الموضوع: اول سفر ليا باللوجان و تقيمي بكل امانه

بسم الله الرحمن الرحيم

الصيف ده كان اول سفر ليه باللوجان للساحل الشمالي.....
بدايه الرحله :طلعت علي بريدجستون عباس العقاد ...
ظبط كل الكاوتش نيتروجين امامي 29 و خلفي 32
و الاستبن هوا عادي
طلعت و كانت الحموله: معايا واحد صاحبي قدام و 3 ورا و شويه رفايع .... ايس بوكس و بلاي استيشن و كده .....
الشنطه :شنتطي جرار متوسطه الحجم و 3 شنط نفس الحجم
و شنطه جرار كبيره الحجم ... بسم الله ما شاء الله و كان لسه فيها
مكان علما بان غطاء العربيه في الشنطه ....
و تبص للعربيه من بره و لاتحس انها شايله حاجه في الشنطه
هبوط بسيط جدا ....
الساعه 6 الصبح فولت 92 من بنزينه شل الشيخ زايد و اتكلت علي الله
اول 100 كيلو الجو حلو مشغلتش التكييف و ماشي 100 عشان الرادار
و كان معايا واحد بيخاف ههههههه......
و انا مثبت 100 كل شويه تسرح مني وانا مش باصص عالعداد 120 130 اشيل رجلي عشان انزل ل100 تاني ...كل ده و موسيقي خفيفه شغاله و النوتور صوته يكاد لا يسمع هادي جدا
كنت سايق حافي و الحمد لله محستش بموضوع السخونه بتاعت الكونصول دي ابدا .....
استهلاك البنزين لحد دلوقتي 5.6 لتر/100 كيلو
شويه الدنيا حررت شغلت التكيف علي 3 و بردنا نزلتو علي 2
السحب قل شويه بس برده متحسش و انت بتجري
ابتديت اجري شويه و دخلت العالمين 130 140 مبقلش عنها
و الاستهلاك بقي 6 ل 6.2 لتر/كيلو .....
وصلنا القريه بعد العالمين بحوالي 40 كيلو و ابص علي كمبيوتر الرحلات العربيه استهلكت 18 لتر بس يعني 33 جنيه
يا بلاش ....
و بدات الرحله و الهلك في اللوجان عشان احنا من النوع اللي مش بيعد في مكان ...
كل يوم مارينا مراسي مربيللا و مرتين 3 اسكندريه طبعا من غير الشنط مع شويه زحمه جوا القري و في اسكندريه
و التحميل بقي انا وواحد جنبي و 4 ورا 3 مستريحين وواحد متزنق ...
عشان واحد صاحبي الله يسامحه خلي بينا و مجاش بعربيته
بقينا 6 في العربيه كل المشاوير
طبعا انا كنت مقلق و رافض في الاول
لحد ما روحنا اول مشوار احنا ال 6 بالتكييف و السرعه 120 طول الطريق
و مع كل التحميل ده ولله الحمد محكتش في اجدعها مطب
و مخدتش ولا مطب بالجنب
و اللي راح مارينا عارف مطبتها المقرفه
طول السفريه اسبوع علي ده الحال و الستهلاك ثبت عند7.2 ل 7.7 لتر/100كيلو .....

