الاكسل الاكسس اللانوس البرايد

**أحمد الجندى** · 18-07-2010 04:49 PM

أنا بفكر فى عريبة فى حدود 35000 وأهم حاجة عندى فى العربية انها تكون 1300 سىى سى (علشان أنا الشيطان بيغوينى دايما بالسرعة فبحاول اجيب عربية مش جراية) وتكون سيدان علشان الاسرة ويكون فى العربية باور لانى تعبت من دركسيون عربيتى وتكييف وقطع غيارها متوافرة ورخيصة وموفرة فى البنزين وبيفهم فيها الميكانيكية ، ولو فيها ازاز كهرباء وسنتر وانذار يبقى كتر خيرها اصل دى يعنى من الكماليات اللى مش فارقة معايا قوى .

وقدامى عدة اختيارات منها

1- الكيا برايد سيدان ودى انا مستبعدها حاليا لانى معايا الكيا برايد هاتش باك ومع انها مريحانى فى كل شىء ماعدا الكماليات وعارفها كويس بس بقول حرام اغير لنفس العربية .

2- الهيونداى اكسل عربية كويسة وفيها كل حاجة طالبها بس مشكلتها انى لما دورت لقيت ان احسن حاجة فيها الموديلات اللى قبل 1995 اللى هيا 1500 سى سى ودى بسؤال كذا واحد لقيتها مش موفرة قوى فى البنزين ده غير ان الموديل البعيد ده يعنى استهلاك اكتر للعربية .

3- الهيونداى اكسنت ودى أنا بصراحة مرتاحلها لانى ركبتها من غير ما اسوقها ولقيتها واسعة والفتيس بتاعها ناعم وشكلها من جوة مش بطال بس العربية مش مجرد شكل من برا وجوة وأنا مش لاقى مواضيع تدى تفاصيل ومعلومات كتير عن العربية دى مقارنة ببقية الانواع اللى بقارن بينها ، وده مخلينى مش عارف ايه اللى يخلينى اجيب الاكسنت بدل الاكسل مادام الاتنين يعتبروا زى بعض بس الفرق فى الشكل والموديل ؟

4- الدايو لانوس ودى عربية أنا عن نفسى شايف انها احسنهم بس المشكلة ان سعرها غالبا حايعدى اللى أنا محدده ده غير انها 1500 سى سى فبرضو حاتبقى اكثر استهلاكا بالنسبة للبنزين .

فايريت تفيدونى بين هذه العربيات بالذات الفرق بين الاكسل والاكسنت وايه مميزات الاكسنت وعيوبها ولو فيه روابط ياريت تفيدونى لانى كل ما ادور على الاكسنت تحديدا تظهرلى مواضيع عن النيو اكسنت ومش لاقى حاجة عن الموديل القديم .

**Omar.Shawki** · 18-07-2010 08:42 PM

وممكن تضيف عليهم تويوتا تيرسل
انا لاقيت واحدة على الموقعcar100100 بس عجبانى قوى بس معرفش ايه اخبار قطع الغيار فياريت حد يفدنا وده لينك العربية
الموقع الاشهر والاكثر انتشارا للسيارات فى مصر - The most famous site for cars in Egypt

**أحمد الجندى** · 18-07-2010 08:49 PM

هى كشكل شكلها مقبول وتحسها واسعة وشطنتها كبيرة واسم تويتا لا يعلى عليه بس العربية مفيش أى امكانيات فيها لا باور ولا تكييف ولا أى حاجة ده غير انى أول مرة اسمع عنها واشوفها وشكل قطع الغيار حاتبقى بطلوع الروح وسعر اعادة البيع حايبقى وحش

**Omar.Shawki** · 18-07-2010 09:05 PM

على فكرة هى فيها تكييف وحكاية الباور دى زى الملكة اعتقد مفيهاش باور وكويسة جدا بس المشكلة فعلا فى قطع الغيار موجودة ولا لأ واسعارها غالية ولا ايه
انما سعر اعادة البيع اعتقد مش هيبقى وحش وده عشان هى مش غالية قوى وتويوتا
ورأيى الاكسنت افضل من الاكسيل
وربنا يوفقك وتلاقى عربية كويسة

**ahmedezzat78** · 18-07-2010 09:12 PM

المبلغ ده يجيب اكسيل أو برايد سيدان أما الانوس و الأكسينت هيعدو ميزانيتك

لو مكانك اجيب اكسيل

**أحمد الجندى** · 18-07-2010 10:21 PM

المبلغ ده يجيب اكسيل أو برايد سيدان أما الانوس و الأكسينت هيعدو ميزانيتك

كلامك صحيح وأنا بحثت قليلا منذ طرحت الموضوع ولقيت ان افضل ما فى الاكسل والاكسينت واللانوس هو موديلات ال 1500 اما ال 1300 فمش قد كده وده بيرجعنى لقدرى ونصيبى الكيا برايد هيا الوحيدة الاصيلة اللى على قد فلوسى وامكانياتها بتلبى مطالبى .

