الموضوع: ماروتي - رحلة إلى مطروح

حمدلله على السلامة
ما شاء الله

حمد الله على السلامة يا أ/ كيمو
أحب أن اسئلك عن الحمولة هل كان فى مشاكل ثقل أو بطئ فى العربية ؟
ورحت فى كام ساعة ؟ وكمان السرعة كانت كام ؟
وبكام أسعار الشقق هناك ؟
باسم عماره

يا ريت تقولنا أنت روحت تبع شركة بتاعتك ولا مع نفسك علشان عايزين نعرف أية الآسعار هناك وفين الآماكن الشواطىء النظيفة والجميلة اللى ممن ممكن ندخلها وتكون ما فيهاش صخور فى المياة علشان السباحة أصل بحب المياة قوى
وعايزين نأجر مكان للسكن لمدة أسبوع أو 3 أو 4 أيام فين أحسن وأنظف وأرخص مكان للآيجار سواء كان شقق أو فنادق
وجزاكم الله خيرا

المشاركة الأصلية كتبت بواسطة m7nsh

مش مستغرب نهائى و بقيت متوقع اكتر من كده من العربيه من اللى شفته منها:)
ماشاء الله يا كيموووووووو ..ميه ميه يا معلم و حمدله ع السلامه و ان شاء الله تكون اتبسطت ؟

أزيك يا باشمهندس me7nsh لعلك بخير و ععامل ايه فى الامتحانات خلصت ولا لسة؟

السلام عليكم
شكرا على ردودكم جميعا ، وآسف على التأخير في الرد
بداية ظبطت الكاوتش هوا عند بتاع كاوتش والغريب رغم انى قبلها بيوم كنت لسه مظبطه في البنزينه وطنية اللى عند جامع السلام الحي العاشر بتاع الكاوتش قالى الاربع فرد مظبوطه على 20وقالي متعملش في بنزينة تاني وخليته يشوف لى الأستبن بالمرة وزودت الميه الخضرا وفولت بنزين وخفت بصراحه لأنى اول مره اسافر بيها اخدت جركن 4 لتر وخليته في الشنطه بس محدش يعمل كده لأنه ملوش لازمه خالص لأني رجعت بالجركن تاني زي ما هوه
بالنسبة للحمولة كنت انا طبعا كانت زوجتي وأمي وطفلين(مريم 3 سنين ومحمد سنه ونص) اللى انا رايح علشانهم اصلا والشنطة والكرسي الرابع متني وعليه ملابسنا واكل وميه يعني مليانه على الآخر
روحت اشتريت شويه حاجات من كارفور اللى في بداية الطرق الصحراوي وحاجه ساقعه علشان الحر طبعا وابتدت الرحلة من أمام كارفور الساعه واحده ظهرا بالظبط
وصلت الرست كانت بنتي عايزة الحمام ركنا شويه وكملت المسيرة باستخدام طريق العلمين وفي آخره عند مارينا اول بنزينة قابلتنا توتال فولت طبعا تاني رغم ان الرست كان فيه بس مزودتش فيه
المسافه 140 كيلو للرست
ومن الرست لمرينا أو طريق العلمين كان 135 كيلو
يعني كله حوالى 285 تقريبا من القاهرة لمرينا
من مارينا لمطروح 185 كيلو يعني برده مش هاتحتاج بنزين في الطريق
الموضوع كله كان 470 كيلو تقريبا
و الحمد لله وصلت البيت الساعه 7 تقريبا والموضوع أخد 6 ساعات
وانا هناك كنت بروح عجيبه على بعد 30 كيلو كذا مره و روحت كليوباترا وشاطئ الغرام والبيت أصلا كان في روميل
بجد البلد تحفه وهناك المرور أكتر حاجه تشد انتباهك كأنك مش في مصر رتب كبيرة في الشوارع كل تقاطع فيه عسكري واشاره الكترونية والناس كلها محترمة وبتحترم الاشارة ومفيش كسر اشاره حتى لو مفيش حد واقف والشوارع نظيفه جدا جدا خصوصا لو حبيت تمشي على الكورنيش
ورجعت يوم الجمعه بس المره دي خرجت الساعه 3 ووصلت عند الكارته الساعه 8 يعني حوالي خمس ساعات
ومريحتش في الطريق ولا حاجه برده وانا راجع فولت في مطروح وفولت تاني برده في ماارينا في بداية طريق العلمين
بالنسبة للسرعه طريق اسكندرية مكنتش بزود على 100 طبعا علشان الرادار وفيه واحد صاحبي قالى ان طريق العلمين مفيهوش رادار رغم الحاجات اللي كاتبينها على الطريق وبصراحه انا صدقته و من اول طريق العلمين لمطروح كنت ماشي 120
بس الهوا كان شديد و ساعات كنت بحس ان الهوا بيزق العربية فكنت بقفل زجاج اللى جنبي بس العربيه مجبتش اكتر من 120 ف السرعه غير وانا راجع جبت 130 واعتقد ان العائق كان اتجاه الهوا بس هما خافوا طبعا واضطريت اققلل تاني في السرعه.
الأسعار 200 جنيه ممكن تلاقي حاجه كويسه على بعد 300 متر تقريبا بس كنت بشوف البحر لأن الأرض اللى قدام البيت كانت فاضيه انما الشقق اللى على البحر مباشرة أسعار السنه اللى فاتت كانت اوضه 150 اوضتين 250 و تلاته 350 جنيه اكيد السنه دي الأسعار زادت
لو حد حابب انا ممكن اظبطه ده بيت ناس معرفه مش شقه دور واحد عبارة عن حمام ومطبخ 3 غرف بس منهم غرفه مقفوله فيه حاجتهم الشخصية وبيأجروا الغرفتين واحده فيها سرير والتانيه فيها 2 وصاله واسعه همه هنا في القاهرة أحلى ما في الموضوع انك بتكون في بيت لوحدك فبتاخد راحتك اكتر والبيت امام شاطيء رومل
بالنسبة للشواطئ اللى معاه أطفال يبقه روميل الأفضل له هوه شاطئ مجاني تأجير شمسيه واربع كراسي 10 جنيه طول اليوم ودي تقريبا أسعار كل الشواطئ في مطروح لكنه أمان فيه قدامه شبه جزيرة مخليه مفيش موج خالص و المية متدرجه في العمق بشكل كبير جدا ، يعني بنتي مثلا مشيت على رجلها من 50 الى 100 متر تقف عادي بعد كده العمق بيبتدي يزيد
الشواطيء التانيه كبيرها نص متر او تقعد على الرمله والميه هيه اللى تخرج لها زي شاطئ الغرام مثلا بالنسبة للكبار حتى 5 متر حلو قوي ده طبعا المكان المسموح فيه بالنزول لأن هناك أماكن المفروض متنزلش فيها لأن فيها صخور دي فرجه فقط. وان شاء الله بكره ارفع لكم صور من اللى صورتها هناك.
يارب أكون أجبت على كل التساؤلات وأي سؤال انا موجود
وآسف على الاطاله