الموضوع: استلمت ورخصت اللوجان مع ملاحظات سريعة

ألف مبروك.....و ربنا يعطيك خيرها و يكفيك شرها و تعيش و تصلح ورا أولادك

الف مبروك وربنا يعطيك خيرها ويكفيك شرها ويباركلك فيها
اللوجان تصل لافضل اداء بعد 3000 كيلو وبتتحسن اكتر مع الوقت
بالنسبة للنتشة ... قلل درجة التبريد درجة واحدة ماتخليهاش على اقصى درجة تبريد
خليها على الدرجة قبل الاخيرة (درجة التبريد وليس سرعة المروحة) والنتشة حتختفى حتى الصيانة وتقولهم عليها

الف مبروووووووووووووووووووك ربنا يباركلك فيها

10-حاسس ان المرايات الكهرباء الخارجيه تثبيتها فى بلاستيك ضعيف ونوعه ردئ وتقفيله برده ردئ.

اطمن يا فندم انا خبط المرايا على سرعة 30 كيلو والمرايا لسه فى مكانها كل اللى حصل إيه تخيل الcover اللى ورا اللى بلون العربية اتكسرت حتة منه والأزاز اتشرخ بس المرايا لسه فى مكانها وشغالة كمان الحمدلله :)
دا غير انه المرايا متصممة انه يكون فيها ليونة يعنى حتى لو اتخبطت عكس اتجاهها هتلاقيها بتمشى شوية عكس الأتجاه عشان ما تتكسرش لو كانت ثابتة فى مكانها

12- لازم ترزع الباب جامد علشان يقفل.

قولهم عليه فى زيارتك للتوكيل لأنه الباب بيقفل لوحده من اول لمسة زى باب التلاجة

13- حاسس ان الصاج ضعيف جدا وشاكك اصلا انه صاج وده طبعا لانى بقارنها باللادا وال 131 و 504 وحتى المازدا اللى معايا يعنى حاسس ان العربية لو اتخبطت الرفرف هايتكسر زى الزجاج مش ها يتنى ويترد سواء على البارد ولا الساخن وانا عارف ان كل العربيات الحديثة صاجها تعبان وده تقريبا لانه السياسة العالميه فى السيارات هى الاستبدال بدلا من الاصلاح .

مش عارف الوضع بالنسبة للرفارف بس هو فى هنا تجارب للأعضاء لخبط الأكصدامات وكانت الحمدلله النتايج مزهلة والأكصدامات ما اتأثرتش خالص والعربيات التانية اتأثرت
هو مش حكاية استبدال بدل من الأصلاح بس هو الشركات كلها بتتجه انها تصنع الهيكل من مواد معالجة وخفيفة من الناحية الهندسية دا مفيد فى حاجتين بيقللوا ثمن المواد المستخدمة وبما ان المواد دى كثافتها بتبقا خفيفة فدا بيدى العربية سرعة مع جهد اقل يعنى بتوفر بنزين وبتديك سرعة افضل

ملحوظة بلاش تشغل التكيف قبل 1000 كيلو :)

تحياتى

المشاركة الأصلية كتبت بواسطة waleedfadeel

الحمد لله بعد انتظار شهرين استلمت اللوجان فضى فول اوبشن من الشركة المصرية العالمية للسيارات بأسوان
بعد الاستلام اخر النهارطلعت على البنزينه فى طريقى للبيت وضبطت الاربع فرد على 30 وكان الكاوتش ضغطه 45 وكمان فولت بالمرة بنزين 90 .
تانى يوم اشتريت النماذج وفحصت وتالت يوم خلصت الاجراءات الروتينية واستلمت الرخصة (على فكرة النظام كده فى اسوان ما ينفعش الفحص يكون فى نفس يوم تخليص الاجراءات لان الفحص فى مكان بعيد عن مكان الاجراءات ولازم تستنى يوم لغاية ما نتيجة الفحص توصل للمرور الرئيسى.
التكلفة الكلية للترخيص 1306 جنيه شاملة ثمن النماذج والضرائب والتامين الاجبارى والطفايه والمثلث والشنطة.
انا استلمت العربية وعليها اللاصق الابيض وكانت لسه نازله من الونش القادم من القاهرة بترابها وانتظرت لما نظفوها و بصراحة لم افحص اى شيئ الا فى البيت لانى واثق فى سمعة الشركة فى اسوان ووجدت كل حاجة سليمة (العدة – الاستبن4 - كتيبات ( الضمان والصيانة والتعليمات والراديو) بالاضافة الى اوراق العربية اللازمة للترخيص.

