الياريس وصلت ..... بس لسة الورق!!!

**goodwave** · 07-03-2008 10:57 AM

دموع الثلج.... الله يبارك فيكي..... انا بصراحة مش فاكر المصاريف بالتفاصيل.... بس الجزء الكبير من المصاريف بيروح في الضريبة حوالي 85 جنية والتأمين حوالي 50 جنية والطفاية حوالي 102 جنية .... اما الباقي دمغات ورسوم فحص وخلافة..... شوفي الإكراميات كتيير اوي بس للاسف في بلدنا من غير إكراميات مفيش حاجة حتمشي وكمان الراجل إللي خلص لي الورق كان لازم يراضي الناس وكمان ياخد اتعابة..... أعتقد لو كنت انا رخصت بنفسي كنت حدفع حوالي 300 جنية بس حدفع معاهم وجع دماغ وحرقة أعصاب وسب ولعن في الناس والحكومة والروتيين وووووو وحاجات كتير ..... فدفعت 100 جنية زيادة وإشتريت راحتي.
على فكرة إنتي لو في إسكندرية انا ممكن أعرفك على الراجل دة وهو سالك جدا ويخلص كل حاجة وأتعابة مش كتيرة.

سعداوي..... الف مبروك ياباشا وربنا يبارك لك فيها.... الاسود ملك الالوان بس فس مصرنا المحروسة حيجبلك الضغط.... انا لسة ما شغلتش التكييف وماشي واحدة واحدة.... بس تمشي من غير ترخيص..... الله معاك لو إتمسكت حقولهم انا معرفكش!

السندريلا.... شكرا للتهنئة مرة تانية.... على فكرة مقارنة بالمبلغ إللي إنتي دفعتية مش كتير إللي انا دفعتة لأن الفرق بين ترخيص سنة وتلات سنين هو الضريبة فقط! بخصوص الرهبة والله الحمد لله وبيقيت احسن بس انا مش بخرج بيها كتير لأني في العجمي والشوارع متكسرة ومستني الشوارع تتصلح علشان أمشي براحتي.

كينج ماكس... شكرا للتهنئة وربنا يبارك لك في عربيتك

ليمو.... شكرا يا باشا كلك ذوق وهي فعلا عربية ممتازة والحمد لله.

**Moh.Fahmy** · 07-03-2008 02:53 PM

الف الف مبروك احمد باشا و لو اني زعلان منك كتيير عشان ما بتتصلش بقالك مدة طويلة
ربنا يديك خيرها و يكفيك شرها يا ابو كنزي ...حصلت اخوك محمد ابراهيم ..كنا عايزين اللانسراوية يكتروا في اسكندرية انما النصيب بقي
كنت عايز اسألك عن النمر التجارية ..مش المفروض الرزق بيديهالك لحد ما ترخص و لا بيسلمك العربية من غير نمر..؟
و برضه بالنسبة للراجل اللي بيخلص مش المفروض انه من التوكيل او المعرض المفروض ان ده شغله و انت بتراضيه بس مع اني كان رأي انك ترخص 3 سنين احسن بدل ما تروح المرور كل سنة

و علي فكرة الاجراءات بالنسبة للزيرو مافيش اسهل من كده بتخلص في نص ساعة لانك مش محتاج فحص و لا غيره ده حتي في محرم بك بتلاقي الزيرو ليها مكان لوحدها

عايزين نشوفك بالياريس يا ابو حميد
يعني بقي مش معني اني اختفيت شوية اننا ما نشوفش بعض يا اخي ...انا كان عندي ظروف غصب عني لانها ظروف تقنية خاصة بالشغل و user بتاع الشغل فكان فيه تعليمات ان مافيش حد يدخل علي النت و عشان user بتاعي في الشغل هو هو بتاع البيت برضه فما ماكانش بينفع زي دلوقتي هما سمحولنا شوية كده حتي اشعار اخر لدواعي امنية

