الموضوع: تجربتي مع الشارك

بصراحة ياجماعة أنا أول مرة أدخل على قسم ميتسوبيشي وأعمل موضوع فيه لأني عمري ماركبت أي نوع من أنواع سيارات ميتسوبيشي على الأطلاق لأني مابحبهاش ولاعمري كنت هافكر إني أشتري أي سيارة عليها علامة الميتسوبيشي بس الشارك غيرت الفكرة دي عندي لدرجة كبيرة .... من 10 أيام جالي واحد صاحبي بعربيته الشارك وقالي تعالى نروح أسكندرية في مشوار شغل وهو كان لسه شاري الشارك قابلها بيومين بس وقالي بالمرة نجرب العربية في المشوار ده قولتله يالا ... المهم خلاني أسوق العربية أول ماقعدت على الكرسي وأخذت وضع القيادة أنا فضلت ساكت فترة من الذهول حسيت إني ركبت عربية فارهة بمعنى الكلمة وماكنتش متوقع من اللانسر الفخامة والرفاهية دي كلها لالالالا بجد ياجماعة حاجة وهم بصراحة وأنا ممكن أتقبل الفخامة دي في أي عربية ألماني أو أمريكي لأني عارف أنا راكب أيه بالظبط وهايبقى شئ عادي جدا ....أما لانسر العربية العجوزة الفقيرة يطلع منها ده كله ... أهه ده بقى الأي مش متوقعه ... حسيت إني راكب حاجة ألماني أو أمريكي مش ياباني لأ ولا طقم الصوت ألي نازل فيها حاجة وهم بصراحة ... ولا شاشات المعلومات ألي فيها كانت حركة جريئة من ميتسوبيشي ... والطابلون شكلة تحفة بجد عكس طابلون الكورولا العقيم والصالون واسع جدا بصراحة ... والتقفيل والخامات ممتازين .... وبالنسبة للعزم بطيئة في طلعتها بس مش البطئ الملحوظ ... أما عالى السرعات العالية سريعة جدا وبتستجيب بسرعة ودي عن تجربة وكانت بتغني على الطريق ومن السهل تقفيل العداد ... والزينون بتاعها حكاية حكاية زي زينون الباجيرو بالظبط .... وشكل العربية العام ممتاز جدا جدا جدا وبيتميز بالشراسه تحس إن الواجهه بتاعتها من قدام شرسه ومكشرة كده ومالحظتش فيها أي عيب غير إن الشنطه الخلفية صغيرة شوية بس حوار الشنطه ده من مشكله أصلا قصاد الرفاهية ألي بلا حدود في العربية دي ..... فعلا الشارك عربية ممتازه وفخمة داخليا وخارجيا وخلتني بفكر أنضم وأكسر القاعدة وأدخل عالم ميتسوبيشي ...... وأنا أول حاجه حبيت أعملها إني أنقل التجربة دي ليكوا بناءا على تجربة فعلية ومش مجرد سمع أو فتى زي مالشعب المصري كله ماشي على الحوار ده ..... وتحياتي وكل سنة وأنتم طيبين