الموضوع: ترخيص الجين بالتفاصيل المملة..!!!

السلام عليكم...

اليوم و الحمد لله تمت إجراءات الترخيص و علقت النمر الجديدة ولله الحمد.

الموضوع كان بفضل الله متيسر جداً ولم يأخذ سوى ساعة ونصف فقط أو أقل والغريب أن المصاريف كانت أقل من المتوقع والحمد لله. (رخصت سنة واحدة فقط لقلة الفلوس رغم أنني شاري نقداً يعني بدون حظر بيع وخلافه).

وصلت مرور النزهة قبل 9:30 وكانت الدنيا رايقة جداً (اليوم الأربعاء) وبعد السؤال والاستعلام هذا خلاصة ما تم:

1- شراء الأوراق من الخزينة بعد ذكر أنها سيارة جديدة وأن الترخيص لمدة سنة فقط: 23 جنيه + ألف مبروك = < 25 جنيه >.

2- تصوير البطاقة + شراء ملف: < 1.5 جنيه>.

3- خرجت الى الخارج و عملت التأمين الإجباري من أحد الأكشاك (وثاق للتأمين التكافلي) عن سنة واحدة فقط: < 80 جنيه >.

4- اخترت مهندس من اللي عاملين دوشة برة دول وبعت معايا عامل لرفع البصمة وقعد ساعة يرفع رقم الموتور: < 5 جنيه للعامل >.

5- رجعت للمهندس ختم وشخبط شوية وكان حيكتب اللون فيراني -(يععع)- بس أنا قلتله إكتبه رمادي علشان بقرف من كلمة فيراني دي !! وقدكان.... بعد ألف مبروك: <برضه 5 جنيه هو أحسن من العامل في إيه يعني؟؟ >

6- ما تنساش الختم الثالث على نموذج الفحص علشان ماتروحش الشباك وترجع تاني... نبه على المهندس ان كل رقم في الورقة لازم يكون عليه ختم.

7- اشتريت الطفاية (ودق رقم الشاسيه عليها) وختم لي نموذج الطفاية –اللي كان مع الورق اللي اشتريته من الخزينة-: < 121 جنيه >

8- دخلت على الشباك وقدمت ورق السيارة (عقد بيع من ألفا عز العرب لعز العرب و عقد من عز للعبد لله و شهادة الإفراج الجمركي المغلفة اللي شبه شهادة الجيش وصورة الإفراج اللي فيها عربيات كتير) و النماذج وصورة البطاقة وورق التأمين وبعد ادخال البيانات أخذت ورقة بها قيمة الضريبة (30ج الضريبة+175ج رسوم+14.2ج رسم إصدار+115ج قيمة اللوحات الجديدة +30 تأمين اللوحات).

9- الخزينة مرة أخرى: دفعت الضريبة: < 364 جنيه > ( والمرة دي الراجل أخذ الجنيه من نفسه من غير ألف مبروك ما احنا بقينا عشرة و معرفة قديمة بقى).

10- رجعت للشباك وأعطيتهم الايصال وقالل لي بابتسامة عرييييضة : أي خدمة تاني؟؟؟؟ طبعاً قلت له لأ شكراً (ده احنا واقفين وسط الناس عاوزني أديله فلوس ازاي ده؟؟؟) المهم.. الابتسامة فقدت في ظروف غامضة وراح كاتب على الملف رقم اللوحات (الحمد لله مالهوش معنى) وقل لي اتفضل استنى هينادوك (طبعاً من غير ابتسامة).

11- بعد دقائق قليلة جداً سمعت عسكري بينادي على اسمي وأخذ اللوحات والرخصة وطلعنا معاه أعطاهم للمهندس و المهندس وزعهم على العمال وتم تركيب اللوحات في دقيقتين و الحمد لله < طبعاً 5 جنيه للعامل >

12- رجعت للمهندس أخذت رخصتي منه و أكد علي إن أتأكد أن اللوحتين نفس الرقم... وبس خلاص.. مشيت بالسلامة و الحمد لله.

إجمالي المدفوع بالفكة و البقشيش:

25+1.5+80+5+5+121+365+5= 607.5 جنيه بالتمام و الكمال

ملاحظة:

1- هو مش حقد ولا حسد بس الموظفين اللي في المرور دول لو ما بياخدوش أي مرتب خاااالص أكيد دخلهم أكبر من دخل وكيل وزارة !!!

2- جوانب ايجابية نذكرها شهادة لله: الحمد لله لم أنتظر في أي طابور, و المرور نظيف ومكيف و التعامل محترم –والحق يقال- و حتى لو لم تدفع أي بقشيش فالأمور لن تتعطل ان شاء الله.

3- المشوار كله رايح جاي تم بفضل الله في ساعة وخمسين دقيقة تقريباً.

4- لا أعرف لماذا بعض الزملاء قالوا أرقام تتراوح مابين 700 و 800 جنيه ؟؟ ربما لأنهم شاريين قسط فالضريبة أو التأمين أعلى؟؟

5- لم يتم ذكر المثلث و لا شنطة الاسعافات من قريب أو بعيد.. وبصراحة لم أشتريها..

إدعوا معايا لجينيتي ربنا يحفظها من العين ومن الناس المؤذية ومن عيوب الصناعة و السواقة و الركن ومن عيوب العيش في القاهرة... آمييييين

وعقبال عندكم

--------------
نشكرك على الموضوع المفيد .. يتم اضافته لاهم الموضوعات

مشرف القسم ب8