الموضوع: انسينى انا صبرى انتهى ......(بفكر اتطوع فى الجيش ) دعوة لنقاش مع واحد مجنون

المشاركة الأصلية كتبت بواسطة زهير فكري

[حضرتك واضح ان سنك كبير مش صغير ممكن تكون شفت الحلو فى البلد دى علشان كدة شاف انها ممكن تكون حلوة
حضرتك متعلمتش تعليم عالى علشان اقعد صبى صنيعى(كهربائى ) لعدم وجود فرصة عمل تتحمل اهانة وشتيمة وقلة ادب
لمجرد الفلوس الى لو سبتها هتبقا خايب ومش عارف تعمل حاجة فى نظر نفسك واهلك تدخل شركة وتشوف معنى القهر بعد اربع سنين بهدلة مع الشغلة نفسها مرمطة ما بعدها مرمطة بخلاف انى امد ايدى لسواق علشان 5 جنية ولا حاجة
والحمد اللة الانجاز الى قدرت احققة انى اكون امين مخزن
يكفى انك بعد ما تفهم وتحترف الشغلة دى تكرهايجيلك ناس تدربهم انت وتلاقيهم وقت التدريب بياخدوا اكتر منك خد بالك انا وقتها كنت باخد 450 جنية وكان عندى 22 سنة
وهما بداو ب900 وحاولت انى اعرف السبب طلعوا قرايب ناس فى الادارة
المهم عملت فلم علشان ازيد معرفتش غير انى اوصل 650
وبعد سنتين بقيت 900
مع العلم انا امين مخزن لا ثلاث مخازن لثلاث توكيلات سيارات
وفى فترة كدة جابوة واحد كدة يشتغل معانا ولقيت مرتبة فى اول اسبوع ضعف مرتبى ولسة هدربة
عاوز اعمل اى خطوة فى حياتى مش قادر مفيش فلوس مفيش شغل كويش مفيش فلوس
انا ابويا حارب 8 سنين فى الجيش استنزاف والعبور واتحاصر فى الثغرة كمان
زمالة الى هربوا دلوقتى بيتعاملوا احسن منة الف مرة علشان معاهم فلوس وهو زى ما هو
قبل ما تحكم عليا شوف الى انت ممكن تكون عاصرتة والى انا وغيرى شفناة
صدقنى عندى 100 الف واحدة معندهمش استعداد يموتوا علشان البلد دى
يموتوا علشان شباب تانية تعيش فى مارينا مرتاحة دول الى مش هيدخلوا جيش
ودول الى هتدافع عنهم علشان يعيشوا مبسطوين ويعرفوا يلعبوا براحتهم
وانت عيش زليل خدام واقبل بأى حتة لقمة نرميها وكمان موت علشانا
ياريت قبل ما تحكم تفكر فى ممكن ابنك يشوفة لو انت مقدرتش تأمن مستقبل كويس
وشكرا لرد حضرتك واسف انى طولت


لا يا باشا ما طولتش ولا حاجه , شوف انا معاك 100% في اللي انت ذكرته وده مش ازمتك لوحدك بل ازمه شباب كثير في البلد دي . بس الانسان الذكي المتعلم هو اللي يقدر يفكر في وقت الأزمه صح و مايندفعش تحت ضغط اليأس و الاحتياج للماده انه يتهور و يخسر كل حاجه و يرجع تحت الصفر بدرجات . يعني مش معني اني قرفان من ظروف البلد و عيشتي اروح اطوع في جيش اسرائيل او امريكا مثلا !! عشان انتقم من البلد اللي ذلتني و بهدلتني و اهانتني و محترمتنيش و بعد ما تمر السنين و الايام هتلاقي نفسك انتقمت من نفسك و اهلك مش من البلد و لا من الشباب ( السيس ) اللي انت بتقول عليهم !لان انت ببساطه لما تقول اتطوع في جيش بلد ليها تاريخ معادي لبلدك ممكن ياخدوك و هيعرفوا يستغلوا طاقه الانتقام الجباره اللي جواك و يوجهوها صح لخدمه اهدافهم الخبيثه و هتاخد فلوس آه لكن قصادها هتخسر كل حاجه , و يا ويلك لحظه استيقاظ صوت ضميرك و تحاسب نفسك في لحظه معينه من عمرك و تلاقي حصادك هبو رياح ساعتها تتمني انك ما اتوجدتش اساسا ّ!

بص ياسيدي كلنا مرينا بظروف صعبه في حياتنا و حسينا باليأس كثير , و احمد ربنا انك بتشوف المراحل الصعبه في بدايه حياتك و انت شاب مش و انت في ارزل العمر و المفروض ترتاح !! و ثق تماما و ابقي افتكرني ساعتها انه ان شاء الله لما ربنا يفرجها عليك( ممكن بعد سنه او اثنين او عشرين ) هتفتكر الأيام الصعبه دي و تضحك عليها .

