الموضوع: الكهرباء بتقطع وانا فى عز الشغل معقول الاستهتار بالناس دة ؟!!

المشاركة الأصلية كتبت بواسطة ahmed4000

طيب سؤال بسيط...الحكومة مهملة ومقصرة...لكن هل حضرتك شايف انك بتستهلك الكهرباء والمياه باعتدال زى مبتستخدم الموبيل مثلا او الانترنت زمان لما كان بالدقيقة؟

لو بتتكلم بالنسبة لي شخصيا فان فاتورتي الشهرية من الكهربا 150 جنيه
بفتح تكيف واحد في الايام شديدة الحرارة و في النهار فقط و بتجمع كلنا فيه
الساخن كهربا و بفتحه لما احتاج مياه ساخنه
اللمبات المفتوحة فترات طويلة اما نيون او كومباكت
الكمبيوترات و التلفزيونات بتتفتح علي حسب الحاجة
المياه مع فاتورة العمارة شخصيا مش بغسل السجاجيد و لا الشبابيك زي بعض الشقق و بكتفي بالكنس و التنضيف علي الناشف و معنديش حمام سباحة و لا جنينة
من الاخر مواطن عسول و ده حال اغلب المواطنين في البلد دي

اما لو بتتكلم عموما فان نظام المحاسبة في مصر بيعتمد علي الشرائح يعني كل ما بتستهلك اكتر كل ما بتحاسب الاستهلاك الاعلي بسعر اكبر يعني زيادة مطردة و بشكل كبير و ده يخلي اي عاقل يحاول السيطرة علي استهلاكه لانه حيلاحظ هبوط كبير في الفاتورة
و لكن اللي مش فارقه معاه دفع حق الكهربا و زيادة و ليس تفضلا من الحكومة لان في الخليج الاستهلاك اعلي و قيمة الكهربا اقل و في بعض الدول المياه مجانية بدون فواتير

المشكلة في موضوعك الاخر هو انك خلطت مابين جزئين الخبر بتاع الوزير و دعوتك او رؤيتك لعملية الترشيد
الجزء بتاع الترشيد محدش يقدر يعارض في حرف واحد منه لان المستفيد الاول هو الشخص العاقل الي بيزبط احتياجه و يقلل استهلاكه و بالتبعية بيستفيد بالمكسب و العائد

الجزء الاخر بتاع الخبر بتاع الوزير هو ده المشكلة
لحد النهاردة في قري مدخلهاش النور و الكهربا و المياه و الصرف
المشكلة بدءت من عدة سنوات و كانت الانقطاعات اقل من الوضع الحالي و لم يحدث شئ من وقتها

اذا لما يجي الوزير يقول انتوا السبب انتوا اللي بتحملوا علي الشبكة يبقي وزير غايب عن الواقع لانه عايز يحاسبنا كلنا كشعب بنفس حساب الواحد في الميه اللي عندهم تكييف مركزي في الفيلا او القصور مفتوح 24 ساعة
في حين ان في ناس لحد دلوقت استهلاكها تحت ال 30 جنيه مش اكتر من لمبة و تلفزيون و تلاجة صغيره

الخلاصة الترشيد علي العين و الراس
لكن تحميل الشعب عجز و بخل الحكومة في تطوير البنية التحتية غير مقبول اطلاقا