الموضوع: هي مش دي البريليانس جالينا يا جماعة!!!

انا راي ياجماعة ما حدش يرد باي تعليق كل ما اخش المنتدى الاقي نفس الموضوع ده بتفتح
خلاص ما حدش يرد خليه يختفي من قائمة مواضيع قسم المنتدى
من الاخر البريليانس هي الاختيار الموفق

ياجماعة احنا الحمدلله فكرتنا واقتنعنا بالبريليانس عالي جدا وعموما احب اوجه كلامي لثلاث فئات لقيتهم في قسم البريليانس هم :
اولا : (الى من لا يريد ان يقتنع ويريد فرض رأيه بالقوة ) اقوله ذي ما بيقول جمهور الاهلي اللي خايف يروح يعني اللي مش عاجباه العربية لمجرد انها صيني فقط يروح ويريحنا
ثانيا : (الى من اقتنع بالعربية ولسه اه اجيبها ولا لأ يعني المتردد وطبعا حقه الشروة عربية ) اقوله أسترجل واركب بريليانس وما تخفش
ثالثا : ( الى ملاك البريليانس اصدقائي في المستقبل) اقول هنيئا لكم ومبروك عليكم العربية ولعلمكم من خلال كلامكم عنها انا اشتريتها حسيت في كلامكم المصداقية والنصيحة وخلاص هانت انا في انتظار استلامها

المشاركة الأصلية كتبت بواسطة pavly3

فعلا يا أخى حاجه غريبه جدا جدا

فى ناس عاوزه تفرض رأيها فى العربيه حتى على اللى معاه ومجربها

وهو كده بالعافيه وحشه يعنى وحشه

انا شايف ان الشركه كانت فى منتهى المصداقيه وبجد ارفعلهم القبعه لو كانت شركه تانى كانت قالت لا دى مش عربيتنا ودى حروب من شركات تانيه والكلام اللى بنسمعه فى جميع المجالات ده

انما الشركه بمنتهى الاحترام عرضت فى الفيديو بتاع التست ان الاختبار ده اتعمل بعد 79 يوم من الاختبار الاول وفى الاخر جابت نتيجة الاختبار الاول ونتيجة الاختبار الثانى وده اعتراف ضمني منهم على ان فعلا دى كانت عربيتهم وطوروا سبل الامان فيها اكتر لحد ما وصلت ل 3 نجوم

وحقيقى دى حاجه تدعو للفخر

وانا واحد من الناس شوفت الفيديو الاول وشوفت الفيديو التانى وسألت كويس وبناءا عليه حجزت عربيه بيرليانس

أولا : معاك العربية وجربتها وكل الكلام الجميل ده .... للاسف أنا مباخدش بيه ..لإن أنا معرفش حاجة عن خلفيتك في العربيات .... وحضرتك مش مقياس...
ثانيا : حتقولي ولا حضرتك ... مش حعارضك في النقطة دي ... بس حقولك نشوف الناس اللي بتفهم بتقول ايه ... بص على اوروبا وامريكا وكل الدنيا ....
ثالثا:عربية ايه اللي طنط 3 نجوم في 79 يوم .... إنت فاكر الموضوع ايه بالضبط ...حتتين حديد بيتحطو وخلاص .... وال اختبار الجديد اللي خدت في 3 نجوم كان في أنهي دولة ...وتحت أنهي مقاييس ... ويا ترى دخلت بيه اوروبا ... أو حتى اسبانيا اللي بيتقال إن الاختبار الجديد ده كان فيه ....
رابعا : لو حضرتك فاكر إن الديمقراطية.... إني أسيبك تدي معلومات غلط للناس لمجرد إن حضرتك مقتنع بيها ومردش عليك ... لانك حر ... للاسف لأ ... انت تقول اللي إنت عايزه وأنا أقول اللي أنا عايزه ...وكل واحد ياخد قراره بنفسه ....
خامسا : مع إحترامى الشديد لرأى حضرتك ..... أيوة حضرتك لما تقول إنها حلوة .... و انا شايف انها أى كلام ... انا حر .... و على فكرة دة رأى الناس اللى بتفهم عربيات علشان كدة , لما أى حد يجى يقوللى حلوة علشان أنا شايف كدة .... أقوله أسف .. طب على الأقل إدينى دليل ... أمارة يعنى ..... ولا رأى حضرتك لا رأى بعد رأيك
ختاما أنا ممسكتش عصايا و قولت اللى حيجيب العربية دى حمدوا على رجليه ..... اللى عايز يشيل يتفضل .....

المشاركة الأصلية كتبت بواسطة akramesg

والله الموضوع ينرفز

بص الاختبار اسبانى زى مهو واضح فى الفيديو بس لو عايزو المانى متزعلش

سيادتك علامة وكل حاجة ومحدش غيرك بيفهم واحنا عربياتنا زبالة واحنا حسبناها غلط عشان لاقيين فلوسنا فى الارض

وانا شربت العربية وعشان انا شخص مريض بحاول اشربها لأكبر عدد ممكن !!!!