ملاحظات سريعة على العربية لانى مشيت بيها 60 كم فقط مشوار الترخيص ومشوارين بعد الترخيص
1- عزل العربية رائع.
2- لا توجد اى مشكلة فى الغيارات ومن كترة ما سمعت عن مشكلة المارشدير بقيت اجيب مارشدير واقول اكيد ما جاش لانه لا يمكن يكون سهل كده وبعدين ادوس بنزين الاقى العربية رجعت فتأكدت انه ما فيش أي مشكله فى المارشدير.
3- مش حاسس باى سخونه عند الدواسه بالرغم من انى عملت المشوار التانى بالشبشب مخصوص.
4- تصميم وضع الازرار رائع وخصوصا الكلاكس اللى الواحد بيستعمله بأى صباع من اليد الشمال من غير ما تحرك ايدك نهائيا من على الدريكسيون لدرجة ان كان جنبى قريبى قاللى هى بتزمر لوحدها ولا ايه انا ماشفتكش حركت ايديك ولا عملت اى حاجة.
ازرار التحكم فى الزجاج الخلفى طبعا انا مبسوط جدا انها قريبه منى علشان الاولاد كانوا مجننى فى فتح الزجاج والتلويح باليد خارج العربية وكان لازم اقولهم اقفلوا الزجاج واستنى رد الفعل وابقى مش مركز فى الطريق دلوقتى اتدخل فى الوقت المناسب واقفل الزجاج بنفسى.
والروعة ايضا ان اى واحد فى الكرسى الخلفى يقدر يوصل ايضا لمكان زراير الزجاج بسهوله ومش محتاج يقولك افتحلى الزجاج وده اللى عملوه الاولاد فتحو وقفلوا لوحدهم.
5- انا لن اتكلم على صوت الموتور ومعدل الاستهلاك لاننى لسه بلين مع ملاحظة صوت عالى عند الغيار الثالث او الرابع مش فاكر بالضبط.
6- الساعة 3 العصر وانا ماشى فى الشمس ودرجة الحرارة حوالى 43 فى اسوان وداخل العربية انا قدرتها فى حدود 60-70 على فكرة احيانا تصل الحرارة الى 125 درجة اسفل زجاج التابلوه فترة الظهيرة حسب المدة التى ركنت فيها العربية فى الشمس (ده كلام علمى ومسجل ومصور وعاملين عليه تجارب وابحاث لمن يريد التأكد ) كان التكييف ممتاز ولما طلعت مطلع وكانت السرعة بطيئه جدا بدأت تننش كام مرة والسحب ضعف جدا لدرجة انى اضطريت اطلع على الاول، وهما فعلا قالولى العربية بيبقى شحن الفريون عالى وروح ظبطة عموما انا مش عايز استعجل لحد ما اعمل 1000 كم واتابع التكييف واشوف لانه كان مظبوط على السرعات العادية والارض الممهدة فى نفس الدرجة الحرارة و اخر النهار كان ايضا كويس وما عملش اى مشاكل.
7- سمعت صوت مروحة التبريد شغالة بعد قفل العربية وركنها وده اسعدنى لان العربية اللى كانت معايا المروحة ماتشتغل الا لو المفتاح فى الكونتاكت وبالتالى تفضل العربية سخنه لغاية ما تبرد بفعل حرارة الجو اللى درجة حرارته 43 درجة.
8- اربع شرط ثابتة دائما للحرارة بس مش عارف هل ده مثالى ولا فيه احسن من كده ومكتوب فى الدليل الخطوره لما توصل لغاية اخر اربع شرط فى المقياس.
9- الغطاء القديم بتاعى مغطى نصفها وعايز اشترى واحد جديد ودواسات وياريت الاخوة من اسوان يفيدونا لو كان ليهم تجارب.
10-حاسس ان المرايات الكهرباء الخارجيه تثبيتها فى بلاستيك ضعيف ونوعه ردئ وتقفيله برده ردئ.
11- حاسس ان مقبض فتح الباب الداخلى ضعيف جدا وخايف يتكسر فى ايدى وخصوصا مع الاولاد لانهم ياما كسروا وخلعوا مقابض.
12- لازم ترزع الباب جامد علشان يقفل.