نيجي بقي لمشكلتك , من الواضح و من خلال عملك في احد توكيلات السيارات انك بتشوف نماذج من الناس اللي بتشتري عربيات وطبعا ممكن تلاقي شباب لسه في ثانوي او جامعه و جاي يشتري عربيه تمنها يعدي 100 الف جنيه ( هديه نجاحه مثلا او عايز يغير من موديل لموديل اعلي منه) ..الخ و طبعا سيادتك بتقارن دول بنفسك , بالاضافه لظروف شغلك الغير ملائمه لشخصيتك و شعورك بالانكسار نتيجه تجارب فاشله في بدايه حياتك و ايضا غياب العداله في المرتبات و الأجور بينك و بين زملاؤك , كل ده ادي للشعور بالغضب تجاه المجتمع , فأولا انصحك انك ما تبصش لغيرك وربنا يزيد كل واحد لو كان من حلال , ثانيا مشكله فرق الأجور ده بينك و بين زمايلك ؟ انت اتكلمت مع الاداره بهدوء فيه؟ طيب انت بتشتغل في توكيل سيارات امين مخزن ؟ و بتقول انا مؤهل عالي ما تحطش في اعتبارك داخليا انه طالما انا بقيت مؤهل عالي يبقي لازم تبقي قاعد علي مكتب بيه ببدله و الساعي تحت امرك و الصوره السينمائيه دي ! و انه مش معني ان الواحد لو مؤهل عالي يبقي الصوره اللي احنا قلناها دي هي جزاء المشوار و مكافأه التعب و الكفاح و ما عدا ذلك فهو اهانه لذاتك و تقليل من شأنك و لسان حالك يقوللك كأنك يا ابو زيد ما غزيت و فرقت ايه عن واحد بدبلوم او واحد ما اتعلمش حتي ؟؟

لا يا صديقي !!! ممكن اكون مؤهل عالي و اشتغل عامل في محطه بنزين بس عيني اني ابقي صاحب المحطه !وممكن اشتغل جرسون و انا مؤهل عالي بس عيني اني ابقي صاحب سلسله فنادق !! و ممكن اكون مؤهل عالي و اشتغل عامل حفر بس عيني اني ابقي صاحب شركات مقاولات ! و هكذا و سواء العمل ده كان باختياري او الظروف فرضته عليا لازم انظر للجانب الايجابي منه و اتحمل مشقاته و صعوبته في سبيل هدف اعظم و اسمي , هو ده الفرق بينك و بين اي واحد تاني ينظر للتعليم نظره دونيه و شايف انه العمليه محصله بعضيها و كله بيتساوي في الآخر . استحاله و ان بدا ظاهريا ذلك , و ان كل العظماء لازم يتعبوا في الأول و يلاقوا مشقه كبيره في الأول , و ان الناس اللي انت بتشوفهم حياتهم ناعمه و سهله و ليهم واسطه مضمونه و يشتغلوا في احسن الأماكن و ما تعبوش في الأول , تعالي بقي اتفرج عليهم لما الزمن يديهم ظهره بس في وقت المفروض يرتاحوا فيه!! بتبقي حياتهم ضنك ربنا ما يحكم علي حد . ليه ؟ لأنه ما تعبش في الأول !!! الدنيا ميزان يا صاحبي .
و انا هحكيلك قصتين و انت احكم , الأولي اثنين ضباط شرطه نفس الدفعه و نفس المستوي المادي و الاجتماعي الأول اتعين ظابط نظامي في قسم من الأقسام و التاني في الأمن المركزي, الأول صبر و اتحمل و ادي واجبه , و التاني لم يتحمل و بحث عن واسطه تنقله مكان تاني مريح و اتنقل فعلا. السنين مرت و الاثنين بقوا لواءات ! بس الأول بقي مدير امن محافظه و بعدين مساعد وزير و التاني خد لواء سنتين و طلعوه معاش !! طبعا فرق شاسع بين المركز و السلطه و الدخل المادي بين الاثنين , ! المثال التاني اتنين مهندسين الأول اشتغل في المواقع و اتبهدل في بدايته , و التاني اشتغل في مكتب احد وكلاء الوزاره كمدير مكتب لتنظيم الورقيات و الصيغ الرسميه و طبعا ببدله و مكتب وممكن عربيه توديه البيت ! السنين مرت و الأثنين بقوا وكلاء وزاره الأول بقي فاهم الشغل و الناس بتحبه و ناجح جدا , و الثاني مش فاهم حاجه في الشغل و بيلطش في مخاليق ربنا و همه كله الورقيات و بس و المظهر العام و عنده الشغال زي اللي مش شغال و الناس بتكرهه و بتلعنه وهو نفسه حاسس بكده و عنده امراض الدنيا كلها و عايز يساوي معاشه !!! النماذج دي موجوده قدام عيني و معاصرها مش قصص خياليه و مسكنات , المهم انت عايز ايه ؟؟؟

دلوقتي تستهدي بالله و تروح تبوس ايد ابوك البطل اللي رباك , و حاول تعيد النظر تاني و ما تستعجلش الأمور و ما تبصش لغيرك اهم حاجه و تحدد انت عايز ايه , و ما تصعبهاش علي نفسك . و ربنا معاك و معانا كلنا .

اشكر حضرتك على ردك المفصل
انا مدرك كلامك كويس اوى
مع العلم الحمد الله انا اتربيت غنى النفس (بس مع الاهانة والاحساس انو مش قادر يعمل حاجة بخلاف البعد عن ربنا نسبيا )
بس ميمنعش ان كتر الظلم والبت بيولد انفجار مع الوت صعب تقدر تحكمة
لاان الى بيحركك طاقة غضب غضب من كل شىء حتى من نفسك
حضرتك حطيت نقط كتير كانت ديما بتيجى فى بالى بس انا ديما شايف نفسى احسن
بحس بقيمة تعبى فى شغلى رغم انى مش واخد حى فية زى زى الالف المصريين

على فكرة مسئل التطوع مش هتتعمل يعنى
هى مش سهلة
مجرد فكرة جات فى بالى بس طبعا ليها شروط كتير اهمهم الجرين كارت وانا لو معايا مش هفكر فى جيش
شكرا لردك