بسم الله الرحمن الرحيم

(ده موضوع فيه صور العربية بعد ما خلصت http://www.nilemotors.net/Nile/16720...eot-504-a.html )

العربية دي معانا من 25 سنة، مابتقولش لأ. آخر مرة جددناها كانت من 11 سنة و كانت على إيد الوالد. و استمرت بعدها عوامل التعرية في العمل (تشمل حكات، خبطات، بارومة إلخ..) مروراً بعمرة موتور كاملة، و مؤخراً العفشة اللي بقيت أشتم بسببها و أنا سايق و ما كانش عفشجي أو ميكانيكي راضي يمد إيده فيها إلا لما أصلح البارومة الأول. أيام و أيام تعدي لحد ما جت القشة اللي قصمت ظهر البعير

واقف في إشارة (واقف مش وقفت فجأة) و منتظر العداد يتاع الإشارة و إذ فجأة واحد بعربية 128 يلبس فيا من ورا. عادة لما حد بيلبس فيك من ورا و انت واقف بتسمع صوتين متتاليين:
1- إي إي إي إي إي
2- طاخخخخخخخخ

في اليوم ده شاء ربنا أني أسمع الصوت الثاني على طول، يعني دخل فيا بدون فرملة حتى و العربية نطت لقدام بعنف شديد و الطفاية وقعت و الموبايل وقع من الحامل و كنت هاخبط في اللي قدامي
أنزل ألاقي الخسائر عندي: الاكصدام اتلوح لفوق، السيتارة الخلفية دخلت لجوه، الفوانيس اتكسرت، الباب اليمين مش بيقفل مرتاح
و خسائر ال 128: الكبوت رجع لورا، الاكصدام اتعوج، واللي كيفني قوي ساعتها لقيت مياه مغرقة الأرض (الرادياتير بتاعه اتكسر) و ماعرف يدور العربية و الناس زقوه لحد الشارع الجانبي.






بعدها بدأت الرحلة

أولاً: السمكرة:
العربية كان فيها كمية بارومة معتبرة في النصف الخلفي عند البطيخة بالذات، و بارومة في القائم الأمامي الشمال، و في الدواسة الأمامية، و في داير العجل الأمامي طبعاً على خفيف
بالنسبة للصاج الخارجي ما غيرتش منه حاجة، حتى السيتارة الخلفية السمكري استعدلها و رجعت كويسة جداً
طبعاً فيه عفشجي جه عشان فك و تركيب العفشة، و فيه ميكانيكي عشان يرفع الموتور و ينزل الفتيس عشان كان فيه لحامات بين الصدر و الدواسة. و بعدين أي قطعة صاج تم تفصيلها و لحامها لازم تدهن بوتامين
من الحاجات المزمنة اللي كانت مضايقاني فتحة السقف، كان فيه قطعتين فايبر مكسورين في الخلف مسؤولين عن رفع الباب بتاع الفتحة لما تكون مقفولة، فكنت باضطر أسندها بزلطتين من الخلف عشان تتقفل كويس
طبعاً عشان تلاقي قطعتين الفبر دول استيراد ابقى قابلني لو حد رضي يفكهم لك من سقف عشان يبيعهم لوحدهم. بعد لف لقيناهم أصلي جداد بـ 60 جنيه و ركبهم و بقت 100%
شوية استعدالات بسيطة جداً في الصاج الخارجي و أصبحت العربة جاهزة للدوكو بعد 12 يوم

دي عينة للبارومة اللي اتعملت في النصف الخلفي

[youtube]http://www.youtube.com/watch?v=gtnq9oMPumA[/youtube]

السمكري أخد 1200 جنيه تشمل تقفيل العربية في النهاية



ثانياُ: الدوكو:

العربية قعدت عنده 7 أيام تقريباً لعمل التجهيزات اللازمة قبل الرش، و اتفقت معاه على رش لون سماوي ميتاليك اخترته من بين 4 درجات سماوي، و اتفقنا على بوية كابسي 2 كيلو و نصف لأن العربية هترش صالون و شنطة كمان.
مع أن ضميري يؤنبني أني ما اشتريتش البوية بنفسي و وديتها له الفرن ساعة الرش بإيدي.
حساب البوهيجي شاملاً الأجرة و المستلزمات و الفرن و بوليش بعد فترة إلخ.. كله 1300 جنيه

