الموضوع: عن قطع الكهرباء اتحدث

المشاركة الأصلية كتبت بواسطة maka

نبداء كلامنا بالصلاة على سيدنا محمد

و نتكلم براحة و بهدوء و انا هتكلم من واقع دراستى

دلوقتى كلنا بنعانى من قطع الكهرباء بصفة مستمرة تصل الى يوميا او مرتين فى اليوم انت و نصيبك

و طبعا الكل بيتضيق و فيه ناس مصالحها بتتعطل و ممكن تقف بسبب القطع

والكل عارف ان القطع نتيجة ان الاحمال المستهلكة اكبر من الانتاج - و متخليش حد من بتوع 121 يضحك عليك و يقولك اصل الشبكة ضعيفة و الكابل سخن و المحول هيتحرق و الهجس ده كله -

وشوية معلومات كده على الماشى :

1- 60% من احمال مصر احمال سكنية - يعنى الحكومة عارفة كده من زمان -

2- وقت الذروة فى مصر بيبدا تقريبا من 6 انتهاء ب 11 تقريبا - و اكيد الوزير عارف الكلام ده من زمان مش الشعب فجاءه و قرر يغير وقت الذروة -

يعنى الحكومة عارفة الوضع بالكامل مصحيتش من النوم لقيت الوضع كده

نيجى بقى للى بيقولك اصل احمال مصر بتزيد زيادة مستمرة و متزايدة هقوله امين بس هقوله فيه مادة بتتدرس لطلبة الهندسة اسمها التنبؤ بالاحمال المستقبلية - وده علم مش دجل - و هى عبارة عن تسجيل لاحمال السنوات السابقة و عن طريق شوية معادلات تقدر تحدد الاحمال فى السنين القادمة , يعنى وزارة الكهرباء مصحيتش على مصيبة لا كانت عارفة و متوقعة و كان فيه دكتور ايام الكلية توقع اللى هيحصل لو فضل الانتاج ثابت

نيجى لحوار ساعتيين و 16 مليار جنية , اولا فيه طرق ارخص من بناء المحطات الا و هى الربط الكهربى مع دول الجاور لاختلاف وقت الذروة زى الربط ما بين مصر و السعودية اللى متوقف لاسباب سياسية لا يعلمها الا الله

و فيه نظام اسمه b.o.t ) build operate transfer) و متبع علا فى بعض المحطات و هو ان مستثمر - قطاع خاص - هيبنى محطة توليد و الربح هيكون ليه و يسلمها للحكومة بعد عدد من السنيين حسب الاتفاق

و اخيرا نفرض ان كل ده مش متاح و الحل هو البناء الحكومى اقولك ما فيها ايه ما الوزارة هتاخد ال 16 مليار ترميهم فى البنك و تسند البناء لمقاول و كل ما يخلص جزء تسلمه شوية فلوس و بناء المحطة اقل وقت ممكن تاخده سنتين و نص حسب ما اتذكر

و طبعا فيه وسائل اخرى الدول بتتبعها لتقليل الاستهلاك فى ساعات الذروة - علشان العملية متخرجش من تحت ايديهم زينا كده - :

1- فصل الصناعات الشرهة لاستهلاك الكهرباء فى ساعات الذروة- مش بتطبق فى مصر تماما -

2- يغلى قيمة الكيلو وات فى ساعات الذروة و ده بيجبر الناس على تخفيض الاحمال

3-وضع قانون يجرم استخدام السخانات و التكيفات مثلا فى ساعات الذروة و فيه دول بتجبرك على توصيل اجهزة معينة بوصلة خاصة بعيدة عن وصلة المنزل نفسه علشان فى وقت معين يقدر يفصل عندك احمال معينة مش البيت كله

4 - وضع عدد معين من الكيلو وات للمحلات شهريا عن طريق العداد ابو كارت - و لو خالصهم ذنبه على جانبه - و طبعا الوضع ده بيجبر اصحاب المحلات على تخفيض الاضاءة و احمال التكييف

5- الكل عارفها و هى تخفيض اضاءة الشوارع , حتى دى بتم فى مصر غلط يعنى النور ميبقاش منور زى الظهر فى شوارع المنطقة الصناعية باكتوبر ليلا و طافى فى شارع الهرم ولا البحر الاعظم

