أنا ألى فاهم غلط و لا الناس هى ألى فاهمه رمضان غلط؟؟؟

**mostafashokry** · 10-08-2010 12:36 AM

السلام عليكم , بجد أنا تعبت من المشاهدات ألى شوفتها النهارده, كنت فى شارع دمشق بسأل عن بعض قطع الغيار لسيارتى , و كان زميل موصينى على حاجة لو نزلت شارع دمشق أجبها له , المهم لفيت شويه فى شوارع ميدان الجامع , و أتفجعت من زحمة الناس على المأكولات و الياميش و العطارة زى ما يكون الناس بتتسابق فى الشراء ليه مش عارف؟ و الله با جماعة شوفت طابور كبير جداً على كنافانى و الشارع واقف ومزدحم جداً بسبب السبارات ألى راكنه عنده ليه مش عارف هل الناس يترحب و بتستعد لرمضان بالشراء و هل الناس ألى بتبالغ فى الشراء و بيدخل عليها رمضان و هى full tank فى التلاجات بتعتها , بتستعد إيضاً معنوياً و بترسم خطة عباده زبادة شويه تستغل فيها فضل رمضان و لا !!!!!
يا جماعة أصل الصيام هو تهذيب النفس , تهذيب النفس عن الشهوات و منها الأكل , وألى مش واصله الفكرة ديه تبقى مشكلة كبيرة
أنا اعرف ناس بعينهم بتعمل جمعيات عشان شراء إحتياجات رمضان ,ذى ما يكون رمضان مش هيبقى رمضان عندهم لو الياميش مش موجود فى البيت,فضلا عن الحوادث ألى بنقرأها فى صفحة الحوادث بسبب ياميش رمضان,
و الله يكرمكم ما حدش يلوم التجار و الغلاء لأن أحنا ألى بنعطيهم الفرصة لزبادة الأسعار لأن الطلب بيزيد على المأكولات و بالتالى الأسعار بتعلى و التجار متيقنيين من إن الإستهلاك بزيد فى رمضان و بيسنوا سنانهم طول السنة فى إنتظار رمضان و أحنا عارفيين الكلام ده كويس و مع ذلك على نفس الوتيرة من عشرات السنين ,
لازم, يبقى فيه وقفة لو مش عشانا يبقى علشان أولادنا لأن الأبام ألى جايه صعبه و أكيد الفطن متوقع ذلك
وعشان نربى جيل واعد لازم مش كل الطلبات تجاب دون الوصول لحد الحرمان
و أنا حاسس إنى طولت بس الموضوع فعلا تعبنى و مزعلنى , ولا با جماعة أنا ألى فاهم غلط قلولى يا جماعة لو أنا ألى فاهم غلط .

**azmeralda** · 10-08-2010 09:12 AM

هى الفكرة ان فى الأيام العادية ممكن تهيف فى الأكل ومتهتمش لو حتى تاكل تونة وبطاطس محمرة -كشرى اصفر.........
لكن انا شخصيا فى رمضان بعد يوم صيام مجهد مستحيل اهيف لازم اكل وجبة كويسة والا مش بقدر اواصل لكن موضوع الياميش ده مش فدماغى قوى
جايز بيملوا التلاجة عشان مينزلوش مخصوص يشتروا فالحر والصيام

**n_i_t_e** · 10-08-2010 09:41 AM

للأسف بقى عند الناس شهر رمضان مقترن بالأكلات الدسمة يوميا بسبب الصيام و فى أكلات ناس مش بتاكلها الا فى رمضان زي الكنافة و قمر الدين و القطايف... الظاهر الحماسة الزيادة و افتقاد الحاجات دي طول السنة بيخليهم يجيبوا منها كميات كبيرة.
يتهيألى بيجيبوا كميات كبيرة عشان العزومات المتبادلة على الفطار.
أعتقد بيجيبوا برضه كميات كبيرة عشان بيكون "خزين" للشهر كله لأن التسوق أثناء الصيام صعب و بيكون الشراء مرة واحدة لطول الشهر.

**viper911s** · 10-08-2010 10:15 AM

مش هقول غير اننا اكتر شعب استهلاكى
احنا جنة لائى دولة منتجة حتى لو الصين
المنظرة ولا غير غير المنظرة
احنا فى مجتمع يحب المظاهر لازم يكون عندى اكل كتير علشان فلان لو جة او لو حد جة
وتلاقى اكل زايد ويترمى .
رغم انو حرام جدا والدين بينهى عن الاسراف بس تعمل اية عادات بقت متأصلة فينا

**aymanmaly** · 10-08-2010 10:28 AM

يا جماعة لازم نقدر عادتنا و تقليدنا و نحترمها
انا متزوج و مسئول عن اسرة
فى العادى الناس بتجيلى كزيارة فى المناسبات
لاكن فى رمضان انت يأما عازم يا معزوم و الفطار لوحدك مع اسرتك نادر الحدوث و بالتالى الاستهلاك بيزيد جدا فى رمضان ( واظن ان دى حاجة كويسة لصلة الرحم )
واظن كمان ان الناس خايفة لحسن السلع تغلا فبيلحقوا يحوشوا بالسعر القديم الى هو ساسا غالى
و الخوف من ان الحاجات تخلص فانتم عارفين ان البلد داخلة على مشكلة قمح بعد وقف روسيا التصدير
بجانب ان يوم رمضان قصير تصحى الصبح تروح شغاك ترجع تنام شوية تفطر تصلى التراويح و بعد كدة ترجع تعبان من مجهود الصيام والشغل و الصلاة تريح شوية وتنام علشان الشغل تانى يوم يعنى هايبقى صعب تنزل السوبر ماركت
وبعد كدة فية ناس كثير مش لاقية تاكل فى الايام العادية و بينتظروا شهر الخير و اعمال الخير علشان يعرفوا يكلوا حاجة كويسة
و كل عام و انتم بخير

