العربية ممتازه ما شاء الله .. أولا شكل شبابى و الكبود عالى و صاجها تقيل .. أنا كان معايا سوزوكى سويفت كان أى حاجه تريح عليه الصاج يتطبق .. بجد الكورسا فرق شاسع .. كذا مره أتحك أجيب قطنه و ميه وترجع زى الأول .. يعنى الصاج مبيدخلش لجوه.
الموتور : السحب ممتاز جدا و موتورها ناعم و صوته قوى لما تقرص عليه.
الاستهلاك: عادى بالنسبه لعربيه 1600 سى سى .. يعنى متوسط 200 كم/الصفيحه جوه البلد.
الكماليات: جميع الكماليات .. تكييف .. سنترلوك .. باور ستييرنج .. 4 زجاج كهرباء .. 4 وحدات رفع .
مساحات التخزين: ممتازة جدا .. أربع حامل أكواب .. باكيتات فى الابواب .. درج التابلوه واسع جدا و مضاء .. مساحات تحت الكاسيت و فى التابلوة.
الثبات: ممتاز .. جبت بيها 160 بس للأسف . بس واحد صاحبى جاب 210 و بيقولى كانت كويسة.
العفشه: ناشفه الى حد ما .. يمكن عشان يخلوا العربية ثابته .. و يمكن عشان العربيه كنزة شوية .. ويمكن عشان الكاوتش عندى ماكسس (ناشف شوية).
التكييف: ممتاز جدا .. ميفرقش حاجه عن الكورى سواء فى البروده أو فى سرعة الوصول لدرجة البرودة.
أسعار قطع الغيار: كلها عاديه .. الفوانيس أسعارها بتدور حوالين 200 جنيه .. سير الكاتينه 60 جنيه .. سير الدينامو 90 جنيه .. بلية الكاتينة 220 جنيه .. فى موضوع عن أسعار قطع الغيار لو تحب تراجعه .. الغالى فيها اسطوانة الدبرياج و الديسك ب 900 جنيه .. و البلية ب 850 جنيه تقريبا.
العيوب: بتحتاج تغير اسطوانة و ديسك على فترات أقرب من العربيات التانيه .. يعنى حوالى 50 ألف كيلومتر .. و بيختلف حسب طريقة سواقتك .. أنا عربيتى داخلة على 80 ألف كيلو و لسه متغيرتش .. بس لما بقف واطلع كتير بحس انها بترج معايا شوية .. الكنترول باظت مع واحد صاحبى و جاب واحدة استيراد.
العربيه كتقييم عام .. أنا شايفها أحسن العربيات فى سعرها .. أنا قبل ما أجيبها كنت بفكر فى لانوس أو هيونداى .. انما دلوقتى بجد صعب جدا ان انا انزل منها على حاجه من دول (مع احترامى لهم).
اتمنى اكون افدتك و ربنا يوفقك لما فيه الخير.
المفضلات