الموضوع: سؤال للزملكاوية ...هل فرحانين بالحضري؟

المشاركة الأصلية كتبت بواسطة hh

سؤال للأهلوية, انتوا ايه اللي مضايقكوا؟؟

أنا شخصيا مقتنعة جدا بانضمام الحضري, أحسن حارس مرمى في مصر و أفريقيا و واحد من أحسن الحراس على مستوى العااااااالم. أيه اللي يخليني مش مبسوطة انه ينضم لفريقي؟؟

السن؟؟ حارس المرمى ممكن جدا يستمر لغاية 41 - 42 سنة, و الحضري ما شاء الله عليه لياقته و مستواه في أعلى حالاتها. هو حيبقى عمره 38 سنة في يناير لما يبتدي ان شاء الله يلعب بعد الايقاف يعني يقدر يدي سنتين تلاتة كمان.

زعل عبد الواحد السيد؟؟ معلش يعني لو النادي رفض يجيب أحسن لاعب في مركزه عشان اللي بيلعب في نفس المركز مش عايز منافسة يبقى أكبر تهريج. و احنا ما صدقنا الادارة تبتدي تقف موقف حازم مع أسلوب لوي الدراع ده. و بعدين هو ايه اللي يزعل عبد الواحد أصلا؟؟ ده عنده فرصة ذهبية انه يثبت نفسه مش بس في الزمالك لأ في المنتخب كمان و يقعد الحضري و ياخد مكانه لأنه حيلعب أساسي الدور الأول كله سواء مع الزمالك أو مع المنتخب. و الله بعد الدور الأول لو هو قدر يثبت انه يستحق يلعب أساسي على الحضري, نبقى كسبنا أتنين حراس مرمى ملهومش حل, مقدرش يسد و الحضري رجع حيلعب أساسي و يبقى تفكير سليم ميه في الميه انك تدعم المركز بالأحسن. حتى لو عبد الواحد راح الأهلي زي ما الأهلوية بيتمنوا - و أنا ماعتقدش أبدا ان ده حيحصل - فبرضه كدة الزمالك كسبان انه عنده الحارس الأقوى فنيا.
و على فكرة اللي بيقول عبد الواحد عمره في الملاعب أطول, أحب أفكره انه عبد الواحد من اللاعيبة اللي بتتصاب كتير. و موضوع العمر في الملاعب دي بتختلف من لعيب للعيب, يعني حازم أمام مثلا معتزل بقاله سنتين و قبلها سنتين تلاتة مستواه في الأرض, عكس واحد زي أحمد حسن اللي بيلعب لغاية دلوقتي و لياقته كويسة جدا رغم انه أكبر من حازم في السن. فمش شرط ابدا ان الحضري يعتزل قبل عبد الواحد لأن عبد الواحد برضه عنده 34 سنة يعني مش صغير.

بخصوص بقى موضوع الحضري انه طلع عيط عشان يرجع الأهلي فده كلام يضحك. مهو حمال حمزة طلع قبل كدة و قال انه ممكن يلعب في أي نادي في الدنيا الا الأهلي و رغم كدة الأهلي أتعاقد معاه. و بعدين اشمعنى فاكرين دي و مش فاكرين الحضري لما طلع هزق عدلي القيعي عالهوا و قاله الأهلي عايز يدمرني بس أنا حلعب غصب عن التخين؟ و بعدين مفيش بني أدم في مصر مش عارف ان العياط بتاع الحضري ده كان تمثيل عشان يرجع الأهلى لأن حكم المحكمة الرياضية كان قرب, فهو قال أضحك عليهم بكلمتين و هما محتاجين جون بأي طريقة يمكن يسامحوني و اهو ساعتها لا يبقى فيه ايقاف و لا غرامة. و على فكرة انا متأكدة - و العلم عند الله طبعا - ان الحضري عمره ما حيعمل مشاكل في الزمالك سواء لعب أو لأ, لأن الحضري ذكي جدا و بتاع مصلحته. هو عارف انه فاضله سنتين تلاتة و يعتزل و عارف ان مالوش مكان في الأهلي و طبعا الأسماعيلي مش الأملة, عشان كدة هو حاب يجي الزمالك عشان يقدر يلاقي مكان في نادي كبير بعد الأعتزال.

