الموضوع: قلة ادب وعدم تربيه ... معقول حالنا وصل لكده؟؟؟

انهارده كنت انا ووالدتي في نادي مشهور في اسيوط

النادي ده مشهور بنضافته ومستوي الخدمات فيه ويعتبر من ارقي نوادي اسيوط

قاعدين انا ووالدتي واخويا الصغيروفوجئت بتلات بنات وشابين

بنتين منهم تقريبا اخوات (حوالي 24 سنه)

كل شويه الواد يشيل البنت ويقعدها فوق السور

والبنت لما تيجي تنزل تقول الواد الي معاه نزلني (بيبدلوا عليهم)

وحاجه اخر مسخره وقلة ادب

شويه والموضوع زاد وقلب بان البنت قاعده علي السور والواد واقف عادي والبنت بتتفرج علي حاجه في الموبايل

بس حاضنه الواد من رقبته

وفي بنت تاني قاعده جمبهم

ده كله في الطرقه الرئيسيه بتاعة النادي

في بقي قدام السور الي بيقعدوا عليه ده سور تاني صغير حوالي 30 سم

الواد التاني اخد البت التالته وقال ايه بيمشيها علي السور

حظه الوحش اني كنت قاعد جمب السور ده

البت عدت المره الاولي وانا بقول يا واد ملكش دعوه

المره التانيه تعدي واقول يا واد فكك دي عالم مش محترمه

المره التالته بقي لاقيتني وقفت وقلتلها يا ماما خدي الواد بتاعك ده والعبي بعيد لان منطقة لعب الاطفال مش هنا

فضلت ماشيه شويه قدام والواد عامل عبيط ومش سامع

فالبنت بتقوله انتا مسمعتش والولد ده بيعاكسني؟

فانا رديت وبقولها اعاكسك ومعايا امي يا روح تييييييييييييييييت

المهم الولدين بقي اخدتهم النخوه ولسا عيل فيهم هيتكلم

لاقيت كل شباب النادي اتلم وكلوا كان واخد بالوا بس مستنين اول واحد يتكلم

وطلبوا مدير النادي وحكوا علي المناظر الزباله الي كانت بتحصل

والواد مصر برضه يتخانق معايا

وامن النادي جه وشد الولاد والبنات علي بره

وواحده ست قامت بتكلم البنات وهزقتهم وانتوا ملكمش اهل وانتوا وانتوا وانتوا

واد فيهم لسا بيجعر وراح واخد قلم محترم من الراجل جوز الست الي كانت بتشتم البنات

انا حسيت ان طبلة ودنه اتخرمت اساسا

والشباب تسقف ووتهيص

المهم طلعوا بزفه وفضيحه من النادي

انا فضفضت معاكم لاني من وقت الموقف ده مش قادر اتصور ولا اتخيل الي كان بيحصل

ومعقوله مستوانا وصل لكده بقيت الحاجات دي علني كده؟؟؟

وواد زي ده ازاي تاخده النخوه علي واحده تييييييييييييت زي دي؟؟

انا فعلا لحد اللحظه دي مش قادر استوعب الموقف

A.Yakout