الموضوع: كل ما يخص مزايا و عيوب ال 206

السلام عليكم،

أنا عندى بيجو 206 موديل 2001 و سعة الموتور 1100 سي سي و دى ملاحظاتى عايها:

1. قطع غيار السيارة متوافرة فى السوق و لكن غالية....طبعا أرخص من الألمانى و الأمريكانى لكن أغلى من اليابانى و الكورى.


2. قائمة بأسعار بعض القطع:

- طقم الدبرياج : 850 جنيه نوعه Valeo فرنساوى.

- طرمبة البنزين غالية : تمنها 1000 جنيه.

- تيل الفرامل الأصلى الفرنساوى من التوكيل تمنه 350 جنيه. البديل الإتحاد الأوروبى ب180 بس الأصلى أحسن بكتير.

- سيرالكاتينة : 40 جنيه صنع إتحاد أوروبى.

- سير الدينامو : 110 جنيه صنع إتحاد أوروبى.

- سلك الدبرياج : 110 جنيه أصلى.

- رأس عصاية الفتيس غالية جدا حوالى 150 جنيه لكن ممكن تركب لها رأس 405 ب 30 أو 40 جنيه.

- مقص أمامى : 200 جنيه الصينى المعفن ، من 250 ل350 الأتحاد الأوروبى ، 500 ل 650 جنيه الفرنساوى.

- فلتر الزيت : الأصلى صنع فرنسا ب 50 جنيه من التوكيل...فى محلات بتبيع واحد مغربى بنفس السعر و يقولوا أنه الأصلى ده نصب....المغربى كويس برضه لكن طبعا الفرنساوى أحسن.

- فلتر البنزين : 50 جنيه.

- فلتر الهواء : 125 جنيه الأصلى من التوكيل.


3. أماكن تواجد قطع الغيار فى القاهرة:

- طبعا منافذ البيع التابعة للتوكيل.

- شارع دمشق فى الكوربة.

- المسيرى فى شارع السودان فى المهندسين و لو إن أنا مش بحب أتعامل معاه.


4. العربية ناعمة و قيادتها ممتعة جدا لما بتكون حالتها كويسة. و إتزانها كويس لحد 120 كم/س لكن بعد كده خطر لأن وزنها بيخف جامد.


5. مشكلتها إن مش أى حد يفهم فيها لازم صنايعى شاطر و أنها ساعات بتعمل دقات نقص كده لأنها طبعا بقت قديمة.


6. الأتنين اللى قاعدين قدام مكانهم واسع بالذات اللى جنب السواق لكن اللى ورا ياخد 2 بالعافية.


7. الشنطة صغيرة.

سعرها مستعمل كام؟؟؟