أنا غير راض 100% عن عملية الدوكو على بعضها، هي النتيجة حلوة جداً. لكن لو ركزت هتلاقي أماكن لم يتم تجهيزها جيداً، و أماكن واخدة ورنيش أقل من أماكن إلخ..
ملاحظة تانية أن الشنب تم رشه ثلاث مرات، المرة الأولى مع العربية في الفرن عادي، بعدين اتخدش منهم و هي في الفرن، المرة الثانية في الورشة عند البوهيجي عشان يداري العيب الأولاني، المرة الثالثة عند البوهيجي تاني بعد ما الشنب اتبهدل من أثر شغل الميكانيكية (بصمات، علامات أدوات + جاز إلخ...) لأنه ما كانش اترش كويس، في حين أن باقي الرفارف مع أنها اتعرضت لنفس الظروف عند الميكانيكي ما حصلش حاجة للبوية بتاعتها
ملاحظة ثالثة أني و أنا مروح من البوهيجي في الرشة الثالثة للشنب، العربية اتخبطت و هي واقفة ، عربية نصف نقل بترجع للخلف خبطت الرفرف الأيمن الأمامي + كسرت الكشاف الأمامي. طبعا اتنرفزت و شخطت في السواق و قلت له "أنا زهقت". الخبطة دي كلفتني 27 جنيه (السمكري ما خدش حاجة، وش الفانوس بالتركيب 12 جنيه، البوية من عندي، وديتها عند بوهيجي تاني خد 15 جنيه) و كنت أخدت من اللي خبطني 20 جنيه من زهقي بس.
طبعاً قرفت من شكل السمكري و البوهيجي، حتى ما رحتش عشان يعمل البوليش و اشتريت أنا علبة بوليش ميدو بخمسة جنيه و عملتها بنفسي في الجراج، أي نعم استغرقت ساعة و مجهود عضلي لكن النتيجة ممتازة. لمعة و نعومة و مقاومة للتراب و المياه
بعدين هابقى آخدها وش كومباوند تلميع خفيف و بعده طبقة شمع مستورد بقى مش ميدو.


ثالثاً: الكهربائي:
شغله كان مجرد تجميع لفوانيس و كشافات و الكاسيت القديم، التابلوه ما اتفكش و الضفيرة ما حدش لعب فيها. و العربية كانت متأسسة كهرباء كويس من آخر شدة (من 11 سنة)
اتضح أن وحدة السنتر اتحرقت بسبب مياه دخلت أثناء الشغل فاضطريت أغيرها (وحدة سنتر تايواني بالكتاوت بأربع بتوع اللي بيرفعوا و ينزلوا المسوجر مش عارف اسمهم إيه :)بالسلوك بتاعتهم ب 100 جنيه) و أخدت القديمة
اللي زاد على الكهرباء بعد كده أني وصلت 2 زجاج كهرباء أمامي مع وحدة رفع بما يشمله من مفتاحين للزجاج و كتاوت لوحدة الرفع و سلوك و كليبسات إلخ...، و أني ركبت كاسيت صيني بعد الفرش. الكاسيت أنا اللي ركبته لأني كنت زهقت من الصنايعية
شوية لمبات صغيرة + 2 فانوس إضاءة صالون (اللي بيبقى في القائم. و أبقيت على لمبتين بتوع الكشافين الأماميين
وحدة رفع تايواني (غريب) 40 جنيه
كتاوت لوحدة الرفع 18 جنيه
مفتاح زجاج كهرباء مضئ 12 جنيه الواحد
كاسيت صيني (هو مش كاسيت :) )Matsubishi MC-81 (يو إس بي، ميموري كارد، وصلة صوت Aux 3.5مم)، يشغل MP4, AVI, DIVX, JPG Mp3, WMA, بالـ subtitles و playlist إلخ... و يعرض بوصلة RCA عادية، و راديو إف إم و الموجة المتوسطة و فيه أوبشنز معقولة و ريموت و يخرج 4 سماعات مستقلين عن بعض 4x45 و صوته معقول بالنسبة لي (حلو جداً)
و سعره 240 جنيه و حاسس أني اتضحك عليا في سعره كمان

