محتار في كام عربية كده

**SharpArrow** · 21-07-2010 09:39 AM

السلام عليكم
شباب نايل موتورز
انا كنت عايز اخد رأيكو في كام عربية كده محتار ما بينهم
او اختى بمعنى ادق
هي عايزة عربية صغيرة و لذيذة و متعذبهاش و في حدود 50000 جنيه

هي عجباها اوي جيلي باندا اكتر حاجة و انا سمعت كلام حلو عن العربية دي كتير و مسمعتش حد ذم فيها غير التوكيل انه ضعيف شوية

سوزوكي التو رقم 2 بالنسبة ليها عشان الاسم مش اكتر بس باندا اكتر

كانت بتفكر في سبيرانزا a113 طبعا خليتها تصرف نظر تماما لانها عايزة تروح لدكتور سنان (ملخلخة من كل حتة)

و هي مش ناوية على مستعمل نهائيا عشان مشاكله و غير كده هي هتجيبها قسط فا ارجو بلاش اقتراحات لمستعمل
و شكرا جزيلا مقدما :)

**Adham** · 21-07-2010 09:50 AM

و يجري اية لو ركبت بي ام مستعملة موديل 88 او 89 مثلا تكون نضيفة وحالتها كويسة

انا بصراحه مدفعش 50 الف في و لا عربية صيني و لا التو

اشتريلها عربية محترمة مستعملة استعمال نضيف و حالتها كويسة مش متهانة احسن مليون مرة من الزيرو الضعيف اللي كلة مشاكل
انشاللة هونداي اكسنت وللا دايو لانوس

**M.ABDEEN** · 21-07-2010 10:10 AM

ممكن الالتو كويسة ومعقولة

**SharpArrow** · 21-07-2010 10:47 AM

المشاركة الأصلية كتبت بواسطة adham

و يجري اية لو ركبت بي ام مستعملة موديل 88 او 89 مثلا تكون نضيفة وحالتها كويسة

انا بصراحه مدفعش 50 الف في و لا عربية صيني و لا التو

اشتريلها عربية محترمة مستعملة استعمال نضيف و حالتها كويسة مش متهانة احسن مليون مرة من الزيرو الضعيف اللي كلة مشاكل
انشاللة هونداي اكسنت وللا دايو لانوس

سؤال بس هي اولا بنت لما تشتري عربية مستعملة من 22 سنة اكيد حاجاتها القديمة اللى متغيرتش هتحتاج تغيير و الله اعلم كل حاجة هتحتاج تتغير امتى يعني هتروح للميكانيكي في الشهر بتاع مرتين او 3

ده غير ان قطع غيار البي ام ميتوصاش بيها

انا عمري ما ارشح اشتري عربية اصلها غالي و بسعر رخيص لاني مش هقدر على صيانتها

هتلاقي تيل الفرامل بكام و السيور و الحاجات اللى زي كده
و دي الحاجات الطبيعية اللى بتتغير كل شوية

امال بقى لو العربية جابت كورونا ولا المقص مش عارف حصله ايه و الحاجات اللى مش مضمونة دي هتتكلف كام

يا ريت بجد محدش يرشح اي مستعمل لان اختى مش ناوية تروح للميكانيكي نهائيا!!!!!!!!!!!!!

و شكرا

**SharpArrow** · 21-07-2010 01:51 PM

انا اسف يا استاذ ادهم لو فهمت قصدي غلط
انا مقصدش اي اهانة و الله
كل الموضوع ان المستعمل مش هينفع لبنت لان الزيرو مهما كان فيه هيبقى في الضمان و اول ما تحتاج تغير حاجة من الحاجات اللى ذكرتها قبل كده هتبقى مش قبل 7 او 8 سنين يعني مش هتعاني خالص في الاول و خصوصا لو عربية محترمة عشان كده انا بسأل

الجيلي بدأت سمعتها تكبر خصوصا بعد ما اشترت فولفو السويدية يعني اكيد عربياتها هتبقى فيها عوامل امان افضل مما سبق و دي حاجة تفتقدها السيارات الصينية عموما و طبعا ده بجانب الخامات النضيفة
و انا رأي الشخصى ان الباندا اامن من الألتو بس ده رأي و ممكن يكون غير صائب عشان كده انا بتأكد و بشوف يمكن الاقي اقتراحات افضل (عدا المستعمل طبعا)

