أرجوكم محدش يقاطع .. مصر امانه فى إيدك!

**shakshak2011** · 15-06-2012 03:59 AM

يا جماعه ماينفعش تقاطع .. لو قاطعت تبقى إنت كده بالضبط كأنك إديت صوت لشفيق .. أنا مش مع الأخوان و بالنسبالى أخطئوا كثير .. و أنا لما هنزل أصوت لمرسى مش هصوت للأخوان .. أنا هصوت للأداة الى هتسقط النظام و تحقق هدف الثوره من أول يوم و هو إسقاط النظام .. إنما سكوتك يبقى إنت كأنك بلا وجود .. ولم تؤثر بل أضريت ...

إفتكر إنك بتقصر فى حق نفسك و أولادك و أهلك و فى حق كل شهيد إستشهد علشان يديك المكان ده إنك تقرر .. ياتدوس عليه يا تقف فى صفه و تخليه يرتاح و يعرف إن دمه مارحش هدر

أنا لو قدام شفيق أى حد هنتخبه فقط علشان يحقق هدف الثوره و يكون اداه ضد النظام الى بيحاول بكل شراسه إنه يرجع أوسخ و أوسخ و أوسخ من الأول ..

**shakshak2011** · 15-06-2012 04:06 AM

أتمنى على كل واحد هيدعم شفيق .. إنه يدعى فى صلاته إن ربنا يحشره معاه .. قول أمين يالى هترشح شفيق و أوعى ترجع فيها .. مش إنت مقتنع بيه!!!!!!!!! .. حسبى الله و نعم الوكيل

**ahmad--ezzat** · 15-06-2012 04:07 AM

الله يخدو

**Screenplays** · 15-06-2012 04:57 AM

المشاركة الأصلية كتبت بواسطة shakshak2011

أتمنى على كل واحد هيدعم شفيق .. إنه يدعى فى صلاته إن ربنا يحشره معاه .. قول أمين يالى هترشح شفيق و أوعى ترجع فيها .. مش إنت مقتنع بيه!!!!!!!!! .. حسبى الله و نعم الوكيل

براحه معلش عشان ابويا انتخب شفيق

**shakshak2011** · 15-06-2012 05:09 AM

أى حد إنتخب أو هينتخب شفيق .. المفروض حاجه زى ديه ماتضايقهوش .. مع إحترامى الكامل للسيد الوالد .. ولا إنت إيه رأيك؟
مع العلم إن ليا أقرب إنتخبوه .. مع الأسف

**amr.elsayed** · 15-06-2012 05:11 AM

ما تزعلش منى بس هو دة الاسلوب اللى بيخلى الناس تنتخب شفيق
قال تعالى: { فَبِمَا رَحْمَةٍ مِّنَ اللّهِ لِنتَ لَهُمْ وَلَوْ كُنتَ فَظًّا غَلِيظَ الْقَلْبِ لاَنفَضُّواْ مِنْ حَوْلِك } (آل عمران:159).

**rompo10** · 15-06-2012 05:19 AM

ام احد الشهداء دعت دعوه في التليفزيون يارب اي واحد هاينتخب شفيق ويضيع حق ابني يشرب من نفس الكأس وهذه الدعوه ليس بينها وبين الله حجاب راجعوا نفسكوا وحسبي الله ونعم الوكيل ربنا ينتقم من كل واحد هاينتخب شفيق ويزله في الارض

**shakshak2011** · 15-06-2012 05:39 AM

أخى amr.elsayed .. الموضوع واضح وضوح الشمس .. و ده الى ينرفزك و يغيظك .. و بعدين انا مش داعيه دينى ولا بروج لداعيه دينى .. ولا بدعوا ناس إنهم يعتنقوا دينى .. أنا قدامى إتنين مرشحين .. واحد إيده مغسوله بالدم و السرقه و النفاق .. و الأخر مغسوله بأخطاء بنى أدم (بشر) .. إزاى إنتخب المجروم و أقول على التانى علشان أخطأ مش هنتخبه .. ماهى حاجه تجنن

**amr.elsayed** · 15-06-2012 06:03 AM

رغم ان صوتى لدكتور محمد مرسى
لكن الدعوة على الغير لمجرد انتخابه مرشح اخر ليس له علاقة بالديمقراطية ولا له علاقة بالسياسة
ولا حتى له علاقة بالدين الاسلامى ... لكن استخدام الفزاعات و نظام لو انتخبت شفيق حتدخل النار
دة اسمحلى اقول لحضرتك انه بيعمل دعاية سلبية للمرشح الاسلامى
ولا محمد مرسى حيزود ايمانى فى شيئ و لا انا حنتخبه علشان عايز اعرف دينى
انا حنتخبه لمجرد انه الافضل من وجه نظرى بالاضافة لتجربة نظام جديد على امل تحسين الاوضاع
....................
يا ريت كل واحد يسال نفسه لولا قدر الله و فشل الاخوان فى ادارة البلاد فى خلال الاربع سنوات القادمة اذا فاز د محمد مرسى
وجائت الانتخابات القادمة وامامك مرشح اخر قد يكون من الممكن ان يحدث تغيير للافضل
تنتخبه ولا تنتخب الاخوان اللى فشلوا فى الادارة لا قدر الله ؟؟
ولو حد قالك خلى بالك ام الشهيد قالت لو مش عارف ايه يشرب من ايه لو انتخبت حد تانى غير مش عارف مين
حتنتخبه علشان ام الشهيد قالت كدة ولا حتنتخب اللى ممكن يحدث تغيير ؟؟؟
حكموا عقلكوا وبلاش فزاعات مش حنعمل زى عكشة

**amr.elsayed** · 15-06-2012 06:06 AM

المشاركة الأصلية كتبت بواسطة shakshak2011

أخى amr.elsayed .. الموضوع واضح وضوح الشمس .. و ده الى ينرفزك و يغيظك .. و بعدين انا مش داعيه دينى ولا بروج لداعيه دينى .. ولا بدعوا ناس إنهم يعتنقوا دينى .. أنا قدامى إتنين مرشحين .. واحد إيده مغسوله بالدم و السرقه و النفاق .. و الأخر مغسوله بأخطاء بنى أدم (بشر) .. إزاى إنتخب المجروم و أقول على التانى علشان أخطأ مش هنتخبه .. ماهى حاجه تجنن

اكيد طبعا يا باشا انا كمان حتجنن زيك بالظبط بس فى ناس كتير قلقانة وخايفة ومحتاجة حد يطمنها
لان دى طبيعة البشر بيخاف من المجهول .. وان شاء الله ربنا يولى من يصلح