ركبت كمان لمبة استوب في الزجاج الخلفي غير اللي اتكسرت عندي و هي 40LED بإضاءة متقطعة مع النور الصغير و يضاؤوا بالكامل + 4 LED تانيين مع الفرامل، دي بـ 25 جنيه

رابعاً: السروجي:
كان الاتفاق معاه على فرش السقف + تفصيل أرضية جلد للصالون و الشنطة و تجميع باقي الفرش

اشتريت الآتي:
- فرش سقف 504 مفتوح جاهز 80 جنيه
- 5 متر أرضية جلد أسود للدواسة و الشنطة 135 جنيه
- رف خلفي للسماعات 15 جنيه
- 2 جنب سماعة (للسماعة الأمامية) 10 جنيه
- 1 متر برواز كحلي 10 جنيه
- فرخ سفنج سمك 1سم 10 جنيه
- جالون كلة 40 جنيه
- جلد أسود للقوائم 15 جنيه
- كليبسات و مسامير 20 جنيه
- 1/2 متر موكيت أزرق (لفرش الأبواب) 15 جنيه
- كاوتش حرارة لعصا الفتيس 5 جنيه
فرش الكراسي كان كويس و مغيرينه قريب فخليته زي ما هو

خد أجرة 400 جنيه و شغله ما شاء الله ممتاز و العربية راحت له 10 صباحاً استلمتها 8 مساء. شغله سريع جداً


بعد الفرش كان لازم أقفل العربية فرحت جبت البربيز الأمامي و الخلفي و ركبتهم عند واحد بتاع زجاج بالنيكل بتاعهم و أخد 30 جنيه

خامساً: ضبط الأبواب:
ده يشمل كاوتش أبواب جديد (يسموه كاوتش تراب) الطقم لأربع أبواب تايلندي بـ 160 جنيه + طقم الفبر بتاعهم مصري بـ 35 جنيه + كاوتش كورسليه (اللي بيركب في قوائم العربية) و ده 14 متر أسباني المتربـ 7جنيه
بعد تركيب الكاوتش (عند السمكري) الأبواب تحتاج ضبط ، و ده عند واحد شغلته ضبط أبواب و زجاج بس. سألت واحد عندنا عمل فيها دكتور و بيقول لي 120 جنيه!! رحت لواحد تاني سمعته ممتازة و كنت عنده الساعة 10 صباحاً. العربية قعدت عنده 6 ساعات قام خلالها بتفكيك ميكانيزم الأربع أبواب و أقفالهم كاملة و تنظيفها و ضبطها مع بعض الدقدقة على الأبواب و القوائم و إزالة بعض زوائد الكاوتش من الأبواب، و ركبت عنده 2 ماكينة زجاج ياباني استيراد للبابين الأماميين
فرق السماء و الأرض بين حالة الأبواب و قفلها و فتحها مقارنة بقبل كده.
الأجرة (ضبط الأبواب و تركيب ماكينات الزجاج) 50 جنيه
2 ماكينة زجاج 180 جنيه
2 اكرة باب خارجية 44 جنيه










Uploaded with ImageShack.us




سادساً: العفشة
2 مساعد Monroe امامي 480 جنيه من عند هشام لهيطة بضمان سنة
2 مساعد Monroe خلفي 440 جنيه
2 ياي أمامي 8 لفة استيراد 150 جنيه
طقم جلب عفشة كامل 105 جنيه
طقم أطباق عفشة 25 جنيه
كاوتش طعمية 10 جنيه
2 كرسي صالة خلفى 60 جنيه

المساعدين عاجبيني بصراحة




فرق كبير بين العفشة قبل و بعد، المساعدين الجداد أنشف من القديم شوية لكن أفضل بمراحل في السفر + المطبات و عيون القط إلخ.... السوست الجديدة استجابتها أحسن في المطبات و الفرملة و الملفات
السوست الجديدة 8 لفات استيراد ركبتها بدون علايات
السوست القديمة 9 لفات بتوع العربية من 1977 و كانوا راكبين بعلايات
ارتفاع العربية قبل زي بعد بالضبط، (أربع صوابع بين الكاوتش و الرفرف) و بافكر أعليها من قدام شوية كمان

