا
هي مشكلة سخونة العربية و ارتفاع مؤشر الحرارة .... يمكن العطل ده ممكن يكون حله عادي جدا و مشكلته بسيطه لكنه مهم جدا جدا اننا نعرف خطوات حله ...
اولاً الاعراض : ارتفاع في مؤشر الحرارة بشكل ملحوظ مع عمل المروحتين الخاصين بالتبريد معاً على اعلى سرعه لهما
الحل : لازم يا جماعة ناخد بالنا من حاجه مهمة جدا ان ارتفاع درجة الحرارة في العربية ممكن نتنتج من حجات كتيرة اوي زي ( الزيت الموتور قل جدا - فيه مشكله في وش السلندر [ المشاكل بانوعها] - انسداد في رادياتير التبريد نتيجة الصدأ - تلف في ترموستات الحرارة داخل الموتور و الموجود خلف سير الكتينة - انسداد في خرطوم خرج الرادياتير الى الموتور - قطه او تلف في ادى خراطيب توصيل المياه من و الى الرادياتير و الموتو - وجود تهرب مياه من الرادياتير نتيجه ثقب ما في مواسير الترشيح )
علشان نتجنب ارتفاع درجة الحرارة في العربيات و نحافظ على عربياتنا
لازم كل فترة كدا نروح عند بتاع الراديترات و نخليه يفكة و نضفه من جوة بمزيل الصدا و هتلاقوا فعلا ان فيه بلاوي بتخرج من مرشح وحدة التبريد (الرادياتير) .
الحاجة التانية اللي لازم تتغير و هي الترموستات و دي ديما هنعملها و احنا بنغير سير الكاتيه علشان يبقا الموضوع بالمره علشان تغير الترموستات بيحتاج فك مجموعة الكتينة و احنا هنقول ان سير الكتينة بيتغير عند كل 90000 يبقا نغير معاه الترموستات بالمرة .
فا اللي يلاحظ عند اي مشكله في درجة الحرارة لازم ينضف دورة التبريد بالكامل .. و بعد كدا يشيك على الترموستات
انا حبيت بس اشارك ولو بحاجة بسيطه و شكراً ليكم يا شباب