السلام عليكم

ناس كتير تعرف إني صيدلي..وعندي صيدلية
وعلشان أنا من ساهري الليل
بتعدي عليا حاجات غريبة في الصيدلية..أقرب ماتكون للأفلام
أفلام عالم الليل
عدى عليا خلال الــ3 سنين إلي فاتوا تجارب...أنا عاوز أحكي عن تجربة الليلة
وهدي لمحة سريعة عن التجارب السابقة
حصل من كام إسبوع إني كنت هتسرق (أو أتقتل) في الصيدلية ..بعد منتصف الليل
وحصل إني شهدت وفاة شخص بذبحة صدرية عندي في الصيدلية.. بعد منتصف الليل
وحصل خناقات مع طوارق الليل والــ(شمامين)..بعد منتصف الليل

وحصل
وحصل

............................النهاردة...... .......................
سواق ميكروباص داخل ومعاه مريض ومعاهم روشتة
الروشتة فيها محلول....والدنيا ليل
ومفيش حد يعلق محلول دلوقتي...والحل إني هعقل له المحلول(وللأمانة أنا إلي عرضت إني أعلق المحلول علشان أنا عارف إنهم مش هيلاقوا حد يعلقه)
المهم
علقتله المحلول بعد عناااااااااء..علشان الراجل كان ملياااااااااان جدا ..ومفيش له أي أوردة ظاهرة أو حتى مستخبية
الراجل علق المحلول ..وفضل في الصيدلية لحد لما المحلول خلص
وفي هذه الأثناء
دخل واحد في أوائل الأربعينات...شعره طويل ..خواتم وسلاسل وكل إلي ييجي في بالكم
دخل علشان عاوز (.......)..المهم قولتله مفيش والله
مشي
السواق والمريض إلي قاعدين معايا قالولي تعرف مين ده
قولت مين!!!!!!؟؟؟؟
قالولي فلان
مختصر الكلام
فلان ده مجرم سابق..لص سيارات شهير للغاية
وحسب حكاوي السواق إلي كان قاعد...إن أي حد عربيته بتتسرق
بييجي لــــفلان ده ..ويديله إلي فيه النصيب
يقوم فلان يقوله..تروح الحتة الفلانية ..الساعة الفلانية...هتلاقي بسلامتها واقفة والمفتاح في ورا الفانوس الامامي(أو مهما يكن)
وعرفت منهم
إنه حاليا إعتزل المهنة ..وشغلته إنه يرجع العربيات المسروقة في نظير مبلغ مالي
وقالولي
إنه راجل جدع...مابيسرقش من بلده...ومانع على الحرامية أصحابه إن أي حد فيهم يسرق من بلده وإلا (الويل له)


دي كانت مغامرة الليلة(لو هتعتبروها كده)....وبس