رحت ضبطت زوايا عند واحد عندنا، ما عجبنيش، و بعد أسبوع رحت لواحد مشهور جداً اسمه "سيد شيبوب" عملت ترصيص 4 عجلات و زوايا و ضبط الطارة، فرق كبير جداً و عملهم بـ 35 جنيه


سابعاً الميكانيكا:
طقم كهرباء (بوجيهات، أبلاتين، كوندنسر) 55 جنيه
طقم فبر بوجيهات 25 جنيه
طقم سلوك بوجيهات 55 جنيه
فلتر بنزين 5 جنيه
ضبط كهرباء و كاربراتير و غسيل موتور بالبنزين (البنزين أرخص و أنظف لكن يجب فصل البطارية و عدم التدخين) و أجرة ميكانيكا و عفشة 80 جنيه
تشحيم كامل + تغيير زيت كورونة (لازم بعد مشوار طويل عشان ينزل بسهولة) + تزويد زيت فتيس 40 جنيه

ثامناً: الجنوط و الكاوتش:
جنوط 14X6 شكل اسمه (سبعات و تمانيات) Made In Indonesia 1150 جنيه


4 فرد كاوتش FULDA مقاس 195/70/14 بولندي نقشة اسمها carat assuro
1380 جنيه


كان في مشروع أني أجيب جنوط استيراد 16 إنش و أركبهم بفلانشات و كده لكن رحعت في كلامي، مع أني نزلت الحرفيين و عزبة شلبي و دورت بضمير فعلاً
http://www.nilemotors.net/Nile/154425-16.html
3 أسباب أني جبت الجنوط المنتشرة بتاعة البيجو:
1- فرق السعر لو ركبت كاوتش 16 ده سبب رئيسي
2- أي مشكلة في الفلانشات عواقبها وخيمة
3- شكل الجنوط ما كانش هيمشي مع جو السبعينات، فكرت أجيب جنوط 505 استيراد 15 إنش لكن قلت الجديد جديد بقى http://www.nilemotors.net/Nile/114628-15-504-a.html


تاسعاً: الشكمان:
كنت مركب 3 علب شكمان جديدة من سنتين تقريباً و كانت عمولة، بعد الشغل اللي حصل ده وصل الشكمان لدرجة من السوء تطلبت أنه يتغير كله تاني
جبت شكمان كامل جديد بتاع شركة اسكندرية (الشروق) و اتكلف 480 جنيه المواسير من بعد الفرن + 3 علب جديدة. الصوت بقى طبيعي و ملاحظ أن حرارة العربية نزلت شوية كمان. لكن لسه صوت الرنين المعدني بتاع العلب الجديدة خاصة عند 2500-2750 RPM لحد ما "يشربن"





Uploaded with ImageShack.us




شوية رفايع:
عدد 2 فانوس أمامي 120 جنيه
عدد 2 فانوس خلفي تونسي 85 جنيه
عدد 2 فانوس إشارة مصري 30 جنيه
عدد 2 إشارة (غماز) رفرف 15 جنيه
عدد 2 مساحة زجاج 25 جنيه
علامة 504 و PEUGEOT نيكل 25 جنيه
هواية سقف ألماني 175 جنيه (أيوة الهواية بـ 175، في حين أن البربريز الأمامي بالتركيب 175 جنيه برضه و كان د/جريش و بشماسة و سيكوريت) هي ماركة Clim Air ألماني، و كان في هواية مصري بـ35 جنيه و تانية بـ 50 جنيه، لكن مجرد تمسك التلاتة في إيدك هتقرر هتشتري أي واحدة
اكصدام أمامي إيطالي 230 جنيه
عدد 4 ركب (عرايس) للاكصدامين 70 جنيه




Uploaded with ImageShack.us

لصقت استيكر عاكس داخل الفوانيس الخلفية و فوانيس الإشارة الأمامية و النتيجة أفضل من الأول بكتير
دي صور أثناء اللصق



Uploaded with ImageShack.us


ودي فوانيس قبل و بعد، الفرق واضح






و عدلت نور العدادات + عملت عداد RPM بلمبات LED
http://www.nilemotors.net/Nile/166245-504-led-rpm.html




إن شاء الله الصيف الجاي هنقفل الزجاج (نركب تكييف يعني)