أسئلة عن البيجو 405 Roa لمالكيها أو لذوي الخبرة تنفع تكون عربية لبنت؟؟ ولا تقيلة أوي؟

**flower** · 24-02-2008 05:06 PM

السلام عليكم ورحمة الله وبركاته

أولا : اود شكر كل من ساهم ويساهم في بناء هذا المنتدى الأكثر من رائع،،
ثانيا: عندي استفسار،، من فترة كنت انوي شراء عربية في حدود 75000 جنيه وكان امامي اختارات كتير،، واخر اختيار توصلتله كان الأفيو،، ورحت و شوفتها بالفعل ،، لكن حذرني البعض من اسعار قطع غيارها،، غالية شوية يعني،، وانا ماكنتش ناوية احط ميزانية كبيرة لقطع غيار السيارة بصراحة،، وفي حاجة وفتني برضه وهي ان العربية الصاج بتاعها مش متين ،، يعني بسهولة لو حصل حادث لا قدر الله تحصل خسائر كتير انا مش قدها،، كحال كل العربيات الجديدة طبعا،،عشان كده عدلت عن فكرة الأفيو،،
بعد كده توصلت لاختيار البيجو 405 ROAموديل 2007،، الجديدة،، وعجبني شكلها الانسيابي البسيط،، وعجبني فيها أسعار قطع غيارها الرخيصة نسبيا ( الفانوس الأمامي في حدود 200 تقريبا)

وبالفعل رحت شوفتها في معرض بيجو وجيه أباظه على طريق مصر اسكندرية الصحراوي في الكيلو 23 بالاسكندرية ،،( انا من سكان الاسكندرية)،،

ولما شوفتها بصراحة عجبتني اكتر،، وركبتها،، لكن طبعا ما سوقتهاش،،لكن لاحظت حاجة هي ان الدبرياج والجير بوكس تقال ،،، عايزني قوة يعني،، سألت مدير المبيعات قاللي ان الحاجات دي هتتظبط طبعا قبل استلام العربية،، عن طريق تغيير الزيوت وكده يعني،،

عندي بقي شوية أسئلة ( أرجو من ذوي الخبرة بالعربية الرد عليها وافادتي سواء من مالكي العربية او اللي يعرف حد معاه العربية او حتى اللي عنده معلومات أكيدة عن العربية)......

أولا : هل العربية دي تنفع تكون عربية لبنت، بمعنى هل هي سهل التحكم فيها؟ سواقتها عموما سهلة ولا متعبة ؟؟ يعني سواقتها تشبه سواقة العربيات اللادا مثلا ولا أقرب للعربيات الحديثة زي الهيونداي مثلا؟؟

ثانيا : ايه هي المشاكل المشهورة بالنسبة للعربية دي؟؟ وهل يمكن التغلب عليها؟؟ وازاي؟؟

ثالثا : هل استجابة العربية سريعة زي العربيات الحديثة؟؟ يعني بتشد بسرعة ولا على مهلها ولا ايه؟؟ وايه أخبارها مع المطبات والذي منه؟؟

رابعا : أبعاد العربية بتخلى التحكم فيها صعب ولا لأ؟؟ عشان أنا متعودة على سواقة العربيات الضغيرة اوي،،

أرجو منكم مساعدتي في الاختيار بالاجابة على الاسئلة السابقة،،
ولكم مني خالص الشكر والتقدير مقدما،،،

**flower** · 27-02-2008 01:26 AM

معقولة مافيش حد عنده بيجو روا 405 ،،، ولا حتى يعرف حد عنده العربية؟؟؟
معقولة؟؟؟

**cpt_shawky** · 27-02-2008 01:58 AM

لأ دى مش عربية بنت وأنصحك بالدايهاتسو سيريون

السعر

1.3 M/T 76500

1.3 A/T 81000

**fahd_628** · 27-02-2008 02:06 AM

فعلا الدايهاتسو سيريون عربية ممتازة جدا جدا جدا لبنت

انا انصحك بيها و لو خايفة من الخسسائر و قطع الغيار ( مع ان قطع غيارها مش غالية اوى ) امنى على العربية

**محمد عز** · 27-02-2008 01:59 PM

اكاد اجزم وانا اقرا المقال ان الكاتب شاب وليس بنت نظرا لاستخدام بعض الكلمات التى قلما استعملتها البنات زى العربيه بتشد
اهلا بيكى يافلور ، كنت اتمنى انى يكون عندى معلومات علشان اقدر اجاوبك
بس انا لو مكانك ومعايا 75 الف اجيب ياريس هاتشباك
عربيه اكتر من رائعه وعمليه جدا