كنت بفول من توتال اللي عند مارينا ...واتبسط جدا لما لقت يافطه
renault service always with u جوه المحطه ....عمار يا رينو
يعني لو حصل حاجه لا قدر الله او نسيت تغير زيت مثلا تلحق نفسك هناك او لو حاجه كبيره علي توكيل العامريه ....
مواقف بايخه بقا في السفريه:
1-التريلات ربنا ياخدها ماشي في الشمال في امان الله و نفس الحموله 120 كده اديتلو نور و 100 كلاكس عشان اعدي
قرصت جامد عشان اعديه و كانت الفاجعه
مكروباص وقف عاليمين فجاه قام التريلا رامي كل جسمه عليا بسرعه
و انا كنت ورا الكابينه بتعتو حاجه بسيطه و في ثانيه بقي هوا في اشمال و انا نص العربيه في الرمل اللي في نص الطريق
يعني نصهها عالاسفلت و النص التاني بينط علي الرمل
ربنا الهمني الحمد الله و عرفت اتحكم فيها و طلعتها علي السفلت تاني براحه بعد ما كان اغم عليا طبعا
2-موقف تاني بردو تريلا طلعه بتتمخترمن قريه من اليمين مره واحده
لسه هرمي شمال ابص في المرايا الاقي clk و دودج شارجر بيشدو مع بعض صواريخ ....
طبعا لو رحت معاهم هيعملوني كفته .... اديتها فرامل و امري لله
سرعتي كانت حوالي 130 140 و نازل تحت المقطوره خلاص
بس لوجي رفعت راسي و هديت جدا و منحرفتش مع صوت كاوتش رهيب طبعا و في جزء من الثانيه كانت الدودج عدت فكيت فرامل
ورميت شمال مره واحده و لميتها و قفشت في الدريكسيون
قلت وششش هتعوم ونتقلب
و لكن رفعت راسي تاني و ثبتت ....
بعد الموقف ده كنت عايز اقف علي جنب و اعيط و ابوس كاوتش اللوجان ....
3 - كنت بجيب حاجه من زهران وراكن في الباركينج طلعت و لسه بفتح الباب جيه و احد بتيوتا ستارليت وطررخخخخخ منورا
لقيت الباب مش في ايدي .....
عيني دمعت قلت هبص ورا الاقي الشنطه بقت علي الكنبه
خصوصا اني شادد الهاند عشان ركنه ...يعني كلت الصدمه كلها
مع صوت رهيب طبعا ....
طيرت عالراجل بتاع الستارليت و جبته من قميص شعبولا اللي كان لابسه .... وببص و كانت الماجاه اللي خلتني سيبته
لقيت لون عربيته مجرد عامل خط علي الاكصدام الخلفي شيلته بالبوليش
مع خدش 2 سم من فوق ... و غطاء القطر مدلدل و مكسور من حته صغيره ركبته و مش باين ....و اللمبه اللي بتنور فوق النمر مدلدله
ركبتها تاني مكانها كبس .. وكان شيئا لم يكن ...
ببص عنجه لقيته اتعجن ...فانوس مكسور والتاني و اقع
والشبكه مفرومع و داخله لجوه و الاكصدام و قع و الكبوت عمل شكل الهرم ده ... بصراحه سيبته و مكلمتوش من فرحتي باللوجان

واخيرا المميزات و العيوب في السفريه :
المميزات:
1- الشنطه تقدر تشيل فيها جمل و تنساه
2-العربيه تشيل 5 مستريح او 6 وواحد مزنق سنه
3-التكييف ممتاز
4 - قدره تحمل عاليه للعربيه مع عدم التاثر البليغ بالتحميل العالي
والجو الناااااااااار و التكييف و بتجيب سرعات عاليه دون معاناه
5 - فرامل فعلا تقدر تنقزك في مواقف كتيره و متخلش العربيه تنحرف
6- ثبات جميل جدا حتي سرعه 140 مستقيم((اخر سرعه جبتها عشان مبفتحش قوي انا )) و 120 بغرز
7- عفشه تحميل قاسي و العربيه ما شاء الله مبتهبطش من ورا
مهما كان التحميل
8-ارتفاع ممتاز للعربيه متحكش في اي مطب مهما كان التحميل
9-الحراره طول السفر ثابته عند 4 شرط مع اصعب ظروف التشغيل
10-النور ممتاز معظم الوقت بالليل و اللي راح طريق الساحل عارف انه كحل مشغل الفوجات و نور المتوسط
احيانا العالي عشلن اعدي من حد بس
العيوب:
1- مع السرعه العاليه لو معدي من جنب مقطوره مثلا تهز باهتزاز غير محبب بس مش خطير خالص
2 - ضعف الرفارف الخلفيه فقط لما حد يجي يسند عليها بغباء
او يهزروا ويزقوا بعض بتدخل لجوا بس انا عارف طريقه بردها بايدي و كان شيئا لم يكن
3- معرفش الفرش و الارضيه بيتربوا ويلموا وساخه بفظاعه كده ليه؟؟؟
بفكر اركب فرش

ملخص الرحله : 1150 كيلو متر في خلال اسبوع هلك بالسفر رايح جاي
كميه البنزين المستخدمه : 88 لتر 92
يعني متوسط استهلاك حوالي 7.6 لتر/100 كيلو
يعني 162 جنيه بنزين طول السفريه مع الطريق رايح جاي
((انا مسؤل عن كل كلمه كتبتها و الباب مفتوح للنقاش))
و اخيرا احب اقول الحمد لله ان انا جبت العربيه ديه
و ربنا يحفظها و يخليها