الموضوع: مقارنة بين لادا 2107و الالتو

اللادا ال2107 :
موتور قوي 1600 سي سي لو مصري - 1500 سي سي لو روسي
صالون كبير مريح
شنطة كبيرة
قطع غيار متوفرة و رخيصة
سيارة قوية تمتاز بقوة التحمل و الاعتمادية

السوزوكي الالتو :
موتور 1100 سي سي و فيه منها 800 سي سي برضه
سيارة شبابية صغيرة صالون اصغر من اللادا و شنطتها تكاد تكون معدومة بالنسبة للادا
قطع الغيار اقل توفرا و بالتالي اغلي من اللادا

رايي الشخصي اشتري اللادا لانها عربية قوية بتتحمل السفر و البهدلة و ممكن علي فكرة تركبلها تكييف و باور في التوكيل بتاعها لو انت عاوز

شكرا على الرد الجميل

فى واحد فى المشاركات بيقول الألتو معدل استهلاك 5 لتر لكل 100 كم
طيب حد يعر ف الادا معدل استهلاك قد ايه ؟

انا بصراحة معرفش معدل اللادا قد ايه

بس هى استهلاكها بسيط جدا جدا لو انت ماشى براحتك
انما لو حرقت - و هى بتستحمل الحرق كويس اوى و مبتقولش لا - هتستهلك كتير لانها كاربراتير طبعا - بس ميزتة انك مش لازم تحط بنزين كفاءة عالية ممكن 80 هتمشى بنفس الكفاءة برضه

انا بصراحة كان عندى لادا موديل 2003 (1500 سى سى مصرى)بعتها و خد اللانوس بتاعة اخويا موديل 1999
بصراحة اللادا تشوط اللانوس بمليون مرة
فا ما بالك لو جبتها روسى
و نصيحتى انك تجيبها روسى لان مشاكل المصرى مبتخلصش
انا لما جبتها كان فيها مشاكل كتير جدا دا غير انها سقطت فحص لما جيت ارخصها
بس الروسى مفيهوش الكلام ده - عربية نضيفة فعلا و حمالة قسية لاقصى حد
و فعلا زعلان جدا انى بعتها لان معايا عربية ابطأ بكتير

انا من محبى الشد جدا و فى مرة لقيت بالصدفة عربيتين لانوس 2 بيشدوا مع بعض على مطلع فا انا جريت وراهم و لقيت نفسى برعشلهم عشان اعديهم و فعلا وسعولى و عديت منهم ببساطة
موتورها بسم الله ما شاء الله - قوى و فايق اوى - بس ممتعافاش اوى عليها عشان هى ملهاش ليميت Limit لكل سرعة زى اللانوس مثلا عشان الموتور ميتحرقش او يفوت بس ممكن تحرق لغاية 5500 او 6000 RPM كمان بس متزودش عن كده.

انا كان اخر حاجة اشد معاها لانوس او لادا قديمة شوية تسعينيات مثلا لانهم بالنسبة للادا دى ولا حاجة
انما شديت مع كورولا 1300 موديل 2002
و جبت 170 كم/ س مع شيفورليه كابرس (علما بأن اقصى سرعة 150 حسب ما مكتوب فى الكتالوج) يعنى ممكن تقفل عدادها
ملحوظة: و انا على 170 العربية مكانتش بترمش حتى, ولا بتتهز والدركسيون ثابت كأنى ماشى على 80
بس لازم و انت جايب السرعة دى - لو جبتها يعنى - تكون مطمن انك مش هتحتاج تقف بسرعة لان عيب اللادا ان فراملها مش زى اللانوس مثلا انما اقل شوية, بس مش بطالة طبعا

الشد ده كله مواتير ماليش دعوة بغرز و كده
الغرز موضوع تانى معتمد على السولق طبعا
و بجد بعت العربية و الراجل كان بيشكر فيها و هو واخدها امنى
اللى اقصده رغم الشد و الحرق الا انها متهلكتش
انما السوزوكى عموما مش حمال اسية زى اللادا
مهما تهين فيها هتديك

اللى حيران بجد يتوكل على الله و يجيب اللادا
مش هيندم

الف شكر عللى الرد الجميل وانا إن شاء الله هاجيب اللادا الروسى

نسيت اقلك حاجة
اللادا عيبها معروف انك تحس بالمطب اوى لانها ناشفة جدا
دا غير الالتو ناعمة عن اللادا كتيير
انا قلت اقلك عشان يبقى ضميرى مستريح
يعنى لو ميهمكش السرعة و يهمك النعومة هات الالتو
انما لو سرعة يبقى مفيش غير اللادا
يعنى متجريش جامد اوى فى طريق فيه مطبات هواء رخمة عشان دى مش Bmw
انما لو طريق سوى او مطبات الهواء بتاعته بسيطة اجرى زى مانت عايز و انت مطمن
و كمان كنت عاوز اقلك ان ثباتها تحفة ما شاء الله
كنت باخد بيها ملفات شوارع رئيسية على الواسع طبعا على 90 و 100 و كانت بتبقى ماسكة فى الارض كويس لان وزنها تقيل و ممكن تستوعب موتور اكبر من 1600 كمان و العفشة مش هتتأثر
بس ملحوظة صغيرة برضه: انا كنت باخد الملفات على السرعة العالية دى براحتى عشان كنت متعود اركب ناس كتير فيها فا مع الوقت - خلال شهور العربية ارتفاعها قل عن الأرض شوية بتاع 10 سم تقريبا فا ده افدانى كتير فى ثباتها لانه زوده اكتر ما هو
ممتاز و حتى ناس قالولى عليها شوية عشان الشكمان كان بيخبط فى اى مطب لو انا معايا ناس او المطب عالى شوية, فا انا قلت لا مش هعلى اخرها ايه يعنى الشكمان هيتخرم هروح الحمه, انما لو عليتها ثباتها هيقل عن اللى اتعودت عليه, فا احس بقلق
و حصل و شديت مع لادا 1600 على المحور بس موديل 1999 - طبعا قطعته موتور
انما النقطة ان لما وقفنا اتكلمنا قاللى انى كنت باخد غرز لو هو فكر ياخدها هيتقلب بسهولة مع انى من غير مبالغة بجد كنت باخدها و انا مطمن جدا و مش قلقان نهائى
بس عموما اللادا الجديد ثباته احسن من القديم بكتير

انا تقريبا قلت كل حاجة
و لو فيه اى ملحوطة كنت ناسيها و جت على بالى هكتبلك على طول ان شاء الله
و ربنا يباركلك فيها بإذن الله :)