الموضوع: تحذير من احدى الشخصيات فى المنتدى

اولا ربنا يعوض عليك بالخير ان شاء الله
..
البورصة دي مغامرة معرضة للخسارة والمكسب وزي ما احنا متوقعين المكسب يجب ان لا نستبعد الخسارة
اللي عاوز اعرفه
هل الشخصية دي كانت عارفه ان الاسهم دي ح تخسر كدة وتعمدت انها تخسرك فيها ؟؟
هل هيا استفادت من خسارتك اي نوع من الاستفادة ؟؟
اعتقد انك لو كنت كسبت كان ح يكون افيد ليها علشان تحصل على حصتها في الربح كالاتفاق
انا شايف ان اللي حصل ممكن يكون غير اللي حضرتك متصوره
البورصة حصل فيها انهيارات رهيبة الفترة اللي فاتت وناس كتير خسرت مبالغ رهيبة
مش ممكن يكون اللي حصلك ده بناء على ترشيحها كان بسبب انهيارات بورصات اوروبا بعد احداث اليونان ....
انا ما اعرفش الزميله اللي انت بتتكلم عنها تماما ويمكن اول مرة الاحظ اسمها
لكن هل هيا تعمدت تضليلك ..... ولا اللي حصل كان سوء اختيار منها ؟؟؟؟

المشاركة الأصلية كتبت بواسطة hema_lancer

اولا : فين اسم الشخصيه طيب
ثانيا : انا شايف ان حضرتك غلطان لأنك بتقول انك خسرت فيها قبل كده مبلغ كبير
وباردو دخلت بمبلغ كبير وخسرت بسبب واحد متعرفوش فا كان المفروض حضرتك تسأل مره واتنين وعشره وتعرف كل سهم خباياه كويس
البورصه مش سهله ولا مجرد ورقه يا نصيب
البورصه تجاره مش شطاره
وكل اللي اقدر اقوله ربنا يعوض عليك ويرزقك باللي أحسن من كده وتعوض خسارتك بأذن الله

يا هيما يا حبيبي احنا بنفترض في اللى داخل المنتدي هنا انه عايز يفيد الناس ويستفيد منهم مش يضرهم
يعني مثلا انا لما مشت وراك في موضوع تغيير حاجة في عربيتي كنت اعرفك قبل كدة ؟؟؟؟؟؟؟؟؟؟؟
لا طبعا بس افترضت انك انسان صادق وعايز تخدم لوجه الله والحمد لله فعلا طلع ظني في محله واصبحت صديق عزيز بعتز بصداقته وبعتبره من مكاسبي من الموقع
ثانيا صعب يقول اسم لاشخصية على العلن والا ممكن يتحاسب ويبقي بيهاجم الشخصية دي وبيشخصن لاحوار الخ الخ ويطلع هو اللى غلطان في الاخر كمان

المشاركة الأصلية كتبت بواسطة ashrafsadany

ربنا يخلف عليك بالخير يا اخى ويرزقك خير من ما خسرت ان شاء الغنى المنان رب العالمين ولو حضرتك قلت على الشخصيه دى هتفدنا كثيرآ لان ممكن يخدعنا خدعه جديده فسبحان الله الواحد قابل ناس للاسف لا تتمنى لك الخير بل يتمنى لك الضرر ربنا يحفظنا جميعآ

نفس الرد اللى قلته لهيما
بس سبحان الله
ليه ناس تتمني الشر لناس والضرر
هيستفيدوا ايه
وعلى فكرة الشخصية دي كانت فعلا تقصد تضره لكن مش كشخص وهوضح ده في اخر المشاركة

المشاركة الأصلية كتبت بواسطة hazoom2006

ا
انا مش فاهم طب هو اية مصلحته انه يخسرك برغم انه هياخد منك ربع المكسب لو السهم طلع يبقى مصلحته انه يكسبك

وبرده حتى لو يعرف ميكر اسهم الميكر مش هيقول لحد امته السهم هيطلع وامته هينزل لانه عايز يكسب