بس أنا برضو عايز اعرف امكانيات الاكسنت ومعرفة مميزاتها وعيوبها فقد اصبر بعض الوقت وادبر مبلغ زيادة لشرائها وما الفرق بينها وبين اللانوس .

**أحمد الجندى** · 19-07-2010 03:06 PM

أحتاج إلى من يعطينى معلومات مستفيضة عن الاكسنت حيث احترت من الموديل 1300 سى سى ، مرة الاقيه بباور ومرة الاقيه من غير وناس تقول ان الموديل ده ضعيف الامكانيات واخرين يقولوا العربية ممتازة وناس تقول واسعة من جوة واخرين يقولوا الاكسل اوسع منها وهناك من يشتكى من وطى العربية إلى اخره من الكلام .

هل يوجد من يقطع هذا الجدل ويعطينى تفاصيل عن هذا الموديل تحديدا .

**kar!m** · 19-07-2010 03:24 PM

أنا عاجبنى بصراحه عنوان الموضوع "الاكسل .. الاكسس" و اضح ان كنت بتخلص شغلك على الاوفيس وانت بتكتب الموضوع

**RAMYALI_1982** · 19-07-2010 03:33 PM

ياباشا متحيرش نفسك المبلغ دة يجيب برايد سيدان فل اوبشن اوتوماتيك حالة ممتازة بس هادور شوية
لايمكن تلاقى الكلام دة فى الاكسيل او الاكسنت بالسعر دة

**maiasn2000** · 19-07-2010 03:40 PM

شوف يا اخي العزيز اولا نتكلم في حدود الميزانيه ودي اخرها لعربيه بيتي نظيفه هو الاكسل مش الاكسنت والاكسل كتصميم ممتازه ومتها 1300 بدون اي كماليات ومنها 1300 تكييف وكاسيت فقط ويمكن تلاقي راكب لها سنتر وانذار وزجاج كهرباء لكن مش اصلها
واخرها 1500 ودي جميع الكماليات .
مميزاتها انها ثابته مادام الكاتوتش اللي عليها 13 في 175 او اكتر عفشتها ممتازه سواء باور او لأ الدركسيون خفيف وناعم واستهلاك البنزين ممتاز سواء في ال 1500 او ال 1300
المعلومه المهمه ان تصميم الموتور هو نفس موتور الانسر موديلات 88 و89 و90 لحد 92 بس ده من خامات كوريه
وفي اسواء الافتراضات او الحالات لما بتغير اي جزء تستبدله الياباني مباشرة وهو الخاص بالانسر المشهوره بعيون صفيه يعني انا كانت عندي عربيه والفتيس عمل مشكله غيرته بفتيس لانسر ياباني 5 سرعات وكلفني كله حوالي 1000 جنيه .
ناعمه جدا جدا وافضل من كيا برايد بكتير جدا .
اما بالنسبه للاكسنت فاول موديلاتها هنا في مصر هو 1998 والسعر السليم لاكسنت بيتي سليمه ونظيفه تتركب بجد حتي لو موديل 1998 بيكون مش اقل من 39 الف جنيه وتكون 1300 تكييف وكاسيت وكل مايزيد الموديل بتزيد في السعر . اما ال 1500 مش ممكن تلاقي عربيه محترمه بجد تستمتع بيها اقل من 43 الف جنيه .
اما التيوتا تيرسيل نصيحه بلاش منها قطع غيار غاليه والاكسسوارات ناقصه شويه ومالهاش سوق يعني مش مطلوبه وانت عاوز عربيه لما تيجي تبيعها علشان تجيب احسن منها تلاقي فلوسك.
غير كده ممكن تلاقي فيليشيا موديلات من موديلات 1997 لحد 1999 بس بدون اي كماليات وهتاتكون في حدود نفس المزانيه
لكن النصيحه هي الهيونداي الاكسل وتحسن الاختيار وربنا يوفقك في واحده بنت حلال ل ولو تحب مساعدتي في الاختيار عند الشراء يعني اساعدك في الكشف عليها ومراجعتها قبل الشراء انا تحت امرك0100372740 مدحت