محمد فهمي

**goodwave** · 07-03-2008 03:27 PM

محمد باشا فهمي حبيب قلبي..... على رأي أم كلثوم أنساك ده كلام أنساك يا سلام أهو دة إللي مش ممكن أبدا أبدا:)

بس انا كنت واخد على خاطري منك علشان دايما انا كنت بسأل وإنت ناسيني بس مفيش بين الإخوات زعل وكمان بعتلك السلام أكتر من مرة مع أخونا محمد إبراهيم وهو قالي إنكم كنتم حتتقابلوا بس يومها انا كنت بستلم وبرخص في نفس اليوم.

يا باشا كان نفسي أرخص 3 سنين بس لما تكون مقسط تبع بنك لازم ترخص سنة بسنة..... اما الرزق فهو إداني نمر تجارية بس ليوم واحد وما دفعتش فيهم حاجة.

بالنسبة للترخيص فوالله يا اخي متقدرش تعرف المطلوب كام بالظبط..... يعني مثلا الطفاية ناس تقولك ب 80 جنية وناس تقول ب 100 وناس تقول 115 وانا الفاتور بتقول 98 جنية بس الراجل واخد مني 102!!!

بالنسبة للفحص لازم حتى في الجديد وهو بيكون فحص سوري اي كلام ..... المهم هو بصمة الموتور والشاسية إللي بيتاخدوا في الاول وحتى إللي بياخدهوم بياخد 5-10 جنية إكرامية.............. يعني مثلا انا رحت أفحص وبقول للمهندس العربية جديدة قالي طب وانا مالي اقف في الطابور وكان طابور طويل عريض وعربيات هلكانة ولو وقفت كنت حاخد مش اقل من ساعتين..... روحت للراجل إللي كان بيخلصلي الورق وقلتله على إللي حصل قالي إستنى هنا ودخل للمهندس وفي دقيقة الورق إتمضى من غير فحص ولا حاجة...... بس طبعا المهندي أخد "السوبيج" على راي محمود عبد العزيز في فيلم الكيف!

إن شاء الله اشوفك عن قريب يا محمد ونتقابل على خير يا راجل يا عسل.

**Moh.Fahmy** · 07-03-2008 06:04 PM

الله يخليك يا حبيبي ..انت عارف معزتك عندي قد ايه و ده اللي مخليني ازعل منك بقدر معزتك
احنا فعلا اتقابلنا انا و محمد ابراهيم اول امبارح الاربعاء في كافيتيريا شحتوت و كانت قاعدة عايزاك و الله و قعدنا نقطع في فروة كل الحبايب
بص يا حبيبي انا قصدي من النمر التجارية ان المعرض المفروض يسيبها لغاية ما ترخص لان التأخير بيكون من عنده لكن انت لو عليك عايز ترخص النهاردة قبل بكرة
و كان بصراحة مجدي شاهين الله يمسيه بالخير سابلي النمر 5 ايام لغاية ما الورق جهز و بعت معايا واحد من المعرض عنده و نبه علي اني ما اديلهوش حاجة عشان ده شغله و بياخد عليه مرتبه لكن انا ما خلصنيش الحقيقة اديته 30 جنيه و اخدهم بطلوع الروح بعد ما حلفني اني ما اجبش سيرة للمهندس مجدي شاهين و قام بالليلة كلها و انا قاعد في الكافيتيريا
هو بس طلب مني اكرامية لبتاعة النمر عشان اختار نمرة حلوة فلما لقيتها 6 ارقام قلت مش حتفرق معايا حلوة و لا وحشة بالعكس ده انا عايزها نمرة غلسة و صعبة عشان العساكر يتلخبطوا فيها

بص حبيبي انا من يوم الخميس الجاي فاضي و لمدة اسبوع شوف الميعاد المناسب و قولي و بوسلي كنزي

محمد فهمي