يا باشا الميكرات دول عالم تانى ومش اي حد بيقي ميكر لازم يبقي معاه فلوس كتير عشان يقدر يلعب باسهم شركات معينة هي عادة الشركات ضعيفة راس المال قليلة الاسهم علشان يقدر يتحكم في السهم
اللى عملته النصابة دي هي والميكر اللى بتشتغل لحسابه انها دخلت الموقع هنا واكيد دخلت مواقع تانية كتير وبقت تقنع الناس باسهم معينة هي اسهم الشركات اللى قلت عليها علشان تقنع اكبر عدد من الاشخاص يشتروا منها
وطبعا الميكر هنا بيبيع
والناس تلاقي لاسعر طالع والميكر يشتري هو كمان
لغاية لحظة معينة استوب
الميكر يبيع كل الاسهم اللى معاه ويلبسها اخوانا اللى عاملين طلبات شراء
وباي باي كمبورة
الكل يلاقي السهم بينزل تحصل حالة هلع الكل يبيع ومحدش بيشتري لغاية ما السهم يوصل الحضيض
وهنا ممكن الميكر يكرر اللعبة على نفس السهم او يلعب بسهم تانى

وفيه ناس عملوا ملايين من اللعبة دي
وعلى ما افتكر الدستور او صوت الامة كانت عاملة موضوع من شهور عن اكبر 10 ميكرات في البورصة المصرية

والله يرحمه لكح ويخرب بيته
كان دايما يلعب اللعبة دي بالسهم بتاعه
يفضل يعمل طلبات شراء والناس تبيع والسعر يعلى ويبدا الانتباه لارتفاع السهم فالناس تبدا تشتري وهو يشتري معاهم ويبيع لهم في نفس الوقت علشان يبقي فيه حركة على السهم لغاية ما يوصل لاعلى سعر وهوب يبيع كل الاسهم اللى معاه تلاقي الناس لبست وتانى يوم كله بيبيع ومحدش بيشتري
والله فاكر اللحظة دي كانها بتحصل حالا
السهم بقاله اكتر من 3 اسابيع في ارتفاع يومي 5% والطلب بيزيد بجنون والعرض قليل جدا لغاية ما في يوم قاعد في شركة السمسرة ادام الشاشة والطلبات وصلت اكتر من 20 مليون سهم والعرض صفر وهوب الساعة 3 الا 5 وقبل ما البورصة تقفل ب5 دقايق بس لقيت الشاشة اتغيرت
يا نهار اسود
كل طلبات الشراء اتنفذت وال20 مليون سهم المطلوبين اتنفذوا في فانية الىل هي جزء من الثانية طيب يا جدعان من ثواني مكانش فيه عرض قالك اتنزل عروض مفاجاة بال20 مليون
تانى يوم السهم نزل 5% والناس كلها بتبيع ومحدش بيشتري وهكذا حتي وصل السهم الحضيض وعاد لكح ليلعب نفس اللعبة مرة تانية
بس كنت انا لبست في اول مرة وحلفت عمري ما ادخل لاسهم ده تانى
عرفت بقة يا باشا النصابة نصبت عليه ليه ؟؟؟؟؟؟؟؟
لانها بتشتغل لحساب ميكر وبتخلي لانااس تشريت علشان السهم يرتفع وفي الاخر يلبسوا في الحيط

المشاركة الأصلية كتبت بواسطة mazagangee

بس انا مش بغلط العضوة دي قد ما بغلطك انت .
ازاي تدي عقلك و فلوسك لحد ما تعرفوش . طيب هيه هتكسبك ليه يعني ؟ عشان ربع المكسب ؟
‏ طب ما هيه تشتغل بفلوسها و تاخد المكسب كله ليها
تسيبلك 75 في الميه ليه يعني ؟

لو حضرتك مهتم بالبورصة و عايز تشتغل فيها يبقى لازم تذاكر و تتعلم ازاي تحدد نقط البيع و الشراء و اكيد فيه معانا هنا اعضاء فاهمين تحليل فني ممكن يساعدونا في فهم حركة الاسهم و السوق

متزعلش مني بس انا خايف عليك

يا باشا كل السماسرة في شركات السمسرة بيلعبوا اللعبة دي يديك توقعات مقابل نسبة من ارباحك
وهو مش خسران حاجة لانه مش شغال فلوسه والله كسبت اخد منك نسبته خسرت يبقي هو مخسرش حاجة

المشاركة الأصلية كتبت بواسطة ahmedgen2

أنا تقريبا عارف انت بتتكلم على مين ، بس ياريت تقول الاسم للتأكيد.

