أعزائي السيراتوية أقدم لكم بومبو!

**EhabNoor** · 13-07-2010 07:25 PM

المشاركة الأصلية كتبت بواسطة sherif2net

أيهاب ممكن تقولنا نوع الكاميرا والشاشه ايه (السيستم كله يعنى) عشان لما جيت اركبهم هنا فى مصر لاقيت الموضوع مش auto يعنى لازم تجيب الشاشه على مود الكاميرا الأول فحسيت انها شغلانة بصراحة ..... بس انت كدة رجعتلى الأمل من تانى...

مساء الخير يا استاذ شريف ، هي الكاميرا نوعها مش معروف و في منها أنواع كتير جدا لأن الراجل طلعلي ييجي 20 مراية كل واحدة نوع و شكل مختلف ، في منها في بلوتوث بس و منها بيشغل كل أنواع الملتيميديا من غير بلوتوث (فيها مدخل يو اس بي و ميموري كارد) و منها لا في ده و لا ده و مجرد شاشة بتشتغل علي الـ Auto ريفيرس ..

هي بس العملية محتاجة راجل شاطر في تركيب الأكسيسوريز و خاصة النوع ده ، لأني انا كنت فاكر الموضوع قصة طويلة لكن الموضوع كله مع صنايعي شاطر إن شاء الله ياخد بالظبط نص ساعة أو 45 دقيقة بإذن الله..

هي فكرة عمل الكاميرا كالآتي:
أولا - الشاشة: و دي بتكون عبارة عن شاشة عاكسة في منها مقاسات (انا اخترت 7 إنش النوع اللي بيشغل ملتيميديا و في مدخل يو اس بي و ميموري كارد) و دي بتركب فوق المرايا بتاعة العربية و السلك بتاعها بيدخل جوه السقف بتاع العربية عشان ما يبانش منه اي حاجة و من غيرما الصنايعي يفك مسمار واحد (زي ما قلت الموضوع محتاج واحد شاطر) ..

بعد كده بيمد السلك ده بعرض السقف لحد القايم و برضه من تحت البلاستيك اللي بيغطي القايم من غير ما يبان برضه لحد علبة الفيوزات ..

بعد كده الشاشة بييجي معاها علبة بلاسيك صغيرة فيها التوصيلات بتاعتها و بيبقي غالبا فيها 2 Video-Out عشان واحد بيوصل للكاميرا اللي بتركب و را (و دي دورها في الشرح إن شاء جاي بعدين) و التاني بيبقي موصله في الـ ديفيدي (لو عندك ديفي دي) .. انا عشان عندي دي في دي الراجل قالي انا هوصلك الـ Video-Out التاني مع الـ دي في دي اللي عندي في مسند الكرسي بحيث لو الـ دي في دي اشتغل ورا ممكن اتفرج قدام ده لو انا عاوز اتفرج لو مش عاوز ممكن اطفيه) انا ما كنتش واخد بالي من الحركة الصايعة دي بس هو الحقيقة الواد كان عنده ضمير وهو كويس لأني اتعاملت معاه قبل كده في كذا حاجة ..

بعد ما بيعمل توصيلات الشاشة في علبة الفيوزات ، بيمد السلك بطول العربية عشان الكاميرا اللي بتركب في شنطة العربية من وره (فوق النمر كده) و برضه من غير ما السلك يبان (بيمد السلك تحت الفرش اللي في الأرض و تحت البلاستيك اللي بيغطي العتب.

ثانيا - الكاميرا: الكاميرا بقي بييجي معاها اسلاك التوصيل بتاعتها (الكاميرا حاجة و الشاشة حاجة و الاتنين ما بيجوش مع بعض) و خد بالك الكاميرا بالذات بيبقي في منها انواع كتير جدا جدا و معظمها بيبقي ردئ وبيتحرق بسرعة خلي بالك من الموضوع ده و كمان أهم حاجة يكون الـ Resolution بتاع الكاميرا كويس عشان تقدر تشوف كويس من غير مشاكل و من غير ما تكون الصورة مبكسلة او فيها تشويش (لازم إن شاء الله يجربهالك) ..

الكاميرا بيبقي خارج منها وصلتين وصلة بتتوصل بالسلك اللي جاي من علبة الفيوزات و اللي متوصل بالشاشة و وصلة تانية بتتوصل باللمبة بتاعة الريفيرس - و هنا الحركة - هو ده اللي بيدي إشارة للشاشة انها تاخد أوردر أوتوماتيك لما حضرتك تنقل علي الريفيرس موود و النور بتاع الريفيرس بينور في نفس الوقت و الشاشة كمان و كل ده تقريبا بيتم طبعا في جزء من ثانية ..