6- فيه طرق كتيير بس الواحد مش فاكر

7- فصل الاحمال عن بعض الاحياء نتيجة عدم القدرة على مواجهة الاستهلاك - و بالمناسبة بيعتبروها طريقة غير ادمية -

و طبعا الفصل فى مصر مش عادل يعنى يتكاء قوى على المناطق الشعبية و المتوسطة مقابل انه يدلع المناطق الراقية - فى يوم من الايام النور قطع فى ساقية مكى 4 ساعات و فى نفس الوقت قطع فى البحر الاعظم و رجع بعد تلت ساعة مش 4 !!!!!! -

طاب احنا هنقف مكتوفى الايدى ولا ايه يا جدعان , طبعا لا فى حلول و هى

1- حل غالى جدا : و هو انك تروح تسكن فى شارع فيه وزير او راقصة مشهورة او لاعيب كورة مشهور

2- حل غالى بس : هات لك مولد و شغله لما النور يقطع

3- حل رخيص : هات لك سكينة قلابة بس ينفع لو الكهرباء بتقطع عندك فازة و فازة و يعنى قاطع عندك و الشقة اللى جانبك منورة و لازم يكون عددك سينجل فيز , و السكينة ال 60 امبير ب 30 جنية

4- حل سهل : كتر من الدعاء على الحكومة و اللى جاب ابوها و اوعى تزعل الحاجة لتطسك الدعوة النور يقطع يوم بحاله

و اخيرا ياريت اصحاب مقولة ابداء بنفسك و اطفى التكييف و نور لمبة سهراية و شغل التليفزيون بالمنافلة يمتنعون لاننا عاملينا زى ما يكون واحد مديون بمليار دولار و بنلم من بعض بالشلن و التعريفة و اللى هيعمل كده هيعذب نفسه طول اليوم و فى الاخر النور هيقطع برده لان المنظومة بتدار بطريقة غلط من الاول

و متحاولش تكلم 121 لانك هتضيع وقتك و فلوسك ما بين انتظار طويل جدا او السكة تتقفل فى وشك او تقل ادبك على موظف بارد ملوش ذنب الا ان دى شغلته اللى بياكل منها عايش


و اسف على الاطالة

للاسف وزير فاشل - قضى على انجازات المرحوم ماهر اباظه- قطاع الكهرباء - دخله تضاعف 10 مرات عن ايام ماهر ومع ذلك التطوير والصيانه كانوا فى الهجايس- كلمه صيانه عندهم هى تنضيف الاكشاك والكابلات فى الشتا- ودمتم- وعلى كده بتتصرف حوافز ومكافات بالملايين للبهوات طبعا- وما تغركش كلمة تنضيف- ده هى فرشه ومقشه ليف كحيانه بيشيلوا بيها التراب من الاكشاك فى ساعتين زمن واقلب

معلشض المواطن مش ناقص علشان نتكلم عن شرائح جديده فى التكلفه زى ساعات الذروه- الحل اللى ما قلتوش- ان ضميرهم يصحى شويه ويخفوا اللهف شويه-
والمصانع اللى بيملكها البهوات ترشد هى استهلاك الكهربا - وبلاش استرخاص فى معدات الانتاج

التوصيلات العشوائيه والهرجله فى التوصيلات الجديده- بتضيع احمال كتيره

فيه بقى سؤال - مين المسئول عن تخلفنا 20 سنه عن ادخال المحطات النوويه للحصول على الطاقه - !!!!!!!!!!

السد العالى - زمان قالوا- ايام المكحوم عبد الناصر انه حيخلى الكهربا ببلاش- هههههههههه
دلوقت اللى طالع منه مش مكفى مصنع الالمونيوم فى نجع حمادى

نفسى افهم اللى بيحكم البلد دى ويكون اصلا مصرى - ليه دايما يعمل ضد مصلحتها - الله يرحمك يا محمد على- عايزين ريس تايوانى يا خونا - التجميع المحلى فشل

كنت في مشوار امبارح في القاهرة
و كان طريقي معدي على الزقازيق (و الشرقية عموماً)

المنظر بصراحة كان مؤسف
كل القرى في الشرقية كانت الكهرباء فيها مقطوعة
الزقازيق نفسها كانت معظمها مقطوع فيها الكهرباء ..غير عند المحافظة طبعاً (لازم تكون منورة يعني)

و بعدين عايزين من الشعب ده انتماء ؟؟!!