نداء الى كل من يعمل بالبورصة .... مش عايز تفكر شوية ؟

**ahmed4000** · 11-07-2010 05:46 PM

المشاركة الأصلية كتبت بواسطة tlrsiap

الأخ ahmed4000 , , و يمكن انا كل اللي اعرفه يعتبر من اللي باسمعه من الناس اللي شاركت في البورصة , و أغلبهم متفقين انهم بيخسروا بشدة , طب انا عايز اعرف , ليه الكل تقريبا بيخسر ؟

المشاركة الأصلية كتبت بواسطة MaZaGAngeE

حاجة أخيره اللي بيكسب مش هيقول انه بيكسب بس اللي بيخسر بيملى الدنيا عياط

الرد بالاعلى اصدق رد...للاسف عمرك محتقعد مع حد ويقولك كسب ابدا من البورصة دى ثقافة عامة فى المجتمع...اسال كده اى مهنى او صاحب مشروع عن ارابحه حيقولك ايه؟؟؟ والله مش زى مانت فاكر والدنيا واقفة ومفيش فلوس

ودى حاجة غريبة حتخلينى اسال ببساطة : لو البورصة وحشة اوى كده

طيب الناس قاعدين فيها كل ده ليه؟

بقالنا اكتر من 15 سنة البورصة مفتوحة

والناس كل سنة بتزيد عن السنة اللى قبلها

ومحدش يقولى الناس خسرانة وعايزة ترجع فلوسها لان ده نوع من الاستخفاف بعقولنا

لانى لو خسرت فى مشروع حفضل فاتحه سنة وححاول ..حصبر عليه سنتين..لكن بع كده لو فضل خسران حقفله حتى لو بخسارة....أما البورصة فالناس بتفضل قاعدة بالسنين مش عايزة تطلع

وبعدين يقولك اصلى خسران

وكلمة خسران دى لو جت تحللها ممكن تقعد تضحك للصبح:

- انا خسران....بعت السهم ب 20 جنيه وطلع ل30 جنيه بعد مبعته فانا (خسرت) عشرة جنيه
- انا خسران...كان راسمالى 100 الف من شهرين ودلوقتى بقى 50 الف...ولما تساله ودخلت البورصة اصلا بكام يقولك 30 الف

-انا خسران السهم من شهر كان ب50 جنيه ودلوقتى ب20 جنيه وقبل متعيط تعاطف معاه تكتشف انه كانشارى السهم ب15 جنيه من الاساس

- انا خسران السهم كان ب700 جنيه ودلوقتى ب7 جنيه

وتكتشف ان السهم ده معمولله حاجة اسمها تجزئة وان ال7 جنيه ممكن تكون تساوى الف جنيه فى الواقع

-طبعا فى اكيد ناس خسرانة خسارة حقيقية مش حنكر..بسب السؤال المعتاد اللى بساله لكل واحد فى السوق لو انت خسران 50% من فلوسك ده حصل ليه؟ مع ان قلنا ان السهم لا يسمح له بالانخفاض اكتر من 20% فى اليوم الواحد ..طيب حضرتك مبعتش ليه أول يوم عند نزول السهم 20%..يقولك قلت يمكن يطلع بعدين... ولما ينزل 20% كمان و20% تالتة يفضل مستنى الامل وبعدين ميخسر 60% يقولك ابيع...طيب حد منعك انك تبيع من الاول؟ وطبعا مميلومش نفسه على قراراته الخاطئة ويبدأ يلوم اى حد تانى غير نفسه

من الاختراعات اللى الناس ماسكة فيها كلمة "الميكر" وده المفروض شخص بيتحكم فى الاسهم ويطلعها وينزلها

كل السوق ماسك فى كلمة "الميكر" كسبب لهبوط السوق...

طيب برده الرد ببساطة لو الميكر بيتحكم فى السهم وانت فاهم كده كويس وقارى الشاشة وشايف ان الميكر بيطلع السهم ...مبتشتريش معاه ليه

ولما تقرا انه بيحاول ينزل السهم...مبيبتعش معاه ليه

ولو السهم كويس وهو بيحاول ينزله ...مبتشتريش انت ليه

ولو السهم وحش وبيحاول يطلعه...مبتبعلوش السهم ليه

يعنى ليه دايما المستثمر شايف الفخ وبرده بيصمم يوقع نفسه فيه وبعدين يرجع يعيط

الخلاصة البورصة ده عالم كبير وتجارة محتاج فهم وتدريب مكثف...لو بذلت مجهود واتعلمت كويس زى محتعمل قبل متدخل اى مشروع ...ممكن تكسب دهب

