الى اهل الاسكندريه الكرام

**m.aligamal** · 05-08-2010 10:14 PM

اخوكم نازل ان شاء الله الجمعه بكره الاسكندريه و ان شاء الرحمن نازل فى المعموره فى شارع الزهراء تقريبا رقم 5 او حاجه كده
استفسرات سريعه جدا لانى اول مره انزل بعربيتى بلدكم
اولا لو حبيت اروح العجمى من المعموره اسلك طريق ايه
ثانيا لو حبيت اروح كارفور من المعموره برضه ازاى
ثالثا لو حبيت اروح المكانين دول من غير ما خد طريق الكورنيش عشان التحذيرات الى فى طريق الكورنيش
اخر حاجه بقا
ازاى امش على الكورنيش يعنى النصائح ايه علما بانى لا اسير جوه البلد بسرعه تزيد عن 80 او 90 ك
واخيرا
كمان معلش
اقتراحتكم الجميله لاماكن الخروج
مطاعم اكل كويسه
المنتزه اروحه بالنهار ولا بالليل ملحوظه انا معايا الاسره

**mr_vampire** · 06-08-2010 02:37 AM

انا هفيدك في اخر استفسار بس لاني مش اسكندراني وكنت هناك من اسبوع. المشي عالكورنيش عادي جدااااااااااااااااااااااا بس خلي بالك من العربيات اللي جنبك لانه عامل زي طريق سريع في الاماكن المفتوحة انما هتلاقي اماكن ضيقة والمشي هادي وعادي جدا كانك ماشي في شارعكو بالظبط. ورايي الشخصي بلاش المنتزة مادام معاك الاسرة عشان تلوث بصري جامد اوي انما لو هتنزل لوحدك مشوار وتسيب الاسرة فالبيت يبقي ادخلها بالليل حلوة وبلاش الاسرة تاني مرة. اماكن الخروج طول ماانتا ماشي عالكورنيش هتلاقي كافيهات واعدات حلوة ومطاعم وخلي بالك اوووووووووووووي من الشوارع لانها اتجاه واحد هتدخل شارع عربياته خارجه هتلاقي الارض طرحتلك عسكري من تحت الارض. لو عايز تروح كارفور من الكورنيش اقدر افيدك هتخليك ماشي لحد الشاطبي وهتاخد يو تيرن هترجع تاني واول شارع يمين بعد مستشفي الشاطبي علي طوووووووووول وخليك ماشبي علي طول هتطلع كوبري وهتنزل نفق خليك ماسك شمال وطوالي هتلاقي نفسك عند كرفور. ومن عند كرفور لو عايز عجمي هتلاقي دخلة صغيرة بعد كارفور علي طول الطريق الدولي خليك ماشي لمطلع طوبري اطلعه وهتلاقي مخرج المكس والعجمي وهتلاقي لافتات وانتا ماشي. اااااااااااااااااااااخر حاجة بقي بلاش تسيب مريومة السكر ده في الشمس كتير عشان متسمرش هي كدة زي القمر ( ماشاء الله عليها وربنا يحميهالك ويفرحك بيها ) جالك عريس ليها ولا لسة ظروف البلد صعبة والشباب مش لاقي الهوا؟؟؟؟؟؟؟؟؟؟؟؟؟

**a_almasry** · 11-08-2010 09:14 PM

انا اسف جدا لاني لسه مسجل في المندي من يومين ولسه شايف الموضوع دلوقتي بيتهيألي انت اصلا خلاص رجعت
بس تتعوض المرة اللي جاية واسكندرية نورت يا ابومريم

**m.aligamal** · 12-08-2010 02:20 AM

فعلا انا رجعت
وربنا يبارك فيكم و فى اسكندريه بجد بلد جميله فى كل حاجه و طبعا اهلها قبل اى حاجه
و الحمد لله اتبصطنا فيها بس مرحتش العجمى من كلام اصحابى الاسكندرنيه قالولى زحمه جدا و فى حاجات مش هتعجبك هناك عشان معاك الاسره
رحت المنتزه بالليل للاسف و خرجت منه على طول
المعموره روعه هدوء و جمال البلاج و كافيهات راقيه و محترمه
الكورنيش يوم الجمعه لا يطاق البلد زحمه جدا جدا وطول منا ماشى اقول لمراتى الكورنيش ده يا ما بيحصل عليه حوادث و الكلام المكتوب عليه على المنتدى و مخلصتش كلامى لقيت واحده ست كبيره و عربيه خبطاها و يعينى شكلها متبهدل خالص و الراجل صاحب العربيه راكن عاليمين بيعيط و الله و قلبى اتقبض لان دى كانت اول خروجه لى و قلت ربنا يسترها بقا
بعد كده بقا طول الايام كان سلسل جدا مفيش زحمه عليه غير منطقه ميامى عشان الحفر و الشغل الى بتعمل فيها
غير كده كنت بتفسح عالكورنيش الساعه 4 الفجر و كان بجد روعه
كارفور زحمه جدا جدا جدا عشان رمضان بقا كل سنه و انتم طيبين
عامه استمعت كتير فى اسكندريه و خاصه المعموره لان ميزه المعموره انك مش محتاج تخرج بره يعنى بلاجات و كافيهات و كورنيش
نزلت التلات العصر عشان رمضان
سلكت الطريق الدولى الساحلى و كان روعه بجد بعيد عن الزحمه و الدوشه
الحمد لله على كل شىء بالمناسبه العربيه عملت 270 كيلو فى ال20 لتر و ده يعتبر اعلى معدل قدرت اوصله عشان كنت ماشى براحتى و مبعديش سرعه 90 و الطريق مساعد مفيش مطبات و لا توقف خالص
كل سنه و انتم طيبين و اهل اسكندريه كلهم بخير و معلش تعبناكم