انصحك تروح تعمل مصلح فى حتة تانية

ولو شفتك على الطريق هوريك العربية الزبالة بتعمل اية

محنا مش هنخلص من الموضوع دة

متدخلش الموضوع في ناحية شخصية ...... خليك professional ..... وعلى فكرة الطبيعي غالبية الناس مش لازم تفهم في العربيات .... مش فرض عين ....فرد كفاية ...بمعنى إن مجموعة تعرف وتنصح اللي ميعرفوش
... ماحدش قال إنك راجل مريض وأهبل وال كلام اللي إنت قلته ده, إنما حضرتك معلوماتك مش كافية إنك تقول العربية كويسة ولا لأ .... وده مش عيب لانك بالتأكيد في شغلك أو في هوايتك بتفهم أحسن مني .... إنما أنا بفهم في ال IT وفي العربية ......
أما موضوع إنك لو شفتني في الطريق حتوريني .... حارد عليك واقولك .... متقدرش والمؤاخذة لأني تقيل عليك .... ويا سيدي , حتى لو إنت أحسن برده إيه المشكلة ....اخوات برده ...في بيتها يعني

المشاركة الأصلية كتبت بواسطة yasser100

والله يا جماعه انا مش عارف لغاية امتي هنفكر بجهل و عصبيه و ليه بنعتقد ان كل واحد جاهل و عبيط برغم انه النت و الدش مش سايبين حد عبيط .
اولا انا كتبت هنا قبل كده و قلت الصين بتصنع كل الجودات العيب مش في الصناعه الصيني العيب فينا احنا , الصين بتشوف انت عايز ايه و بكام و تصنعهولك , المشكله عندنا انه احنا سمحنا بدخول زبالة الصيني , اوروبا ما يعرفوش و ما شافوش زبالة الصناعه الصيني و اللي سافروا اوروبا يعرفوا الكلام ده كويس لان كل المنتجات هناك صيني و بجوده عاليه جدا و الكلام ده فين ؟ و الله في المانيا ام الصناعه , حتي اديداس صناعه صيني , انا كان نفسي اشتري اي حاجه حتي لو مش عايزها بس تكون صناعه الماني .
امريكا بجلالة قدرها صرحت في معرض ديترويت للسيارات 2009 ان الصين اكبر منتج للسيارات 2011 و الاخ اللي بيقول انه في الصين مابيركبوش العربيات دي هناك مين اللي قالك الكلام ده ؟ روحت و شوفت ولا بتردد الكلام اللي بتسمعه و خلاص ؟ تفتكر بيركبوا ايه ؟ الصين ملىار و نص بيركبوا ال دودج مثلا ؟ كل العربيات اللي هنا بيركبوها هناك , افتح الموقع بتاع بريليانس و انت تعرف بيبيعوا اد ايه هناك .
الياباني اول ما نزل في السبعينات كان اللي يركبه بيشاوروا عليه انه عبيط و الكوري من عشر سينين ما كنشي بيتركب و لغاية دلوقتي ما بيتركبش لا في اوروبا و لا امرىكا و لغاية النهارده و علشان الكوري يتباع في امريكا و يغروا الناس بينزلوا عليه ضمان 10 سينين علشان يتباع و الله ولا اليباني بيتباع في اوروبا و معروض بارخص الاسعار , و انا كنت هناك لما النيسان تيدا نزلت و كانت معروضه ببلاش و لا حد كان بيشتريها .
طيب اللي بيشتم في السيارات الصيني , بتقارنها بايه ؟ باللوجان ؟ اللي التوب منها بيتجمع في شركة داتشيا و الشعبي بيتجمع في المغرب ؟ و لا بتقارنه بلانوس اللي موتورها من رومانيا ؟ و لا بالفرنا اللي هيونداي بتبعها لنا زي اللي بيبيع الهوا في ازايز ؟ولا الافيو اللي طوب الارض اشتكي منها و اللي اصحابها بيصلحوها علي حسابهم بره و همه لسه في الضمان ؟ ولا الاكسنت الورقه علي الطرق السريعه ؟و لو مش مصدقين ادخلوا هنا علي اقسام العربيات دي و الميه تكذب الغطاس .ولا بالا قارن كده بريليانس FSV or FRV بانيسان صني التقفيل المصري الزباله واللي كنت رايح ادفع فيه 90000 جنيه و هيه متساويش اكتر من 70000 علي البطاريه الميه اللي فيها و لا تقفيل موبيكا .
اذا كان الاخوه اللي بيشتموا في الصيني علشان يسوقوا لماركات تانيه بعد ما خافوا من الحصه اللي خدتها السيارات الصيني من السوق و خصوصا من حصة السيارات الكوري اللي الصيني هتعديها يبقي اسمه تضليل .
بالنسبه للكراش تيست اللي بيتكلموا عنه انا اتكلمت عليه قبل كده , طيب يورونا التيست بتاع السيراتو كده , هيطلع تيست 100% خمس نجوم و بوسه كمان , بس انا ما صدقش الا اللي بتشوفه عيني و شوفوا حوادثها علي الطرق السريعه و الله ما ها تعرفوا وشها من ضهرها . و اللي راكبين الفيات 128 , 125 , 127 و الادا و البيجو 504 نقلهم البقيه في حياتكم انتم لسه عايشين ازاي .
ارحمونا من فتاويكم الخايبه .