**flower** · 29-02-2008 09:30 PM

المشاركة الأصلية كتبت بواسطة cpt_shawky

لأ دى مش عربية بنت وأنصحك بالدايهاتسو سيريون

السعر

1.3 M/T 76500

1.3 A/T 81000

شكرا جزيلا على الرد،،، أنا كنت متوقعة الرد ده برضه، لكن حبيت أتأكد،،
والدايهاتسو سيريون لو هأجيبها هتبقى غالية عليا لأني لو جبتها هاجيب الأوتوماتيك،،،عشان مادام دخلنا في الصغير، يبقى أتوماتيك بقى،،
لكن عندي سؤال لحضرتك،، ليه ما اقترحتش عليا الكيا بيكانتو ،،، وايه رأيك فيها عموما ،، أنا ملاحظة ان حضرتك عاملها في التوقيع بتاعك،،،
طبعا برضه باسأل على الأتوماتيك بتاعها ياريت تقولي رأيك فيها،، ولو أي حد عنده أي معلومات عنها يفيدني،،،و لو قارنا بينها وبين الهيونداي فيرنا الأوتوماتيك،،يبقى مين أحسنمع ملاحظة ان الفرق في السعر تقريبا 7 ألآف جنيه،، وطبعا مع مراعاة الفرق في الحجم والشكل الخارجي،،،
وشكرا جزيلا مقدما،،،

**flower** · 29-02-2008 09:49 PM

المشاركة الأصلية كتبت بواسطة casber

اكاد اجزم وانا اقرا المقال ان الكاتب شاب وليس بنت نظرا لاستخدام بعض الكلمات التى قلما استعملتها البنات زى العربيه بتشد
اهلا بيكى يافلور ، كنت اتمنى انى يكون عندى معلومات علشان اقدر اجاوبك
بس انا لو مكانك ومعايا 75 الف اجيب ياريس هاتشباك
عربيه اكتر من رائعه وعمليه جدا

أهلا بيك وشكرا على الرد والترحيب،، و بالنسبة للكلمات اللي بتقول عليها فأنا كان قصدي بس ان كلامي يبقى واضح ومحدد فاضطريت اني استخدم كلمات مشهورة اللي معظم الناس اللي بيفهموا في العربيات بيقولوها،،
المهم ياريت لو في عندك صورة للياريس الهاتشباك ترفعها هنا لو سمحت،، وياريت تقوللي سعرها ،، (الأوتوماتيك)

**fahd_628** · 29-02-2008 10:08 PM

البيكانتو ممتازة بس انا بحس ان سعرها على اوى بس هية عربية ممتازة جدا و لو عاجباكى و شايفة ان سعرها كويس انصحك بيها على فكرة موديل 2008 الى هوة الشكل الجديد نزل و عليها ضمان 5 سنين او 100 الف كم ولو ان انا رأى انك تجيبى السيريون علشان حاجة يابانى و حتعيش اكتر من الكورى لو انتى مش ناوية تغيرى
و بالنسبة للفيرنا انا رأى ان الجيتز احسن منها بكتيير لأنها اوسع و اصغر فى الحجم و تقفيل كورى مش زى المصرى فى الفيرنا و طبعا التقفيل المصرى وارد فية الغلطات و انتى بنت و لازم تركبى عربية مش كل شوية عاوزة تتظبط الفيرنا مش محتاجة كل شوية تظبيط بس ممكن تقابلك شوية عيوب تقفيل كدة فى الأول

**flower** · 29-02-2008 11:56 PM

شكرا جزيلا على الرد،،، ياريت بس تديني معلومات أكتر عن الجيتز،،،يعني مميزاتها وسعرها والاوتوماتيك بتاعها،،،

**flower** · 01-03-2008 12:40 AM

شكرا جزيلا على الرد،،، ياريت بس تديني معلومات أكتر عن الجيتز،،،يعني مميزاتها وسعرها والاوتوماتيك بتاعها،،،

الموضوع: أسئلة عن البيجو 405 Roa لمالكيها أو لذوي الخبرة تنفع تكون عربية لبنت؟؟ ولا تقيلة أوي؟

LinkBack

أدوات الموضوع

عرض

-

-

المواضيع المتشابهه

السلام عليكم .... شوية أسئلة لأهل الخبرة بالنوبيرا

مين اللى قال ان اللادا عربية تقيلة

سؤال لذوي الخبرة في الميجان 2005

ايه هي انسب عربية تنفع في بلدنا؟

انا جديد في المنتدي و عندى استفسار لذوي الخبرة

الكلمات الدلالية لهذا الموضوع

المفضلات

المفضلات

ضوابط المشاركة