شاهين 2006 عندي مشكلة فيها

**eldeplomasy** · 04-03-2008 02:07 AM

عندي شاهين 1600 مو2006 لما بوصل بالسرعة فيها لحد 80 او 90 وقافل الزجاج كله ببقى سامع برده صوت الهوا وصوت دوشه وصوت الموتور فهل ده في عربيتي بس ولا كل الشاهين ولما بزود السرعة لحد 140 بيبقى كأني قاعد في الشارع ده غير صوت الموتور اللى مببقاش عارف اسمع منه الكاسيت فهل يوجد حل لصوت الموتور وعزل الكابينة عن الاصوات الخارجية ولا أيه

لو حد يعرف حاجه يقلي ضروري جدا مع العلم ان واحد زميلي قالي في علب للشكمان انظف من اللى فيها بتكتم صوت العربية وفعلا كتملي الشكمان بايده فعلا ملقتش صوت للموتور بس معرفش العلب دي بتتباع فين وبكام فلو حد يقدر يساعدني لاني خلاص قربت ابيعها من صوتها الغبي ده

وشكرا جزيلا

**sab3aawy** · 04-03-2008 10:09 AM

بالنسبة لصوت الهواء راجع ضبط الأبواب على كالوتش الأبواب واحكام غلق الشبابيك ، الأمر يحتاج منك الى زيارة لورشة ابواب محترمة

بالنسبة لصوت المحرك ، هل العربية عدت 10 آلاف كيلومتر؟ هى بعد عشرة آلاف كيلومتر صوتها بيتحسن جدا

الحاجة التانية هى انك تظبط تاكيهات، تستعمل بوجيهات شامبيون اصلى شمعة واحدة، تستعمل منظف رشاشات مرة واحدة فقط، وتغير العلبة الأخيرة للشكمان بعلبه من نوعية محترمة

**eldeplomasy** · 04-03-2008 10:19 PM

شكرا جزيلا يا أستاذ سبعاوي على ردك ولكن اجيب منين البوجيهات الشاميبون الاصلي والعلبة الاخيرة للشكمان اجيبها منين ولو تعرف ورشة ابواب محترمة ياريت توصفلي مكانها وهي العربية عامله دلوقتي 24000 وشكرا جزيلا

**sherif_84** · 05-03-2008 01:06 AM

البوجيهات الشامبيون هتلاقيها فى شارع معروف فى وسط البلد متقاطع مع شارع شامبليون عند كشرى أبوطارق مشهور جدا هناك هتلاقيها هناك ان شاء الله وعلى فكرة البوجيهات الدنسو كويسة جدا ويابانى وأنا بستعملها عالطول عشان ساعات الواحد بيكسل ينزل وسط البلد فبشترى من أى محل قطع غيار
بالنسبة لعلبة الشكمان فى شكمان أبواليزيــد فى شركة مصريات فى مدينة نصر أمام دار الامداد والتموين شركة محترمة
بالنسبة للأبواب شوف اى واحد بتاع ابواب متخصص وهو هيعملهم بس انت تبقى واقف معاه

**Xpert** · 05-03-2008 01:26 AM

ايه ده .. هيا الشاهين بتجيب 140 ؟ من امتي الكلام ده :d

**sherif_84** · 05-03-2008 02:18 AM

الشاهين 1400 سرعتها القصوى 160 كم/س
والشاهين 1600 سرعتها القصوى 165 كم/س

**sab3aawy** · 05-03-2008 12:28 PM

المشاركة الأصلية كتبت بواسطة Xpert

ايه ده .. هيا الشاهين بتجيب 140 ؟ من امتي الكلام ده :d

لأ حاسب يا عم بيشو :) ، انا مسجل بيها 150 (أل1400 سى سى ) على الجى بى إس على طريق السخنة ، ده غير انى فى ايام كتير جدا كنت بجيب ال 140 على الدايرى الصبح وانا رايح الشغل

**ابوشريف** · 05-03-2008 10:05 PM

2006 وبتنصحوه يغير فيها الشكمان ويروح لميكانيكى يضبط الابواب ويغير بوجيهات

كانت معايا دوجان وكنت لما بوصل لسرعة 80 احس ان الموتور معايا جوه الكابينه

عملت كل مايمكن عمله من اختراعات حتى يتحسن آداؤها ومفيش فايده

انا انصحك انك متتعبش نفسك خالص ...

اذا كنت بتدور على النعومه بيعها وهات يابانى حتى لو مستعمل

او حتى صينى زيرو حيكون افضل منها بمراحل

**eldeplomasy** · 05-03-2008 10:17 PM

انا سجلت بيها 180 كيلو متر في الساعه بس عداد لفات الموتور كان جوه الاحمر وكان راكب معايا 4 غيري بس احجامنا كانت عادية وكان المكيف شغال

شفتوا قد ايه جامده العربية

بس بعد كده بقى المكيف حالته تدهورت على الاخر والموتور بعدها بقى بيترعش جدا وصوت التاكيهات علي فجأة واستهلاك البنزين بقت بتشربه ومحتاجه تغير عربيه بس علشان ترجع لحالتها في الاول

ههههههههههههههههههههههههه هههههههههههههههههه

**Xpert** · 06-03-2008 03:04 AM

المشاركة الأصلية كتبت بواسطة sab3aawy

لأ حاسب يا عم بيشو :) ، انا مسجل بيها 150 (أل1400 سى سى ) على الجى بى إس على طريق السخنة ، ده غير انى فى ايام كتير جدا كنت بجيب ال 140 على الدايرى الصبح وانا رايح الشغل

150 بال 1400 سيسي

شكلي كده هاخد الدوجان بتاعه الواد قريبي تست درايف علي طريق الكريمات بتاع الجيش :D هيا دوجان 95 فول اوبشن دي ال اس ال اكس دي .. 1600 سيسي .. اخرها كام توب سبيد لو مرتاح دي يا حج ؟