و على كل حال انت تشكر على مجهودك بالرد و اتمنى متكنش فهمتني غلط لاني حسيت ان لهجتي مش ظريفة لما قريتها تاني و فعلا مكنتش اقصد اي حاجة تضايق

**Adham** · 21-07-2010 03:04 PM

المشاركة الأصلية كتبت بواسطة sharparrow

انا اسف يا استاذ ادهم لو فهمت قصدي غلط
انا مقصدش اي اهانة و الله
كل الموضوع ان المستعمل مش هينفع لبنت لان الزيرو مهما كان فيه هيبقى في الضمان و اول ما تحتاج تغير حاجة من الحاجات اللى ذكرتها قبل كده هتبقى مش قبل 7 او 8 سنين يعني مش هتعاني خالص في الاول و خصوصا لو عربية محترمة عشان كده انا بسأل

الجيلي بدأت سمعتها تكبر خصوصا بعد ما اشترت فولفو السويدية يعني اكيد عربياتها هتبقى فيها عوامل امان افضل مما سبق و دي حاجة تفتقدها السيارات الصينية عموما و طبعا ده بجانب الخامات النضيفة
و انا رأي الشخصى ان الباندا اامن من الألتو بس ده رأي و ممكن يكون غير صائب عشان كده انا بتأكد و بشوف يمكن الاقي اقتراحات افضل (عدا المستعمل طبعا)

و على كل حال انت تشكر على مجهودك بالرد و اتمنى متكنش فهمتني غلط لاني حسيت ان لهجتي مش ظريفة لما قريتها تاني و فعلا مكنتش اقصد اي حاجة تضايق

مافيش مشكلة انا فاهم قصدك

بس اقولك انا قصدي :

اولا عربية بي ام ماشية 22 سنة و متصينة كويس حاتبقى متغير فيها كل قطع الغيار اللازمة في مواعيدها

ثانيا العربيات المحترمة زي البي ام و المرسيدس و الهوندا وغيرها قطعه الغيار بتعيش فيها سنين و ماتوقفش بيك بالساهل

ثالثا الصيني الجديد مؤكد ان احتياجه لقطع الغيار حايبقى اكتر بعد كام شهر استخدام و اسأل اللي راكبين عربيات صيني و بيغيروا فيها قطع غيار و هي مامشيتش 5000كيلومتر

رابعا الصيني زي الفيات تغير قطعه الغيار "الجديدة" و بعد كام شهر تغيرها تاني انما الالماني و الياباني و الامريكي قطعه الغيار تركبها و تنساها سنين

خامسا قطع غيار البي ام او الاوبل او الياباني "الاستيراد" مثلا مقصات او كدة متوفرة و رخيصة و بتعيش الاف الكيلومترات و مؤكد حاتعيش اكتر من قطعه غيار "صيني أصلي" لسة جديدة بعلبتها من التوكيل

سادسا البنت انا معاك عايزة عربية اعتماديتها عالية و متوقفش بيها, يبقى الصيني ابعد ما يكون عن الكلام دة, و اسأل الناس اللي اشتري تاكسيات صيني و رافعين قضايا و الناس اللي بلاقي مسامير بتقع من العربيات و هي ماشية و حاجات بتفصل , و تقريبا الحكومة حاتوقف استيراد العربيات الصيني قريب الا بشروط و معايير جودة معينة, يبقى المطلوب للبنت عربية محترمة جديدة و دة مايتحققش في الصيني

**aly10** · 21-07-2010 03:29 PM

من راى زود شوية وهات بيكانتو او سبارك

**kimo-nubira** · 21-07-2010 04:06 PM

1- سوزوكي التو

2-شيفورلية اسبارك

3-بيكانتو ( لو فيه امكانيه انها تزود المبلغ )

ونصيحه تبعد عن العربيات الصيني خالص لا توكيل كويس ولا قطع الغيار كويسه واعادة سعر البيع في الارض وتقيله جدا في البيع