لكن لو دخلت كده بالبركة حتتخبط طلوع ونزول وحتشيل خسائر محترمة وحنلاقيك قاعد بتقول"ماجد شوقى هو السبب...شهادات الايداع هى السبب...المؤشر هو السبب...الميكر هو السبب" ومفيش مرة حنسمعك بتقول "انا السبب"

**amir** · 11-07-2010 05:57 PM

المشاركة الأصلية كتبت بواسطة ahmed4000

الرد بالاعلى اصدق رد...للاسف عمرك محتقعد مع حد ويقولك كسب ابدا من البورصة دى ثقافة عامة فى المجتمع...اسال كده اى مهنى او صاحب مشروع عن ارابحه حيقولك ايه؟؟؟ والله مش زى مانت فاكر والدنيا واقفة ومفيش فلوس

الخلاصة البورصة ده عالم كبير وتجارة محتاج فهم وتدريب مكثف...لو بذلت مجهود واتعلمت كويس زى محتعمل قبل متدخل اى مشروع ...ممكن تكسب دهب

لكن لو دخلت كده بالبركة حتتخبط طلوع ونزول وحتشيل خسائر محترمة وحنلاقيك قاعد بتقول"ماجد شوقى هو السبب...شهادات الايداع هى السبب...المؤشر هو السبب...الميكر هو السبب" ومفيش مرة حنسمعك بتقول "انا السبب"

متفق معاك لكن مختلف تماما في اللي تحته خط
انت شايف انه مخربش البورصه حتي و هو مرفود منها الي غير رجعه بسبب اسلوبه المريب و قراراته العنجهيه؟
و شهادات الايداع الدوليه ملف قذر هو و فئات المستثمرين و ده واضح وضوح الشمس
و المؤشر و ما ادراك ما المؤشر كارثه بتنفجر فينا كل فتره بسبب شهادات الايداع و اسلوب حساب الاوزان النسبيه و مجموعه افلام نجيب ساويرس
اما بالنسبه للميكرز فلو مش مقتنع انه موجود دي حريتك الشخصيه
و قصه الحديد و الصلب المصريه اللي ماجد بيك متورط فيها حتي اذنيه مش منسيه و اسلوب الايقافات و القرارات العنتريه و باقي مصايبه اللي ملفاتها ممكن تتفتح و ممكن لأ

**ahmed4000** · 11-07-2010 06:11 PM

2- المؤشر

المؤشر بيقيس اداء السوق صح؟

طيب ازاى المؤشر يخلى السوق يطلع او ينزل؟
لو انت بتقول المؤشر مبنى غلط (طيب ايه الصح) بالرغم ان المؤشر اللى عملاه داو جونز ودى مؤسسة دولية واخد نفس الطريقة؟؟؟؟؟

- طيب ازاى بنوك دولية مطلعة ادوات مالية على المؤشر ده بس...يعنى هما مش عارفين انه وحش؟ ولا الناس دى بتهرج ولا بتجامل ماجد؟

- المؤشر مش ماجد اللى عمله ...لانه معمول من 2002

- المؤشر كان موجود بنفس الطريقة من 2004-2008 وكان الناس مبسوطة وساكتين..لما السوق ينزل بقى المؤشر وحش؟

- طيب ولما عملوا المؤشر 70 و100؟ حصل فرق؟ السوق نزل برده؟ بالعكس فى اوقات ال30 بيبقى طالع وال70 نازل

-اى حد بيشتكى من المؤشر بقوله لو مش عاجبك متبصش عليه هو حيضرك ازاى؟ يقولى بيخلى الاسهم التانية تنزل؟ طيب وايه اللى يخلى المستثمر اللى معاه سهم يبيع السهم لما يلاقى مؤشر مبيقيسش حركة السهم بتاعه بينزل؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟

- السؤال التقليدى...تفتكر الرئيس الجديد او اى رئيس بورصة تانى حيلغيه؟

**ahmed4000** · 11-07-2010 06:13 PM

3- الميكرز
مقلتش انهم مش موجدين ..بس قلت لو انت ببساطة شايف عدو قدامك بينصبلك فخ..ليه بتوقع نفسك فى الفخ...ليه مبتوقعوش هو...او على الاقل تعمل زيه