13- حاسس ان الصاج ضعيف جدا وشاكك اصلا انه صاج وده طبعا لانى بقارنها باللادا وال 131 و 504 وحتى المازدا اللى معايا يعنى حاسس ان العربية لو اتخبطت الرفرف هايتكسر زى الزجاج مش ها يتنى ويترد سواء على البارد ولا الساخن وانا عارف ان كل العربيات الحديثة صاجها تعبان وده تقريبا لانه السياسة العالميه فى السيارات هى الاستبدال بدلا من الاصلاح .


موقف محرج: وانا واقف طابور بالعربية مستنى دورى فى الفحص طفيت العربية وسحبت المفتاح وبعدين الطابور اتحرك ادخلت المفتاح وحاولت ادور المفتاح مالفش جربت تانى وثالث وطلعت المفتاح ودخلته تانى وقفلت العربية وفتحتها بالريموت ومافيش فايده المفتاح مش عايز يلف والناس ورايا عايزه تتحرك وانا كل اللى فى دماغى ده امبولايزروتكنولوجيا واكيد المشكله عويصه وايه الغلط اللى انا عملته وكان مالها العربية القديمه ماانا فاهم فيها كل حاجة، فتحت الكتيب التعليمات وقرأت فى بند الامبولايزروما لقيتش اى حاجه غلط، وافتكرت انهم اعطونى رقم موبايل مهندس الصيانه بأسوان فاتصلت بيه وقلت له على الوضع فكر زى بالضبط وقاللى اعمل نفس الحاجات اللى عملتها وسألنى اذا كان المفتاح وقع على الارض فأجبته بالنفى واحتار واخيرا قاللى حرك الدريكسيون وقبل ما انفذ قلت بس هيه دى ماهى العربية القديمة المازدا بتعمل كده برضه علشان الامان والدريكسيون مايلفش الا بالمفتاح وبيكون احيانا الدريكسيون محشور وبيخللى المفتاح مايلفش، وانا اللى كنت فاكر انه امبولايزر وتكنولوجيا والحمد لله دارت العربية وضحكت.


اخيرا ترددت فى الكتابه لان تقريبا الكلام ده مكرر ولكن عدلت عن ذلك لسببين
الاول: انى دائما باخد معلومات مفيده جدا من الاخوة الاعضاء منذ اشهر فقلت لنفسى حتى لو فيه نصف معلومة جديده يبقى خير وانا مابحبش اخد من غير ما اعطى.
الثانى: سبب علمى وهو ان ذكر المعلومة من اكثر من مصدر حتى لو كانت مكررة يقويها ويدعمها ويعطيها المصداقية ولا تكون مجرد انطباع لشخص بعينه.

بداية الف مبروك على السياره اللوجان
طبعا اول شئ تروح تعمله انك تروح لمركز الخدمه فى اسوان( اكيد عارفه ؟) و تخليه يشحن لك الفريون مش حياخد 10 دقائق و مش حيبقا فيه نتشه تانى و حيتظبط التكييف تمام التمام انا عملت كده ...
موضوع الغطا انا جبت غطا من القاهره ووتر بروف مقاسه لارج و مغطى العربيه بالكامل
موضوع المارشدير موجوده العضه انا متعايش معاها تبان قوى اول ما تدور العربيه و تدى الغيار الخلفى بس لو اديت الخامس الاول و بعديها مارشدير ما تحس بيها
انا رحت عملت الصيانة بتاعت ال 5000 هناك فى مركز الخدمه و شيكت على السوائل كلها و تربيط العفشه وكمان ركبت وحدات رفع للابواب هناك
العربيه حتى الان ممتازه و مفيش اى شكوى بالنسبه لى حتى الان و ان شاء الله ربنا يديلك من خيرها و يكفيك شرها

1000000000000000 مبروك