الموضوع: بعض اخطاء القياده الى بشوفها فى السواقين

انا قولت اكتب الاخطاء دى الى بشوفها ودا بيضايقنى جدا وبيعرض حياتنا للخطر
1- احنا عكس جميع دول العالم السرعه البطيئه على الشمال واليمين السرعه العاليه والصح ان الشمال للسرعات العاليه واليمين للسرعه البطيئه علشان لو انتا ماشى على اليمين وسرعتك عاليه احتماليه وجود خطر على اليمين اكتر من الشمال وبالتالى لازم تمشى بسرعه على الشمال
2- عدم مبالاه البشر والناس للاشارات لو انتا عاامل اشاره يمين انسى ان الى جاي يقف دا لو محترم قوى ممكن يقف
3- الاولويه فى جميع دول العالم للمشاه دا واحد غلبان طالع عين اهله فى الحر وانتا قاعد على كرسى مش بتعمل حاجه ومشغل تكيف وكاسيت ومزاجك حلو وبعدين تلاقى واحد بيعدى عمرك ما تفكر تقفله لا تدوس بنزين اكتر علشان تسبقه
4- ياجدعان انا بحس ان الضغط على الفرامل دا عند الناس زى مايكون هياكل منه حته ارجوكم اضغطوا على الفرامل لما تلاقوا حد بيعدى حد وقف ادامك اى حاجه مش تقوم عامل كروس فجاه علشان تفادى الى ادامك بدون ماتضغط على الفرامل او تخلى الى بيعدى الشارع يطلع يجرى علشان ماتدوسهوش
5- عربيات النقل بتاعت الزفت الى اسمه اباظه دا سرعاتها عاليه جدا جدا وعلى طول محمله او مش محمله بتوقع رمل وظلط او بتعمل هباب وعفاره فى الطريق ياريت الى يلاقى سواق نقل بيجرى بسرعه ييجى ادامه زى ما انا بعمل ويعمل انتظار ويطلع ايده ويقوله هدى هدى النقل سرعه وقوفه ضعيفه يعنى لو الى ادامه فكر يقف فجاه انسى يا بتاع النقل هيدخل فيه وفى الى ادامه وهتبقى مجزره الى يشوف سواق نقل زايد عن 90 كيلو فى الساعه يهديه
6- التاكسيات لو حد شارولها يقوم واقف فى نص الشارع ويعطل المرور وراه علشان يركب واحد طيب حد يفهمهم ويفهم البشر كلها ان والله والله الضغط على الفرامل والركن فى جنب مش هياثروا معاه فى الفرامل او اى البنزين هوا ماشى براحه اساسا دوسه الفرامل لحد 60 كيلو مش هتخليه يتاكل ولا يسخن حتى
7- لما تشاور لتاكسى يقوم يقف بعدك ب كيلو وانتا تطلع تجرى وراه زى مايكون احنا شغالين عنده وهوا مش عايز منك الفلوس الى انتا بتدفعهاله
8-ربنا يجحم وياخد الى اخترع فكره ان كل ما حد ييجى يقف على مطب على الطريق السريع ولا حاجه يقوم مشغل الانتظار بقى معظم الناس كلها كل ما تلاقى ادامها مطب تقوم مشغله الانتظار انا مش فاهم غاويين تعب ليه ؟؟؟ وتانى حاجه شويه بقى وهنلغى لمبات الاستوب ونقضيها انتظار وخلاص ويبقى النظام عندنا فى مصر والعربيات الى تنزل ليها نخلى لمبات انتظار بدل لمبات الاستوب
9- مش هتكلم عن اللمبات المحروقه والفوانيس المكسوره والحزام والفاميه السوبر دارك الى مايشوفش حاجه منه ولا يشوف الى جنبه ولا الكلام فى الموب اثناء السواقه
10-واخيرا علشان ماتزهقوش منى الكلاكس معدش ليه قيمه خلاص ممكن تقعد تضرب كلاكس لواحد معدى الطريق ولا ياخد باله او لعربيه او لاى حاجه ولا ياخد باله ...... اقولكم حاجه انا لما كنت فى اوروبا كان الى يلمس بس الكلاكس لواحد قدامه كان انا طلعت وشتمت واحد بالاب والام تخيلوا دى بقى
11-
12-
.
.
.
.
.
.
مايتعدوش من الاخر خالص بقى احنا بنشوف بره بيعملوا ايه احنا نعمل عكسهم ودا اكيد اكيد من خلال ملاحظاتى لكل حاجه يعنى صدقونى لو انتوا حاولتوا تعملوا عكس كدا زى مثلا تقفوا لحد بيعدى الشارع على رجله يبقى كدا بتقلدوا المرور بره الصح
تحياتى
م / عاصم

-ربنا يجحم وياخد الى اخترع فكره ان كل ما حد ييجى يقف على مطب على الطريق السريع ولا حاجه يقوم مشغل الانتظار بقى معظم الناس كلها كل ما تلاقى ادامها مطب تقوم مشغله الانتظار انا مش فاهم غاويين تعب ليه ؟؟؟ وتانى حاجه شويه بقى وهنلغى لمبات الاستوب ونقضيها انتظار وخلاص ويبقى النظام عندنا فى مصر والعربيات الى تنزل ليها نخلى لمبات انتظار بدل لمبات الاستوب

لما يبقى طريق سريع و مفيش لافتة مطب...
اية المشكلة اني اشغل الإنتظار

افتكر في الفيات 500 الجديدة لما تدوس فرامل فجأة و انت على سرعة عالية بتشفل الإنتظار لوحدها !!