ميقدرش لاا لو الادارة قالت له يقول الاسم والا يبقي بيسبها ويشخصن الحوار الخ الخ الخ ومش بعيد يتوقف وقف نهائي

المشاركة الأصلية كتبت بواسطة mada121977

نسيت ان اذكر نقطه هامه جدا فى الموضوع وهى ان هذه الشخصيه وبعد خسارتى الكبيره فى السهم فى المره الاولى كانت تلح على باصرار غريب ان ادخل ماتبقى من مال فى مجال الفوركس على اساس ان سيادتها خبيره الخبراء فى الفوركس وان مكسب عمليه واحده فى الفوركس سيعيد مكسب خساره البورصه كلها فى فتره قصيره وكانت هذه الشخصيه تلح على بان اضع ماتبقى من المال فى حساب خاص بشركه الفوركس التى تتعامل معها فى لندن وان اقوم بعمل تفويض لسيادتها حتى تتحكم هى فى حسابى الخاص بالشركه .. يعنى احط القرشين اللى فاضلين فى لندن وادى لسيادتها تفويض كمان بالحساب بتاعى وانا بقى ابقى اقزقز لب على رصيف مستشفى الامراض العقليه فى العباسيه !! طبعا انا رفضت الفكره تماما ولذلك يبدو ان طلبها منى بشراء اسهم الشركه الخاسره فى المره الثانيه كان محاوله للانتقام منى لرفضى موضوع الفوركس التى كانت تصر عليه

مفيش معاك شوية لب لاخوك
بضحك معاك طبعا
على فكرة هي تانى مرة مكانتش بتنتقم ولا حاجة هي كانت بتكمل شغلها لحساب الميكر اللى بتشتغل عنده
والحمد لله انك مديتهاش الفلوس كان زمانك فعلا بتصوت والثانون لا يحمي المغفلين
احمد ربنا انه وجهك للصواب في المرة دي

المشاركة الأصلية كتبت بواسطة shok

طول ما لطماع موجود
النصاب بخير

والله مش عارف ليه اتضايقت من مشاركة حضرتك
وصفك لاخونا احمد بناه طماع لم يكن موفقا بالمرة والا نتهم كل واحد عايز يستثمر فلوسه في حاجة يكسب منها انه طماع
ونوصف الشركات الكبري اللى بتلجأ لشكرات تعملها دراسات جدوي للمشاريع بناها طماعة
راجع نفسك في الكلمة دي تانى
وانا حاسس انك مكنتش تقصد المعني بتاعها

المشاركة الأصلية كتبت بواسطة john_samy_1

ربنا يعوض على حضرتك. وحضرتك مؤمن فثق إن ماحدث حصل للخير وحضرتك تستفيد منه عشان المستقبل إنشاء الله.
أنا بس كان ليَّ سؤال و خاصة للأعضاء اللي اتعاملوا مع البورصة, أنا أعرف إن البورصة استثمار مش تجارة. وإن نوع التعامل في البورصة بطريقة التجارة بيعرض لمكاسب أو خسائر كبيرة في اوقات قليلة. انما الاستثمار هو دراسة وضع مؤسسة وخططها للسنوات المالية القادمة واستراتيجياتها لتحسين وضعها في السوق ( وديه بتكون مدد زمنية طويلة ) وباستثمر في اللي أنا مقتنع بيه. لو الشركة أو الإدارة بتنفذ بطرقة خطأ ساعتها اروح استثمر في مؤسسة تانية. هل ده صح ولا هي تجارة فعلا ونوع من أنواع اضراب واجري؟

يا جون باشا فيه طريقتين في البورصة
الاولى انك تشتغل على الاسهم السريعة بمعني تشتري وتبيع باسرع وقت وتحقق اكبر قدر ممكن من المكاسب من السهم وتبيعه وعادة دي بتبقي في الاكتتابات كلها بتتم على الطريقة دي
واحد صاحبي محترف بورصة من 1999 متخصص اكتتابات يشتري في الاكتتاب ويبيع اول يوم لطرح السهم للتداول وبسم الله ما شاء الله محقق ارباح حلوة جدا
لكنه حذر جدا واعتبر ان البورصة هي شغلته لغاية دلوقت
وممكن يروح شركة السمسرة اللى بيتعامل فيها يوميا من 10 الصبح لغاية 4 العصر وبالشهور من غير ما يشتري ولا يبيع اي سهم