**أبو صلاح** · 10-08-2010 10:31 AM

يا جماعة بلاش كلام في الموضوع ده
انا زهقت من الموضوع ده
في البيت عندي نزلوا سوق العبور علشان الفواكه والخضار وطبعا كله جملة وبكميات محترمة
وبعد سوق العبور لازم دخول كارفور وما أدراك ماكارفور يعني بضاعة السنين
وبعدين سمعوا ان في معرض اللي في قاعة المؤتمرات بتاع تجهيزات رمضان يبقى لازم من زيارة والتحميل أيضا
ولازم يبقى في زيارة تانية لنفس المعرض لان في حاجات نسيوا يجيبوها أو أجلوها ليوم تاني
المعرض ده كارثة والله العظيم بتقعد ممكن اكتر من ساعة علشان تعرف تصطاد عربيية (عربة سوبر ماركت) ولازم تصطاد واحد من جوه المعرض وتمشي وراه لحد ماتوصله لحد عربية معالية زي البودي جارد بالظبط

بالذمة ده كلام يا عالم ؟
حرااااااااااااااااااااااا ااام
طبعا كله كوم والزحمة كوم تاني

طبعا أنا بسألهم في البيت بتعملوا كده ليه ؟
اول إجابة العادات والتقاليد كده
ثاني إجابة وهي الصدمة : هتنزل انت تقضيلنا طلباتنا وانت صايم ؟ طبعا افتكرت الحر والزحمة قلتلهم انتوا صح

انا متأكد ان 99.9% من بيوت مصر نفس الموضوع كده

**mostafashokry** · 10-08-2010 12:01 PM

المشاركة الأصلية كتبت بواسطة aymanmaly

يا جماعة لازم نقدر عادتنا و تقليدنا و نحترمها
انا متزوج و مسئول عن اسرة
فى العادى الناس بتجيلى كزيارة فى المناسبات
لاكن فى رمضان انت يأما عازم يا معزوم و الفطار لوحدك مع اسرتك نادر الحدوث و بالتالى الاستهلاك بيزيد جدا فى رمضان ( واظن ان دى حاجة كويسة لصلة الرحم )
واظن كمان ان الناس خايفة لحسن السلع تغلا فبيلحقوا يحوشوا بالسعر القديم الى هو ساسا غالى
و الخوف من ان الحاجات تخلص فانتم عارفين ان البلد داخلة على مشكلة قمح بعد وقف روسيا التصدير
بجانب ان يوم رمضان قصير تصحى الصبح تروح شغاك ترجع تنام شوية تفطر تصلى التراويح و بعد كدة ترجع تعبان من مجهود الصيام والشغل و الصلاة تريح شوية وتنام علشان الشغل تانى يوم يعنى هايبقى صعب تنزل السوبر ماركت
وبعد كدة فية ناس كثير مش لاقية تاكل فى الايام العادية و بينتظروا شهر الخير و اعمال الخير علشان يعرفوا يكلوا حاجة كويسة
و كل عام و انتم بخير

صلة الرحم فى الشهورو طبعاً شئ جميل تتلم كل الأسرة
و لكن معظم الناس بتقضى شهر رمضان أما عازم أو معزوم وطبعا اما يبقى معزوم مش هيفطر و يمشىو لو عازم مش ممكن ياعة آذان الغشاء يسيب ضيوفة و ينزل ,و كده يبقى ضيع الصلوات فى جماعة و كمان يلحق ركعتين من صلاة التراويح بالعافيه و طبعاً هيروح ينام عشان ما كنش واخد راحته فى العزومة و بكده يبقى ضيع صلاه التهجد ,

**SeiffoZ** · 10-08-2010 12:09 PM

انا ليا رأى تانى ...

أنا شايف إن الموضوع ده الإعتراض لمجرد الإعتراض ...

ممكن صاحب الموضوع يفهمنى تانى هو مضايق ليه ؟؟؟ أصل انا مش شايف سبب يخليك تضايق

**MMamdouh** · 10-08-2010 12:25 PM

المشاركة الأصلية كتبت بواسطة SeiffoZ

ممكن صاحب الموضوع يفهمنى تانى هو مضايق ليه ؟؟؟ أصل انا مش شايف سبب يخليك تضايق

رمضان = شهر الصيام

الصيام = الامتناع عن الاكل و الشرب من الفجر الى المغرب

ازاى يبقى شهر الناس بتاكل فيه اقل من الطبيعى و يبقى الطلب على امواد الغذائية مضاعف بالشكل دة؟؟؟؟؟

MMamdouh