طبعا توصيلات الكاميرا كلها بتكون من تحت الفرش بتاع الشنطة (الجزء اللي فوق) عشان برضه ما فيش أي اسلاك تبان ..

بالنسبة للأنواع و الله انا مش عارف بالظبط نوع الحاجة اللي عندي بس انا خليت الراجل يشغلي ييجي 10 انواع كاميرات لحد ما نقيت اللي انا عاوزه و عامة انا بحتفظ بالعلب و إن شاء الله هبقي ابص علي النوع واقولك بإذن الله ..

اتمني اني اكون شرحت كويس لأني حاسس اني طولت ، بس ده لأني عاوز اشرحلك كل حاجة بالتفصيل ..
انا طبعا مش خبرة في الكهربا و التوصيلات و ممكن اكون شرحت حاجة غلط بس انا واثق إن شاء الله إنكم هتفهموا قصدي ..

حاجة أخيرة ممكن تفتكر من طول الشرح ان الموضوع رخم و ما يستاهلش وجع الدماغ ده بس انا عاوز اقولك حاجة و الله من غير مبالغة ، الوقت اللازم للتركيب لو تم بالطريقة الصح اللي شفتها قدام عيني و الراجل بيشتغل في عربيتي مش هياخد أكتر من 45 دقيقة ، انا بس عذبت الراجل عشان قعد يجرب كاميرات كتير و يفك و يركب لأنه جابلي كذا كاميرا كانوا بايظين و فضلت مستني شوية لحد ما جاب الكاميرات من المخزن ، قعدت حوالي ساعة و نص مع التركيب مع كل حاجة ووقت الانتظار كمان .. بس صدقني الموضوع يستاهل تجرب ..

و آآآآآآآآآآآسف علي الإطالة ..

**EhabNoor** · 13-07-2010 08:04 PM

أنا لقيت نوع الشاشة mp5 و نوع الكاميرا للأسف مش معروف لأني ما خدتش العلبة بتاعتها بس زس ما قلت في ييجي 1000 نوع اختار الأوضح و حاول تاخد فترة ضمان كده مثلا بتاع 6 شهور و لا حاجة لو لا قدر الله حصل حاجة و خلي بالك من الكاميرا و و البواب بيمسحلك العربية او من ضغط المية لو غسلت العربية في البنزينة عشان بس ما يركزش علي المكان اللي فيه الكاميرا لأنها ممكن تلف و لا حاجة فتبقي الرؤية من وره مش مظبوطة (مش دقيقة يعني و كمان يا ريت بعد ما تركب الكاميرا تبقي تغطي العربية او تركنها في مكان ما يكونش في بني آدمين مؤذيين عشان انت فاهم بقي الفضول اللي بيقتل الناس اللي في الشوارع و ربنا يسترها معانا و يصبرنا

**tamernor** · 14-07-2010 11:02 AM

استاز ايهاب ماشا ء الله ربنا يباركلك فى العربية شغل محترم والعربية شكلها تحفة كنت عايز استفسر من حضرتك اسعار ال dvd ال ف الكراسى الخلفية كام والكاميرا
وال dvd الخلفى حسب ما فهمت من حضرتك أن بيجى فية مدخل usb يعنى لو معايا فلاشة عليها اى فيلم dvdاشغلها عية مظبوط كدا ولا انا فاهم غلط ؟

**EhabNoor** · 14-07-2010 06:48 PM

المشاركة الأصلية كتبت بواسطة tamernor

استاز ايهاب ماشا ء الله ربنا يباركلك فى العربية شغل محترم والعربية شكلها تحفة كنت عايز استفسر من حضرتك اسعار ال dvd ال ف الكراسى الخلفية كام والكاميرا
وال dvd الخلفى حسب ما فهمت من حضرتك أن بيجى فية مدخل usb يعنى لو معايا فلاشة عليها اى فيلم dvdاشغلها عية مظبوط كدا ولا انا فاهم غلط ؟

تمام كده انت مش فاهم غلط ..

هو بالنسبة للأسعار طبعا هنا في قطر اعتقد الأسعار مختلفة ، يعني انا مركب الدي في دي في المسندين بتوع الكرسي بحوالي 600 ريال يعني حوالي 900 جنيه مصري ، معرفش هل هو ده السعر و لا مختلف ؟؟