الموضوع: لماذا يرفع بعض الرجال شعار: نار العزوبية ولا جنة الزواج؟

المشاركة الأصلية كتبت بواسطة donzi

على فكرة دورت على المواضيع و اعقدت اقرا فيهم لحد 8 الصبح

بس حضرتك واخد الموضوع بعصبية اوي - دة اللي انا حاسيته من كلامك - لان الظاهر ان بيتغط عليك جامد في الموضوع دة و انا مافتكرش ان انا حاولت اقنع حضرتك بجواز الصالونات - مع اني مش معترضة عليه اصلا - بس حضرتك من حقك تختار الطريقة اللي تتجوز بيها طبعا و انا مازلت عند راي في ان اختيارك للراديو من البداية هو الاهم يعني صناعته ايه و توكيله مين و قطع غيار

بمعنى اخر حضرتك لما بتختار بنت للزواج مش بتختارها لوحدها لان دة نسب و نسب يعني اسرتين مش بس شخصين ولما تروح لاسرة و تلاقي انهم بيطلبو مطالب مبالغ فيها و بعيد عن الواقع و كلها مظاهر و مش مراعي ظروف الشاب اللي قدامه و هو اصلا تلاقيه قاعد على بلاط محصلش حتى السيراميك يبقى اكيييييييد خلي بنته قاعدة جنبه

يبقى حضرتك بتختار الاسرة قبل البنت و انا ممكن اقول لحضرتك امثلة للصبح من جوازات اصحابي و زمايلي كان فيها اهل البنت متعاونين جدا وواقفين جنب الشاب و مش بيبالغو في طلباتهم بل بالعكس بيعملو حاجات بزيادة عشان شارين الراجل دة و مثال منهم اهل العروسة هما اللي فرشو الشقة كلها من الالف للياء لان العريس كان حط كل فلوسه في الشقة و هما عشان واثقين فيه و في اخلاقه و تربيته عملو معاه كدة

و امثلة تانية كتير ممكن افضل احكي فيها للصبح لان زي ما في ناس كل اللي يهمهم المظاهر في ناس تانين كل اللي يهمهم زوج صالح يحافظ على بنتهم

وبعدين انا مقلتش اصلا ان اي حد المفروض يتجوز علشان التكاثر ولا عشان تسليك ولا لاي سبب في الدنيا غير انك تكون حابب تعيش بقية عمرك معاها و هي كمان تكون بتبادلك نفس الشعور و لا مش هاتقدر تكمل اسبوع

اما بقى بالنسبة لمحاولات الناس باقناعك و ضغطهم عليك فانا عاوزة حضرتك تعمل حاجة بسيطة جدا و هي انك تسال نفسك هما بيعملو كدة لييييه يا ترى رخامة ولا بيكرهوك ولا بيضايقوك بالعكس طبعا هما بيعملو كدة عشان بيحبوك و شايفين - من وجهة نظرهم - ان مصلحتك و راحتك في الاستقرار و الجواز يعني دافعهم الاساسي هو انهم بيحبوك و عاوزين مصلحتك بس مش اكتر ولا بينفروك من الموضوع ولا حاجة

و يا سيدي ما عاش ولا كان اللي يطلعلك لسانه يا فندم - بس على فكرة انت اللي قلت مش انا


.

حشرح لحضرتك الموضوع
اولا :
موضوع عصبيتي من الجشع اللي بسمع عنه من الاهالي لما حد يروح يناسبهم
والبهدله اللي شوفت وسمعت عنها من ناس كتبوا قوايم مثلا مبالغ فيها وعن ناس اتعرضت للسجن بسببها
او لضغوط نفسيه وعصبيه لا تطاق بتمارس علي شخص العريس
ثانيا :
انا لما خطبت ناسبت من احسن عائلات البلد اخلاقيا ومكانش فيه اي مشاكل ماديه
بالعكس كنا بنتسابق مين فينا اللي يدفع ومين يشيل التقيله ويسيب الخفيفه للتاني
وحتي ساعه الاتفاقات النهائيه كانت الكلمه اللي بتتقالي
دي حياتكم يا ابني وتبدئوها زي ما يعجبكم
وبعد كده تكملوا بيتكم براحتكم
واللي نفسكم فيه احنا نجيبهولكم
سواء من اهلي ولا من اهل العروسه
بس كل حاجه نصيب وربنا ما ارادش ان الموضوع يكمل
فانا مش متعقد
بالعكس انا كنت في نعمه انا بحسد نفسي عليها وعارف انها مش حتتكرر او احتمالات تكرارها قليله

وبعدين انا مقلتش اصلا ان اي حد المفروض يتجوز علشان التكاثر ولا عشان تسليك ولا لاي سبب في الدنيا غير انك تكون حابب تعيش بقية عمرك معاها و هي كمان تكون بتبادلك نفس الشعور و لا مش هاتقدر تكمل اسبوع

ده اللي انا قولته والله قبل كده كتير
وعاوز اقولك اننا قتلنا كل المواضيع دي بحثا
وكان فيه موضوع اسمه تقبل تتجوز واحده اكبر منك
وحتي الموضوع ده ناقشناه
ههههههههههههههههههههههههه هههههههههههههههه
مفيش حاجه سيبناها
بالنسبه لجواز الصالونات:
الراجل فيه بيتحول لعريس
هدف
سلعه
بس السلعه هي اللي حتدفع الفلوس
وفي كل الاحوال الموضوع مش فلوس
فيه ناس اتجوزت احسن جوازات وربنا رزقهم خلال سعيهم وتجهيزهم
===============================

انا نفسي فعلا اتجوز
بس بيتهيالي ان ده حيكون قرار مصيري
فيا يتاخد صح يا ميتاخدش احسن او يؤجل لما شاء الله
واللي مكتوبلي حاخده
النصيب والرزق زي الموت
لو في قلب الصحرا او في قلب الارض حيكون من نصيب صاحبه وحيجيله لحد عنده