مساء الخير عليكم شباب بروتون
أزيكم كلكم.. اتمنى تكونوا بخير وكل عام وانتم بالف خير وصحة وساعدة ورمضان كريم

الحمدلله العربية عندي عاملة 15 الف كم .. كنت بفكر من كام يوم إذا كنت حعمل صيانة ال15 الف جوه التوكيل ولا برة وفكرت في المميزات والعيوب
المميزات
1- الضمان حيتختم بميعاد الصيانة
2- فحص شامل للعربية والعفشة والتيل وغيرة

العيوب
1- تكلفة صيانة غالية جداً على الفاضي
2- بعض العمال غير أكفاء وممكن يبهدولولي العربية لمجرد عدم التركيز في اللي بيعملة
3- حفضل ملطوع ساعة او اكتر على الفاضي من غير ما اكون شايف في ايه بيحصل في العربية
4- بمبدأ دخول التوكيل مش زي خروجة فممكن اخش علشان اغير زيت اطلع عاوز موتور جديد.
وغيرة كتير

المهم اتكلت على الله انهاردة الصبح بعد ما طبعت جدول اماكن توزيع زيت فيسكو ونزلت وانا كلي اصرار اني الاقية ( كنت دورت عليه قبل كده محدش يعرف عنه حاجة) والحمدلله لقية في سموحة بنزينة كارجاس اللي في الشارع بتاع ماكدونلدز سموحة اول يمين بعدة اخر الشارع

المهم وصلت قلتهم عاوز أغير زيت ودخلت على البير
حذرت الصنايعي ان لو الطبه مش بتتفكر معاة بسهولة يسبها ويشفط الزيت من فوق ( مش طلبه يتغابى على الطبه ويدمرها )
المهم اتفكت معاه من اول مرة وصفينا الزيت القديم وحضيت فيسكو 2000 حستخدمة كمنظف لمدة 3000 كم وانزلة واحض فيسكو 3000 مع تغيير الفلتر
المهم يعد ما حضينا الزيت وكله قدام عنيا لقيت الراجل بيقولي لسة الخدمة يا فندم .. قلت اهه حنبتدي الاشتغالات.. المهم اخد العربية وطلع بيها على حته جنب البير وفك فلتر الهواء ونظفه ونظف الموتور كله بالهواء حتى مروحة الردياتير معتقهاش ( بصراحة انا بقيت مبصوت وهو شغال ) خلص تنظيف حوض الموتور بالهواء ورجع العربية على البير تاني ونزل ربط العفشة وبص على تيل الفرامل ( بصراحة انا بقيت منبهر - كل ده علشان غيرت زيت طيب لما نشوف الفاتورة في الاخر وكانت المفاجئة ان الإيصال ب، 74.5 تمن الزيت والخدمة دي كلها مجاناً
بصراحة انا اتبصت واخد العربية ومشيت وطبعاً كل حواسي مع الموتور ودي ملاحظاتي
1- طبعاً صوت الموتور إختلف تماماً وبقى اهدى بس انا مش عارف دة لأن الزيت جديد ولا علشان الإضافات اللي في زيت فيسكو
2- العربية بقت بتسخن اسرع من الاول يعني حوالي من1.5 إلى 2 دقيقة تكون على درجة الحرار الطبيعية
3- في اختلاف جوهري في سحب العربية على السرعات الاولى والار بي ام المنخفض, (الاول والتاني )وده طبعاً محستهوش على طول بس مع مرور الوقت لاحظت الالفرق دة بس بردة مش قادر احدد هل ده لأانه نظف فلتر الهواء ولا علشان الزيت ( حيبان مع الوقت )
4- الموتور انعم بشكل كبير

في الاخر انا حاسس ان الزيت فيسكو افضل من زيت شيل ( معرفش ليه مجرد احساس ) والتجربة خير دليل
تحت امركم في اي استفسار
تقبلوا تحياتي