4- الفساد ده الله اعلم بيه ومقدرش ارد عليه طالما معنديش معلومات عنه

والخلاصة

ادى الرئيس الجديد جه ونتقابل بعد كام شهر ونشوف الدنيا عاملة ازاى

**hesham_tawfiq** · 11-07-2010 06:25 PM

فى الحقيقه انا متفق تماما مع الاستاذ احمد ماجد شوقى :-)) رغم انى مش مستثمر ولامضارب فى البورصه ولا فى اى سوق :-)

بس فعلا الناس فى مصر معندهاش ثقافة البورصه

ممشينها بركاوى زى اى حاجه تانيه فى حياتنا

**تامر.محمد** · 11-07-2010 06:29 PM

المشاركة الأصلية كتبت بواسطة amir

الامثله مش صح
غسيل الاسنان من النضافه الشخصيه و الرسول صلي الله عليه و سلم قال لولا شددت عليكم لأمرتكم بالسواك قبل كل صلاه
يبقي غسيل الاسنان يعتبر سنه
و كذلك تسريح الشعر
انا مش فاكر الحديث لكن محرم علينا الخروج مشعثي الرأس

هاقول لك حاجة , على فرض ان الامثلة غير صحيحة , لكن اظن ان المضمون وصل
و بخصوص موضوع غسيل الاسنان , السؤال المباشر , هل تأثم لو لم تغسل أسنانك ؟ فيه القول الفصل
:)

انا كمان بصراحة اول مرة اعرف موضوع الخروج مشعثي الرأس ده, أشكرك
:)

**amir** · 11-07-2010 06:29 PM

انا فرحان ان انا و انت بنتناقش المره دي
اولا انا مش لسه هشك انك احمد ماجد شوقي انا متأكد خلاص !
بالنسبه لشهادات الايداع و طلوع السوق قبل كده ده ببساطه لأنها مخليا السوق عندك تابع ذليل لاوروبا و امريكا و الناس مكنتش فاهمه لغايه ما ريحتها فاحت و احلي شغل فاسد بيتلعب عليها
اربيتراج كما انزل اللي شرط وجوده تواجد سلعه واحده بسعرين في وقت واحد و الله ينور علي ماجد بيك و سنينه و فرحان بيها قوي ساعه ما راح يروج ليها في مؤتمر بورصه لندن
و انهي اسهم مودعه فيها؟
الاسهم ذات الوزن النسبي الكبير في مؤشر البورصه الرئيسي
و بورصه لندن بتشتغل من قبل ما سوقنا يفتح و بعد ما يقفل بكتير و الشرا من ناحيه و البيع في التانيه سهل و متيسر لكل فاسد في البلد
اما بخصوص مؤشر ال 70 و ال 100 فدول ذر رماد في العيون و تكمله للمسلسل الهزلي
طيب ال 70 بيقيس اداء الشركات الصغيره
طيب فايده مؤشر ال 100 ايه بالذمه؟
امتي مؤشر ال 100 مكانش نسخه كربون من مؤشر ال 30
و خد بالك ان مؤشر ال 30 ذات نفسه فيه شركات تانيه غير الاوراسكومات و التجاري بس الاوزان النسبيه مخليه السوق كله تابع للكام شركه دول
و لما العالم دخل في ازمات ماليه اتكشف الستار عن الفساد اللي كان مداري في وسط السوق لأن الفسده اتسرعو اكتر من اللازم و هاتك يا سرقه عيني عينك
و موضوع الحديد و الصلب المصريه لما طلع ماجد بسلامته يقول انها هتشطب من قواعد القيد و الناس باعت بخساره فادحه و جه نفي الموضوع بحجه من حججه اللامتناهيه و السهم انطلق بمباركه رئيس بورصه فاسد في واحده من اخطر الجيمات اللي بيتباهي سيادته بالكشف عنها

و مؤشر البورصه لما بينهار للاسباب دي كلها لازم الناس تبيع و تحاول تحد من الخساير ولا ايه؟

-

-

-

الموضوع: نداء الى كل من يعمل بالبورصة .... مش عايز تفكر شوية ؟

LinkBack

أدوات الموضوع

عرض

-

-

-

-

-

المواضيع المتشابهه

سؤال عجيب شوية : ماتور جاز يعمل كام دلوقتى !!!؟

شوية عربيات كروم...والفاضي يعمل قاضي...

بيك بالموصافات دي يعمل كام cbr 400 model 94 في شوية شغل

الكلمات الدلالية لهذا الموضوع

المفضلات

المفضلات

ضوابط المشاركة