الموضوع: عاوز اشترى تيريوس 1999 مستعمله فإيه اراء الساده الخبراء

المشاركة الأصلية كتبت بواسطة mo7a_mo7a

بالنسبة للاوتوماتيك منصحكش بيه اولا لانه مش مناسب للطرق المصرية نتيجة الزحام وكثرة النقلات اللي بتقصف عمره
ثانيا الميكانيكية بتوعنا مبيفهموش فيه وغير كده تمنه غالي لو لا قدر الله احتجت تغيره (حوالي 7000)

الاوتوماتيك معمول اصلا علشان يبقى مريح في الزحام و يريح اللي سايق من كثرة استخدام الدبرياج
و ما يبوظوش الا الاستخدام الخاطيء و عدم الاهتمام بالزيت و الصيانة
غير كدة عمر الفتيس الاوتوماتيك يتعدي مئال الوف الكيلومترات

لكن يعيبة زيادة استهلاك الوقود زيادة بنسبة بسيطة و زيادة استهلاك تيل الفرامل كذلك

7000 جنية في فتيس تريوس !!!! دة كدة اغلى من فتيس الشيروكي او الفرونتيرا استيراد بيعمل 3 او 4 الاف

اعتقد انة استيراد لن يتعدى الف و نص او الفين في كل الاحوال, و مش لازم يجيبة جديد من التوكيل (اذا لا قدر الله احتاجه)

المشاركة الأصلية كتبت بواسطة egypt_slave2000

يعنى يوم ما اوصل 110 على الصحراوى ببقى حاسس انى هطير

110 في طريق سفر كتير على العربيات دي لان اي عربية 4*4 بتبقى عالية و مابتبقاش ثابتة في الملفات على سرعات عالية بسبب ارتفاع مركز ثقل السيارة عن الارض

و التريوس بالذات العربية خفيفة و مش عريضة بينما هي عالية قويو دة بيخليها مش ثابتة في الملفات في السرعات خالص و سهل جدا تتقلب, بس مع كاوتش مداسة عريض بيتحسن الثبات قوي بس بيبقى على حساب السحب و ان الكاوتش يحك في الرفارف في المطبات العالية

المشاركة الأصلية كتبت بواسطة mo7a_mo7a

العربية دي عالية وفيها نظام تعليق خاص بالسيارات الدفع الرباعي وكل ده بيقلل الديناميكية الهوائية للعربية لكن بيديها ميزة نسبية وثبات علي في الطرق المكسرة والوعرة

مشكلتها في الارتفاع و قلة عرض السيارة بتخللي مركز الثقل مرتفع و عرضة بسهولة للانقلاب في الميل المفاجيء او الملفات سواء على طريق او Off Road و دي سمة كل العربيات ال 4*4 بسبب الارتفاع

المشاركة الأصلية كتبت بواسطة egypt_slave2000

غير ان معايا اسرتى ، فمساله الثبات فى السيارات العاليه مش مشكله بالنسبه ليا حسب مفهمتا

جرب العربية قبل ما تشتريها

و كمان جربها في طريق و اسحب بيها و شوف ثباتها

و من حيث الاتساع هي مش عربية عائلية قوي علشان ضيقة من جوة و شنطتها صغيرة يعني مش مريحه في السفر لعائلة من اربع اشخاص بشنطهم و موتورها مش حايسعف مع وزن و حمولة و حاتلاقيها تقيلة قوي و مخنوقه وموتورها حايستهلك بتكرار الاحمال

المشاركة الأصلية كتبت بواسطة egypt_slave2000

انا بس خايف من اعطال الاوتوماتيك فى موديل بقاله عشر سنين ، وياترى ممكن اصلاح الاعطال دى بره التوكيل ولا لا خصوصا انى مش من القاهره ، ( من الزقازيق)
شكرا

لو العربية نضيفة و ماشية كيلومتر قليل و اللي راكبها كان بيهتم بيها و بقطع غيارها و صيانتها ماتقلقش
و جربها كويس و اكشف عليها و ما تخليهوش يقولك اصل الفتيس عاوز يتغير لة زيت لو حسيت انة مش بينقل كويس او بيفوت

و الزقازيق عامه فيها ميكانيكية و عفشجية تمام و من عندك اخطف رجلك للمنزلة او المنصورة فيهم صنايعية 10 على 10

التريوس ميزتها جوة البلد صغيرة و خفيفة و قطع غيارها معقولة و بتوفر بنزين و تنفع مع طرق مش ناعمه و عربية سهلة و مفهومة مش معقدة في موتورها و لا صيانتها بس برضة نصيحتي انك تجربها و تشوف حاترتاح معاها و للا لأ من حيث الاتساع و بالذات الكنبة الخلفية و مساحه الشنطة لو بتسافر كتير
و جربها من ناحية الجري و الثبات كمان لان زي ما فهمت حضرتك جديد في السواقة

و ربنا يوفقك