المشاركة الأصلية كتبت بواسطة tyler_durden

هو حضرتك معترض إنك خسرت و لا إنك سمعت كلامها و لا إيه يعني ?
بالعضوة دي و من غيرها أنت خسرت و أي حد معرض للخسارة في البورصة

و ده درس لكل واحد إنك تشتغل في حاجة تعرف عنها معلومات و ماينفعش تخلي حد إن شاء الله أخوك يشوفلك شغلك

يا باشا كلامك ده ممكن لكن مش في البورصة المصرية اللى مش بتشتغل على اي اساس علمي
يعني شكرات كسبانة وميزانيتها محققة ارباح زي الفل وتلاقي سهمهما احمر على طول
وشركات تانية راسمالها ضعيف جدا ومحققتش اي ارباح ولا اخدت اي مشاريع وتلاقي سهمها اخضر على طول
ليه ؟.؟؟؟؟؟؟؟
شغل ميكرات وسماسرة والخسران في الاخر العملاء العاديين اللى زيي وزي احمد وزي حضرتك اللى فاكرين انها بالعلم او الدراسة او باستقراء المستقبل والمتغيرات المختلفة المؤثرة على حالة الاسهم

المشاركة الأصلية كتبت بواسطة ahmed4000

انا حذرت من الموضوع ده اول متفتح وقدمت عليه مشاركة سيئة والحمد لله الادارة قفلته قبل ميبقى فى ضحايا اكتر
وبرده لقيت العضوة باعتلى انها ممكن تفتحلى حساب فوركس..على فكرة اسمها مش حيفرق لان مش المشكلة مين العضو المشكلة فى العرض نفسه اللى ممكن يجلك باى اسم "تعال وشارك معانا وحتكسب دهب من غير مجهود"


انا ممكن اقول ان العضوة مش لازم تبقى نصابة ولا فى انتقام ولا حاجة (حتتنقم ليه منك هى اكيد عايزة تكسب) لكنها واحد زى الوف فى البورصة فاكرة ان الموضوع سهل وان فلان ده عنده كل المعلومات وحيقولهالى ونكسب

وده ميمنعش غلط حضرتك وده نفس اللى بيحصل فى اى توظيف اموال...واحد يجى يقولك هات فلوس وانا حكسبك وانا اسمع كلامه بدون فهم وعايز اكسب

طيب ازاى اكسب من غير مجهود؟

هو فى فلوس بتيجى من الهوا؟؟؟؟

ولو جت من الهوا صدقنى حتطير فى الهوا ولا حتستفيد بيها حاجة

(على فكرة نفس الموضوع بيتم بصورة حسنة النية هنا على المنتدى..ناس بتحلل اسهم وناس تانى ماشية وراهم...ومع احترامى للطرفين...بس ازاى واحد يمشى ورا كلام واحد تانى حتى لو كان خبير الخبرا (ده مش مقصود بيه حد هنا علشان محدش يزعل) لان دى أفة البورصة المصرية كلها نسمع اى كلمة نجرى وراها وادخل على كل منتديات البورصة حتلاقى واحد عمال يحلل ويدى توصيات والناس وراه وهى مغمضة

وبعدين الناس تيجى تقولك البورصة وحشة وخسرتنا...طيب مانت لازم تخسر طبعا مدام ماشة بالطريقة دى


وبرده عايز ارد على الناس اللى عمالين يعلنوا فى البورصة

البورصة حلال مدام مبتشتريش فى شركة انتاجها حرام ومدام مبترميش فلوسك وخلاص

والبورصة لا هى فهلوة ولا سهلة ومحتاجة مجهود ودراسة وعلم والا مش حتكسب

الحمد لله انك موقعتش فيها
ثانيا الموضوع اللى حضرتك بتقول عليه مجرد ان احد الاخوة هنا طرح الموضوع للنقاش واتطور وبدا يعمل تحليل مالي وهو نفسه كرر اكتر من مرة انه مش خبير ولا قال للناس روحوا اشتري ولا قال لحد هاخد منك اي حاجة يعني بيقدم معلومة وخدمة مجانية انت عايز تتبعها اتبعها مش عايز براحتك زي ما هو قال لما احد الاعضاء قاله هشتري على ضمانتك قاله لا بس لو كسبت ابقي ادعي لي ولو خسرت انا ماليش دعوة
انما العضوة دي كانت عايزة تاخد مكسب الربع
فرق كبير ججدا بين الحالتين

