محتاج معلومات عن بناء المساكن لو سمحتم

**tahayt** · 15-07-2010 12:47 PM

السلام عليكم ,
يا جماعة انا بفكر ااقدم فى القرعة بتاعة الاراضى فى المناطق الجديدة اللى نازلة حاليا بس مش عارف تكلفة حفر و صب الاساسات و تكملة البناء بتتكلف كام , و طبعا الواحد قبل ما يدخل فى الموضوع دة عاوز يحدد التكلفة هيقدر عليها و لا لأ عشان الحكومة محددة جدول زمنى للبناء و الا الارض ممكن تنسحب
فلو فى حد هنا مهندس مدنى او حد بنا من قريب يقدر يقوللى تكلفة تقريبية للحفر و الاساسات و باقى الادوار
او حتى كميات الحديد و الاسمنت و الزلط لمتر خرسانة مكعب و كمية الخرصانى اللازمة لرمى اساسات 150 متر مربع مبانى
و جزاكم اللة كل خير

**hussein** · 15-07-2010 05:44 PM

عايز تعمل اساسات لكام دور و فى انهو منطقة ؟

**tahayt** · 16-07-2010 07:50 AM

شكرا يا باشا على الاهتمام هو الاساسات هتكون لبيت مكون من بدروم و ارضى و 3 ادوار مكرر
ياريت يا جماعة حد يقوللى

**hussein** · 16-07-2010 09:41 AM

انت شكلك بتتكلم على الاسكان العائلى عموما الاساسات فيها كذا عامل بيتحكم فى تكلفتها زى المكان و طبيعة الارض من حيث تركيبها و قوتها و التصميم اللى معمول ( بعنى حد بيرعى التكلفة و الامان للمنشاء و الا بيرعى الامان بس و مش مهم التكلفة فهيعمل اساسات ضخم جدا تخليك تصرف كتير)
لكن عموما انا هديك سعر متوسط انت تقدر تعمل اساسات و اعمدة بدروم بتكلفة حوالى 55 الف جنيه غير الحفر اللى بردو بيتوقف على طبيعة الارض ومكانها
بالتوفيق

**tahayt** · 16-07-2010 04:24 PM

شكرا يا باشمهندس على الرد بس يا جماعة يا ريت حد يقولى كلام مفصل شوية عن الموضوع و اية هى احتمالات تكلفة الحفر و الاساسات لانواع التربة المختلفة يعنى اية هية اسوء الظروف المحتملة و كمان بالنسبة للادوار العادية بعد البدروم هتحتاج تكلفة كام او هتحتاج متوسط كام متر مكعب خرصانة بالنسبة لل 150 متر
اسف على كثرة الطلبات بس انا محتاج للمعلومات دى ضرورى لو سمحتم

**tahayt** · 18-07-2010 04:37 PM

النهاردة سألت مهندس مدنى قاللى كلام يعقد
قاللى انى لو هبنى مثلا بدروم و اربع ادوار على مساحة 150 متر يبقى اضرب عدد الادوار فى 5 (لانة حسب البدروم دور و هذا يعادل قيمة الاساسات) يبقى كدة 750 متر تكلفة المتر 900 جنية يبقى هتتكلف 675 الف جنية
انا مش مقطنع بالكلام دة يعنى سعر تكلفة متر الشقة 900 جنية
يعنى لو فرضنا ان الارض ببلاش يبقى ارخص شقة فى مصر المفروض يكون سعر المتر 900 جنية دة لو الشركة اللى بتبيعها ماكسبتش ولا مليم كمان
طب ازاى فى شقق دلوقتى سعر المتر فيها 1000 جنية و بالتقسيط كمان
حد يا جماعة عندة كلام تانى

**yaserbasha2000** · 18-07-2010 04:56 PM

الاول بالتوفيق في القرعه مع ان الامل فيها بيكون ضعيييييييف جدا

مراحل البناء بالتفصيل في المناطق دي بيكون كالتالي

1-رسوم رخصه + تصريح حفر 2000 جنيه تقريبا ده لان الجهاز بيكون مديك نمازج معماريه معينه بتختار منها
2- تأمين حفر بيكون في حدود 6000 جنيه (25 * مساحه الارض العائلي 260 متر) المفروض ده بيسترد بعد انتهاء الاعمال
3- الحفر وده بالاتفاق مع المقاولين في المنطقه من سنه كان السعر للعائلي برده 5000 جنيه لو تربه رمليه و حوالي 13000 لو تربه صخريه وممكن تحتاج تعمل احلال للتربه لو التلربه طفله تقريبا
4- عداد مياه2500 جنيه
5-الاساسات و اللبشه في حدود 50000 جنيه
6- البدروم (عمدان + سقف + طوب ) حوالي 60000
7- الارضي و المتكرر في حدود 60000

فيه مبالغ نثريات زي مصاريف غفاره بتبقي زي اتاوه للعرب اللي في المنطقه +ممكن تحتاج فناطيس مياه وقت البناء لو الميه مقطوعه

ده اللي انا فاكره لو افتكرت حاجه تانيه هأقولك

مع العلم الاسعار دي من سنه كان الحديد 3200 و الاسمنت 550 دلوقتي الله اعلم
كمان لو ربنا كرمك في القرعه تطلع رخصه علي أد امكانياتك مش لازم تبني بدروم وارضي و تلات ادوار مره واحده
كمان تعمل حسابك في الاساسات انها تشيل دور او اتنين زياده عن اقصي ارتفاع مسموح لانه سعات بيصرحوا بدور زياده

**mahmoudysf** · 18-07-2010 06:05 PM

لو سمحت عايز اعرف القرعة دي نزلت امتى يا ريت شوية تفاصيل عن القرعة دي

**ahmed2y** · 18-07-2010 06:16 PM

المشاركة الأصلية كتبت بواسطة mahmoudysf

لو سمحت عايز اعرف القرعة دي نزلت امتى يا ريت شوية تفاصيل عن القرعة دي

يا ريت فعلا تقولنا على موضوع القرعة دة فين وتبع اية

**osoliman88** · 18-07-2010 07:16 PM

في البداية ، كنت عاوز أعرف الإعلان عن الأراضي الجديدة نزل في جريدة أيه، لأني فتحت موقع هيئة المجتمعات العمرانية الجديدة لم أجد شيئا عن هذا الإعلان

http://www.urban-comm.gov.eg/

بالنسبة لتكلفة المباني:
=( مساحة المباني ÷ 3 ) × تكلفة متر الخرسانة
يعني تكلفة الدور الواحد
= (150 ÷ 3 ) × 1000 تقريبا = 50 الف للدور الواحد تكلفة الخرسانات فقط
مع ملاحظة أن تكلفة متر الخرسانة يكون أكبر شوية من 1000 جنية في حالة البناء في المدن الجديدة
يعني أعتقد تعمل حسابك زيادة 10 أو 15 الف جنية زيادة في كل دور

أرجو أن تكون المعلومات مفيدة وبالتوفيق إن شاء الله