معاك النت مسابش حد , بس قدرة الناس إنها تفهم الكلام ال technical بتفرق حسب الثقافة والعلم والدراسة .....
ومعاك برده إن العيب مش في الإنتاج الصيني ..... بمعنى إنك تشتري أي ماركة محترمة منتجة في الصين عادي ,ومتقلقش ....لإن في حاجة اسمها production proccess الشركات العالمية بتلزم بيها أي مصنع خارج أو دخْل البلد الأم .... بمعنى نفس المعايير للجودة اللي بتطبق في أي مصنع ل sony مثلا في اليابان هي هي اللي بتطبق في بلاد الواق واق
......
أما الصيني بس فـلأ ..... بيعملوا اللي يبيعوه في سوق معيَّن ....بمعنى في سوق زي مصر ... مفيش معايير جودة ملزمة للشركات ... بيعمل حاجة و للهند بيعمل حاجة تانية ...وهو أصلا مستهدف شريحة سوقية معينة .... وبيلعب بموضوع الكماليات .....
الياباني بدأ في الخمسينات يا هندسة .... وهو مستهدف السوق الأوروبي من الأساس ..... وبدأ يعمل ويطور عربيته على الأساس ده ..... ولما جتلك هنا في السبعينات ... كانت واكلة السوق في اوروبا وامريكا .... يعني جتلك عا لية أساسا ..... وفي ........ry عن العربيات الياباني وتاريخها ممكن ابعتهالك لو عايز ....
أما الصيني فـبدأ مع نفسه في الصين وبدأوا يصدروا , زي ما الصين بتعمل لكل الدنيا في نفس الوقت ..... إنت اشتريت واوروبا رفضت ..... فـياترى مين اللي صح ؟؟؟؟
يا اخي العزيز .... الصين أكبر منتج للعربيات في العالم لإن 80% من الشركات العالمية هناك .... بس مش قصده العربيات الصيني اللي من مركات محلية ...... ودي بالورق انتاجها ميجيش 20% من اجمالي إنتاج الصين من العربيات .... وممكن تستخدم النت وتشوف ....
أما اقارن البريليانس بايه ....إنت بتقارن عربية ب 67 ألف بعربية ب 86 ألف ... الظريف إن اللوجان اللي مش عجبك دي واخدة 3 نجوم في ال euroncap الرسمي مش ADAC ودي الماني على فكرة .....
وعلى فكرة كل العربيات اللي حضرتك كاتبها دي معدتش ال 75 ألف ...مش 90 ألف .... وعلى فكرة برده رغم انهم عربيات اقتصادية مش معمولة للرفاهية , إنما اللانوس اللي هي عربية تعبانة , أي كلام أحسن من FRV .... رغم فرق الموتور ... وخاماتها اللي أي كلام أحسن من الخامات بتاعت لعب الأطفال اللي في البريليانس ال FRV اللي إنت بتقول إنها أحسن اختراع بعد الكهربة......
اقولك حاجة اظرف ال 128 اللي مش عجباك دي أحسن ..... حتقولي اززززززاي ....شفته إنه مش فاهم حاجة ...حقولك عربية بقالها 35 سنة شغالة ....ياترى ال FRV والصيني عموما عاومره حيبقى 10 سنين ؟؟؟؟ اشك إنها 5
أما موضوع الكراش تست ... فـمرسيدس c190 موديل 1999 كانت بتجيب 2 لما تم اختبارها يا ترى ....مرسيدس عملت ابحاث وخليت كل عربيتها 5 نجوم ليه ,,,,أكيد ناس فاضية معاها فلوس .... العلم اتقدم يا باشا .... لما الناس كانت بتعمل عربيات , وبتعمل حوادث , واكتشفوا طريقة يقللوا الخساير البشرية شوية .... بفضل علم الله .... نرميه ونقول حسبنا ماوجدنا عليه أباءنا ... ولا نطور نفسنا .... ده اسمه الأخذ بالاسباب يا هندسة