الموضوع: هي مش دي البريليانس جالينا يا جماعة!!!

والله يا جماعه انا مش عارف لغاية امتي هنفكر بجهل و عصبيه و ليه بنعتقد ان كل واحد جاهل و عبيط برغم انه النت و الدش مش سايبين حد عبيط .
اولا انا كتبت هنا قبل كده و قلت الصين بتصنع كل الجودات العيب مش في الصناعه الصيني العيب فينا احنا , الصين بتشوف انت عايز ايه و بكام و تصنعهولك , المشكله عندنا انه احنا سمحنا بدخول زبالة الصيني , اوروبا ما يعرفوش و ما شافوش زبالة الصناعه الصيني و اللي سافروا اوروبا يعرفوا الكلام ده كويس لان كل المنتجات هناك صيني و بجوده عاليه جدا و الكلام ده فين ؟ و الله في المانيا ام الصناعه , حتي اديداس صناعه صيني , انا كان نفسي اشتري اي حاجه حتي لو مش عايزها بس تكون صناعه الماني .
امريكا بجلالة قدرها صرحت في معرض ديترويت للسيارات 2009 ان الصين اكبر منتج للسيارات 2011 و الاخ اللي بيقول انه في الصين مابيركبوش العربيات دي هناك مين اللي قالك الكلام ده ؟ روحت و شوفت ولا بتردد الكلام اللي بتسمعه و خلاص ؟ تفتكر بيركبوا ايه ؟ الصين ملىار و نص بيركبوا ال دودج مثلا ؟ كل العربيات اللي هنا بيركبوها هناك , افتح الموقع بتاع بريليانس و انت تعرف بيبيعوا اد ايه هناك .
الياباني اول ما نزل في السبعينات كان اللي يركبه بيشاوروا عليه انه عبيط و الكوري من عشر سينين ما كنشي بيتركب و لغاية دلوقتي ما بيتركبش لا في اوروبا و لا امرىكا و لغاية النهارده و علشان الكوري يتباع في امريكا و يغروا الناس بينزلوا عليه ضمان 10 سينين علشان يتباع و الله ولا اليباني بيتباع في اوروبا و معروض بارخص الاسعار , و انا كنت هناك لما النيسان تيدا نزلت و كانت معروضه ببلاش و لا حد كان بيشتريها .
طيب اللي بيشتم في السيارات الصيني , بتقارنها بايه ؟ باللوجان ؟ اللي التوب منها بيتجمع في شركة داتشيا و الشعبي بيتجمع في المغرب ؟ و لا بتقارنه بلانوس اللي موتورها من رومانيا ؟ و لا بالفرنا اللي هيونداي بتبعها لنا زي اللي بيبيع الهوا في ازايز ؟ولا الافيو اللي طوب الارض اشتكي منها و اللي اصحابها بيصلحوها علي حسابهم بره و همه لسه في الضمان ؟ ولا الاكسنت الورقه علي الطرق السريعه ؟و لو مش مصدقين ادخلوا هنا علي اقسام العربيات دي و الميه تكذب الغطاس .ولا بالا قارن كده بريليانس FSV or FRV بانيسان صني التقفيل المصري الزباله واللي كنت رايح ادفع فيه 90000 جنيه و هيه متساويش اكتر من 70000 علي البطاريه الميه اللي فيها و لا تقفيل موبيكا .
اذا كان الاخوه اللي بيشتموا في الصيني علشان يسوقوا لماركات تانيه بعد ما خافوا من الحصه اللي خدتها السيارات الصيني من السوق و خصوصا من حصة السيارات الكوري اللي الصيني هتعديها يبقي اسمه تضليل .
بالنسبه للكراش تيست اللي بيتكلموا عنه انا اتكلمت عليه قبل كده , طيب يورونا التيست بتاع السيراتو كده , هيطلع تيست 100% خمس نجوم و بوسه كمان , بس انا ما صدقش الا اللي بتشوفه عيني و شوفوا حوادثها علي الطرق السريعه و الله ما ها تعرفوا وشها من ضهرها . و اللي راكبين الفيات 128 , 125 , 127 و الادا و البيجو 504 نقلهم البقيه في حياتكم انتم لسه عايشين ازاي .
ارحمونا من فتاويكم الخايبه .

المشاركة الأصلية كتبت بواسطة yasser100

.
الياباني اول ما نزل في السبعينات كان اللي يركبه بيشاوروا عليه انه عبيط و الكوري من عشر سينين ما كنشي بيتركب و لغاية دلوقتي ما بيتركبش لا في اوروبا و لا امرىكا
و ارحمونا من فتاويكم الخايبه .