تاني بقى, الأهلوية بيقولوا الحضري حيهد الزمالك.. أمال متضايقين ليه؟؟؟؟؟؟

إحنا مش متضايقين ولا حاجة بس انا عايز اعرف رأي الزملكاوية في موضوع ضم الحضري زي ما وضحت قبل كدا
بس إزاي حضرتك تبقى مبسوطة بضم الحضري وانتي عارفة إنه بتاع مصلحته وممثل وبتاع فلوس؟!!!

المشاركة الأصلية كتبت بواسطة أبو حمزة

اسمحيلي أرفع القبعة على التحليل المنطقي الاحترافي
حضرتك أثرتي نقاط كانت غايبة عني شخصياً
بس برضة صعبان عليا اللي اتدفع فيه
ومستخسر إنهم ميتدفعوش في لعيبة صغيرة في السن

المشكلة في رأيي انهم كمان اتدفعوا في لعيب الفرقة مش في حاجة اليه والفرقة فيها اتنين حراس مرمى زي الفل وكمان كشخص ممكن يبيع ناديه عشان عقد احسن تحس ان الموضوع موضوع عند مش اكتر وهو دا الي مضيع الكورة المصرية انها ماشية بالاهواء

المشاركة الأصلية كتبت بواسطة hh

كمان يا ريت الزمالكوية يفكروا شوية قبل ما يرددوا كلام الأهلوية بتاع حسام حسن بقى هو المتحكم في الزمالك ده. مهو طول عمرنا بنقول عايزين الجهاز الفني يكون هو المتحكم في فريق الكورة. نقوم لما يبقى عندنا مدرب فاهم و واثقين فيه و الناس عايزين يسيبوه يشتغل براحته ننتقدهم؟؟

طيب كانوا فين لما كان جوزيه كل سنه بيجيب لعيبة عاهات و ميلمسوش كورة طول الموسم و بعدين يمشيهم؟؟ فاكرين الويشي؟ فاكرين عبد الحميد حسن المهاجم الواعد اللي عنده 36 سنه؟ مش نفس الناس اللي بتهاجم هما اللي بيهللوا لادارة الأهلي المحترفة ؟

هو من حق حسام يعمل الي هو عايزه في فريق الكورة بس مش لدرجة إنه يمنع لعيب زملكاوي أصيل زي عبد المنصف إنه يدخل النادي ويحلف بالطلاق إنه مش هيعتب النادي تاني ولا ايه؟

المشاركة الأصلية كتبت بواسطة normal

مين الاخرين الى أنا محترمتش مشاعرهم؟

ياريت يا جماعة الموضوع ميقلبش حوارات جانبية ولا اهلاوية وزملكاوية احنا بنتكلم بهدوء وبنتناقش عن لاعب محدد اللي هو الحضري وبس ومحدش يفتح حوارات تانية فرعية ممكن تعمل مشاكل من فضلكم

المشاركة الأصلية كتبت بواسطة ecybrarian

الموضوع شكله هايقلب اهلاوية وزمالكوية..تاااااااني...صدق� �ني المشكلة مشكلة إدارة المنظومة (الفاسدة) الكروية في مصر كلها..ما هو احنا كل سنة في الموال دا..الاهلي يجيب لاعيبة ويقعدهم على الدكة والزمالك يتعاقد مع نجوم والمشاكل الداخلية تقضي على الفرقة..والضحية في الآخر الجماهير ..دا احنا لو جبنا فرقة برشلونة كلها (مكان الاهلي ولا الزمالك)....برضه ما فيش فايدة

كلام 10/10 فعلا الأهلي والزمالك كتير بيشتروا لعيبة مش محتاجينلهم لمجرد العند