المشاركة الأصلية كتبت بواسطة karim_monir

اخي احمد
عوضك الله خيرا ان شاء الله عن ما فقدته ولا تحزن فامر المؤمن كله خير
بصفتي لا بشخصي اطالبك بكشف اسم الشخصية فورا لاني لا اقبل ذلك في منتداي مطلقا
اعتقد والله اعلم اول حرف منها d
صح ولا انا غلطان

والله العظيم وحياة اولادي احترامي ليك بيزيد يوم بعد يوم يا كريم يا منير
ووالله العظيم وبدون تلقيح على حد انت بتثبت انك صاحب الموقع رقم 1 في مصر في كل حاجة مش في السيارات بس زي ما ناس بتوهم نفسها

المشاركة الأصلية كتبت بواسطة zakiali

انا عمري ما سمعت عن واحد كسب من البورصه .. كل الناس خسرانه .. كلهم بمعني الكلمه ... وأتحدي أي واحد يقولي انه عمل من البورصة دي فلوس . للأسف الطمع هو اللي بيدفع الناس للانقياد وراء الخرافات والأحلام .. يعني همه اللي بيجيبوه لنفسهم بمزاجهم .. يبقي الواحد ميرجعش يعيط بعد كده .... أنا برده من ضمن الناس الخسرانه دي لحسن حد يفتكر اني شمتان ! .. لله الأمر من قبل ومن بعد

لا انا اعرف
الاول انا معاك زي حالاتك وزي احمد خسران بس انا خسارتى قليلة والحمد لله
بس واحد صاحبي في البورصة من 1999 وربنا كارمه ربنا يكرمه اكتر يا رب
بس هو متفرغ لها بمعني الكلمة
يعني يوميا من 10 الى 4 عصرا في البورصة وممكن يفضل بالشهور بدون بيع او شراء ومتخصص اكتتابات وبيدرس ويحلل الاسهم كويس جدا وكمان بيتابع الاقتصاد والسياسة والحروب والكورة وكل حاجة وبيقولي ان كل ده ليه تاثير على البورصة حتي رمضان والثانوية العامة ليهم تاثير على البورصة وهو كان سبب ان خسارتي قليلة لانه نصحني ابعد في الوقت المناسب لكن بصراحة في شراء او بيع الاسهم هو مش بيرضي يقول تشتري ايه وتبيع ايه بيقول كل واحد متعلق من عرقوبه علشان نفضل اصحاب ومزعلش منه في يوم من الايام وانا احترمت رايه لكن لما قالي اخرج من البورصة واصر بدون ابداء الاسباب اخدت برايه والحمد لله رايه كان صواب

المشاركة الأصلية كتبت بواسطة mada121977

والله اللى انا استشفيته بعد الخساره دى وبعد مراجعه ماحدث من احداث انها قد يكون فى نيتها تحقيق الخساره حتى تدفعنى الى قبول الحل الاخر الا وهو الفوركس ..
بالنسبه لحصولها على المكسب فطبعا مكسب الفوركس هيتعدى بمراحل مكسب البورصه ده اذا كان فيه فعلا عندها خبره ودرايه بها .. بمعنى انك تأخد نسبه من عمليه واحده فى البورصه ولا تتصرف فى حساب بأكمله وصاحبه لايعلم عنه شيء ؟
بالنسبه لموضوع بورصات اوروبا وماترتب عليه من هبوط فى مصر فمن الطبيعى جدا ان الميكر اللى اشارت ليه هذه الشخصيه سيكون عنده معلومات عن هذا الهبوط

الاخوه الكرام ابلغنى احد الساده الافاضل وهو طبيب بشرى مصرى يعمل بالمملكه العربيه السعوديه (وهو ليس من اعضاء المنتدى ) والذى تعامل مع الشخصيه المذكوره ان نفس السيناريو الذى حدث معى حدث معه بالنص وانها تسببت فى خسارته مبلغ كبير من المال !!

يا باشا كلامك بياكد كلامي ان دي بتشتغل عند ميكر كبير مشغلها هي وناس غيرها علشان يتلاعب بالسوقق باسهمه وباسهمهم وطبعا الشركات اللى حضرتك اشتريت منها كانت زي ما قلت من الشركات اللى راسمالها قليل وبالتالي عدد اسمهمها من السهل التلاعب بيه