بسم الله الرحمن الرحيم
في البدايه احب اعرفكم بنفسي انا محمد حسام وبشتغل في خدمه العملاء في منصور شيفروليه (ماحدش يضرب يا جدعان)
انا عارف طبعا ان في بعض العملاء زعلانين ومستائين جدا من التوكيل ومن المعامله وفيه كتير بيعانوا في مراكز الصيانه
انا معاكم طبعا في تقصير ومش هاقول ان الخدمه تمام بس هي برضه مش وحشه اوي
انا طبعا عارف المعاناه والماساه لاني بلمسها كل يوم في التعامل مع العملاء اه في اعطال متكرره وفي مشاكل وفي اخطاء ودا شيء وارد في اي توكيل مش في منصور بس
عندنا في مصر ثقافه المركز الرئيسي يعني حتي لو العميل حس ان العربيه فيها عجله مريحه شويه وعايز يزودها يقوم رايح علي المركز الرئيسي يعني مثلا النهارده كان فيه عميل ساكن في العبور وعايز يحجز في الهرم في المركز الرئيسي ودا لانه عايز يعمل اول صيانه
طبعا من حقك كل الحق انك تعمل في اي مركز حضرتك عايزه في ضغط كبييييييير جدا في مركز الهرم يعني حضرتك لو فكرت شويه هتلاقي انك وانت جاي من العبور هاتعدي علي 8 مراكز صيانه معتمده ومركزين بتوع منصور نفسه لكن انت عايز تضيع وقتك وعايز تحرق بنزين علشان تروح مركز الهرم لما يبقي القدره الاستيعابيه للمركز 150 سياره في اليوم ويروحله 300 استحاله المركز هايقدر يرضي ال 300 دا غير الناس اللي بيبقي عندها مشكله وبتروح لان الاعطال بتبقي بدون حجز طيب افرحوا يا ناس المركز بقي يشتغل كل يوم من الساعه 8 ونص الصبح لحد 11 ونص بالليل بدل 4 ونص
اه فيه مشاكل في الصيانه وفي اعطال متكرره وفيه ناس بتقول انا كنت حاجز ميعاد صيانه وروحت علشان اعملها وقعد في المركز 4 ساعات طيب حضرتك بتعمل صيانه دوريه بس طيب ممكن نروح اي مركز معتمد برضه والله الخدمه هناك زيها زي المركز الرئيسي
جميع مراكز منصور بالحجز سواء الهرم او مدينه نصر او مركز ياسين في مصر الجديده او مركز التجمع الخامس او مركز العامريه في الاسكندريه
في حاله الاعطال او المشاكل العميل لازم يروح المركز قبل الساعه 11 صباحا علشان المركز يقدر يصلح السياره والعميل يخرج بيها في نفس اليوم
انا استغربت من الكلام علي الكافتريا اللي في مركز الهرم طيب الناس اللي راحت هناك ممكن حضرتك تقول اخر مره روحت المركز امتي
مش معني كلامي اني بقول ان التوكيل زي الفل لأ في اخطاء وفي تقصير بس في نفس الوقت في حاجات كويسه
بالنسبه للعملاء اللي عندهم مشاكل متكرره في الوكيل ان شاء الله انا معاكم وهاقولكم علي طريقه الحل خطوه بخطوه
واللي عنده مشكله انا تحت امر الجميع
بالنسبه للصيانه وفلوسها في فرق يا جماعه بين تكلفه العماله اللي هي المصنعيه وتكلفه الكشف انا عارف ان الكلام دا هايزعل بس انا هاوضحه بس انا مش مسؤل عنه انا مجرد بعمل توضيح
يعني دلوقتي حضرتك حاسس ان فيه مشكله في العفشه هاتروح المركز فيه فلوس كشف علي العفشه هاتقول السياره في الضمان هاقولك فيه قطعه غيار بايظه هاغيرهالك في الضمان بس فيه فلوس كشف ومصنعيه العميل هايتحملها سواء الكشف قال ان العفشه سليمه او غير سليمه
بالنسبه للضمان ياريت كل عميل يراجع كتاب الضمان كويس هايلاقي ان في حاجه يشملها الضمان وفي حاجات لا يشملها الضمان ودي موضحه بالتفصيل الممل في الكتاب
بالنسبه للعملاء اللي عندهم مشكله في طريقه تعامل المهندسين والفنيين اللي عنده مشكله يقولها وانا هاقوله علي الطريقه الفعاله ان العميل ازاي ياخد حقه وكلنا اكيد عايزين التوكيل يبقي احسن علشان لما نروح المره الجايه نلاقيه افضل وان شاء الله هانزل موضوع عن مراكز الصيانه وقطع الغيار اللي موجوده في مصر كلها وكل عميل ممكن يروح لمركز القريب منه وهاكتب كل مركز ايه هي العيوب اللي ممكن يصلحها
بالنسبه للعملاء اللي عندهم مشاكل متكرره في السياره برضه انا هحاول احلها علي قد ما اقدر
انا اسف جدا طولت عليكم وياريت دمي مايكونش تقيل عليهم
وفي الاول والاخر انا عضو زي زيكم في المنتدي وبزعل اوي لما اشوف اي مشكله مع التوكيل وان شاء الله كله هايتحل وشكرا