و الله الكلام ده انا شفته بعينى و فعلا صح ده حصل حصل حصل

يا عم هو انت كان حد ضربك على ايدك و قال لك اركب صينى فى مثل بيقول ( اللى عاجبه الكحل يتكحّل و اللى مش عاجبة من البلد يرحل ) و ............................و احنا لما اشترينا الصينى ما كناش شاربين حاجة و لا مغيبين كنا فى عقلنا و اشتريناها بأرادتنا و نحن فى كامل قوانا العقلية و هذا أقرار منّا بذلك - و لك علينا يا عم لو حد طلب منك قرش تعويض ما تبقاش تدفعله - عايز حاجة تانية يا..................................... العربية دى ما بيركبهاش غير الناس المثقفين اللى قاريين عنها و عارفينها كويس

لقد حصلت على انذار مع وقف اسبوع لمخالفة القاهدة 13 من قواعد المنتدى
يرجى مراجعة قواعد المنتدى
12:29am 30/7/2010
المشرف العام-5

المشاركة الأصلية كتبت بواسطة sonson56

يا عم هو انت كان حد ضربك على ايدك و قال لك اركب صينى فى مثل بيقول ( اللى عاجبه الكحل يتكحّل و اللى مش عاجبة من البلد يرحل ) و...........................................و احنا لما اشترينا الصينى ما كناش شاربين حاجة و لا مغيبين كنا فى عقلنا و اشتريناها بأرادتنا و نحن فى كامل قوانا العقلية و هذا أقرار منّا بذلك - و لك علينا يا عم لو حد طلب منك قرش تعويض ما تبقاش تدفعله - ................... العربية دى ما بيركبهاش غير الناس المثقفين اللى قاريين عنها و عارفينها كويس

همه بيشتموا في الصيني علشان اتكشف النصب اللي في العربيات خصوصا الكوري اللي بينقطونا فيه بالاوبشن , كاسيت مش عارف بيعمل ايه 2000 جنيه زياده , فتحت سقف 5000 , جنوط 7000 و كلها حاجات خايبه بتنزل في اي عربيه بره و ماليهاش تمن كل العربيات الصيني نازله فيها و باسعار معقوله و كفاءه جيده و عن تجربه

المشاركة الأصلية كتبت بواسطة yasser100

همه بيشتموا في الصيني علشان اتكشف النصب اللي في العربيات خصوصا الكوري اللي بينقطونا فيه بالاوبشن , كاسيت مش عارف بيعمل ايه 2000 جنيه زياده , فتحت سقف 5000 , جنوط 7000 و كلها حاجات خايبه بتنزل في اي عربيه بره و ماليهاش تمن كل العربيات الصيني نازله فيها و باسعار معقوله و كفاءه جيده و عن تجربه

كلام مظبوط و دلوقتى الموديلات الصينى الجديدة 2010 بتنزل الهاف اوبشن منها بجنوط و سى دى ام بى ثرى و سنسور ركن و مرايات كهرباء و زجاج كهرباء و فوانيش شبورة امامى و خلفى و و احدث تكنولوجيا فى المواتير الحديثة و ِABS , EBD و باور و تكييف قوى و سنتر لوك و مفتاح ريموت و وحدات رفع للزجاج الأمامى - عايزين ايه تانى يا مفتريين شوف بقى لو سيارة من السيارات اللى انتوا شايفين انها احسن من الصينى تبقى بكام لو نزلت فيها الكماليات ؟ طبعا مش ب 70000 ج
مش كده ولا ايييييه ؟
و الله انا بفرح جدا بكلامهم ده بحس انهم متغاظين و مولعين و ده تعبير صريح عن النار اللى والعة جواهم

المشاركة الأصلية كتبت بواسطة akramesg

استاذ رضا احييك على امثالك بتجيبها منين دى باشا

يا باشا القاموس مليان بس انت أشّر و انا جاهز
تحياتى

المشاركة الأصلية كتبت بواسطة akramesg

استاذ ياسر كلام 10 / 10

و الله دي حاجه بسيطه , الواحد بس بيزعل لما يشوف الناس بتتكلم عن جهل و المفروض انهم يكونوا مثقفين , او همه فعلا مثقفين بس مضللين , انا احترم رايهم لو يذكروا المميزات و العيوب و مفيش حاجه خاليه من العيوب , طيب يقولوا رايهم في الاخبار المكتوبه النهارده في اول صفحه في الاهرام عن رينو سحب 35000 سياره فلورينس الجديده من دول الخليج المتصنعه في كوريا علشان مشكله في دورة المحرك و الاحتراق , 35000 سياره يعني كل اللي اتباع في الخليج لانهم مش غاويين الرينو في الخليج , و رينو سحبتهم علشان خايفين من رد الفعل لكن هنا و لا حد هيعبرهم , علي الاقل اللي اشتروا الجالينا ما حصلش لهم مشاكل و تبقي سلملي علي خامات التصنيع الهاي كوالتي .