الموضوع: ألان فقط أصبحت فلوينساوي

المشاركة الأصلية كتبت بواسطة neversighs

طبعا الاخوه فالمنتدى يعلمون اني حاجز الفلوينس من 10 مارس وبعد طول انتظار وجدل حول موعد الاستلام والزياده في الاسعار ... تم بفضل الله الاستلام من حوالي اسبوع .
الورق اتاخر شويه لكن وصلني اليوم وجاري انهاء اجراءات الترخيص .
طبعا لازم اشكر الاخ بوكلا والاخ وال وكل اعضاء قسم رينو فالمنتدى على كل ما بذلوه من جهد في توفير اكبر كم من المعلومات عن السياره وانا متفق معاهم تماما في الانطباع عن السياره والتقارير الدقيقه اللي اتنشرت فالمنتدى عن الفلونس . انا فقط عندي شويه نقاط تخص سيارتي هتكلم فيها :
1 - السياره لون oyster grey وكوده ( kng ) أو الفيراني الفاتح كما هو متعارف عليه واللون ده يا شباب احمد ربنا على اختياري ليه لانو بالفعل لون اضاف للسياره - اللي اصلا تمتاز بشياكة التصميم - لمسه فخامه وتميز .
2 - السياره من فئة ال dynamic أو ال e3 اللي كان سعرها ب 135000 جنيه واصبح الان 138000 بعد ارتفاع سعر الدولار . وهنا احب اسجل شكري وتقديري لوكيل رينو المحترم اللي استجاب لشكواي واستيائي من اقرار الزياده على الحاجزين للسياره من 4 شهور واكثر وبعد جدل حول المسأله ده كنا اتناقشنا فيها فالمنتدى من قبل تم استلام السياره بالسعر المتفق عليه عند الحجز .
3 - هذه الدفعه من الفلوينس هتترخص موديل 2011 ان شاء الله كما هو مثبت في شهادة تعريف السياره وده عوض صبري خير والحمد لله .
4 - السيارة ممتازه في كل شئ كما وصفها الاخوه ولن اكرر الكلام لكن فيما عدا 3 حجات من وجهة نظري :
أولا نظام تعليق السياره مخللي العفشه ناشفه شويه فالمطبات وغير مريحه . طبعا بعد نفخ الاطارات
بالنيتروجين خفف من المسأله شويه لكن مش على الاطلاق .
ثانيا عدم وجود ماكينة رفع للزجاج شئ غير متوقع من رينو فالسياره التحفة ده والمفعمه بالاوبشنز .. طبعا
ده شكوى عامه من كل الاخوه اللي استلموا السياره وهي فعلا حاجة مزعجة وغير لائقه بالسياره .
ثالثا السياره بتاكل نزين شويه داخل المدينه وده يعني شئ لا أجزم بيه الان لاني لسه في فتره التليين
واتعشم من الله ان الوضع يختلف فالمستقبل القريب .
كده اعتقد اني ادليت بدلوي في هذا الموضوع بس ليا أستفسار بسيط للأخوه الأجلاء : هل ضغط النيتروجين فالاطارات نفس ضغط الهوا يعني 32 امامي و 29 خلفي ولا ايه ؟ لاني رحت عند واحد ظبطهم جميعا على ضغط 30 وانا مش مقتنع ؟!!

ألف مبروك لحضرتك مرة تانية...و ربنا يمتعك بيها....

بالنسبة لسؤال حضرتك عن ضغط الإطارات....هو مبيفرقش من نيتروجين لهواء.....يعنى سواء نيتروجين أو هواء لازم قدام 32 و فى الخلف 29 علشان يعوض فرق تقل كابينة الموتور على العجلات الأمامية.....

العادة عند جميع بتوع الكاوتش دون إستثناء إنهم بيظبطوا الأربع عجلات على 28 صيفا و 30 شتاء....

حضرتك تمسك برأيك لما تروح لبتاع الكاوتش و قوله أنا عايزالأمامى 32 و الخلفى 29 وخليه يوريك المقاس للتأكد....

بتفرق فى الإحساس بنعومة العربية.... كما إنه كما أوصى صانع السيارة....و مبروك مرة أخرى....