اقتباس المشاركة الأصلية كتبت بواسطة lordfear مشاهدة المشاركة

السؤال

اجيب رمل منين + اغيرو كل اد اية + تاكل اية و ميكنش مكلف عشان اعودها علية + التطعيمات دى لازم عند دكتور ولا ممكن محل قطط و كلاب (اسمع انة ممكن) + اجيب ذكر ولا انثى

تعبتك معايا بس الواحد مصدق
لا شكر ولا حاجه - انت الى ذوق جدا

انا كنت حاطط رمل عادى - بتاع المبانى
كل أد ايه؟ حسب الكميه - أو لما يتبل - لو مثلاً كميه حوالى نص صفيحة جبنه يبقى تقريباً كل اسبوع
فى وقت كان عندى قطه انثى وولدت 6 قطط :) - فأكلهم كان محتاج ميزانيه لوحده لو اتعودوا على السمك
الصغيرين بعد ما يخلصوا رضاعه - ولحد حوالى شهرين كنت باكلهم عيش مع زبادى أو لبن
وبعد كدا اكل من البيت عادى (افت لهم عيش مع طبيخ "ملوخية - باميه - فاصوليه - ...." مع قطع لحمه مستويه بسيطه أو دهن ملبس مستوى خفيف "انا مش بحب الدهن فكنت باديه للقطط" - ومش كل مره)
كان عندى قط بلدى بيموت فى الفاصوليا الناشفه مطبوخه طبعاً - مش عارف ليه؟ - من غير لحمه او دهن او اى حاجه - ودا كان بلدى وكان حجمه كبير ووزنه حوالى 5.5 الى 6 كيلو
القطط بتحب خالص الشامى "ملوق أو مشوى" - دى برضوا حاجه مش فاهمه ليه؟
القطط بتحب البيض واللبن واللحوم - ووجبتها المفضله الاسماك بكل انواعها
اى أكل انت بتخلطه مع العيش - ولو ولفته من صغره على اكل القطط الى فى المحلات أو اللحوم بس او التونه والسمك بس - هيقرفك ومش هياكل غيرهم
اكتر قط كان مكلف فى أكله الشيرازى
انا عمرى ما حسيت ان القط عمل عبئ مادى فى اكله - هو بياكل من اكل البيت


القط بيحس وبيزعل - مره كان عندنا قط - وبعدين كان اخويا منيمه معاه والباب مقفول - وعملها فى الاوضه تحت السرير
فأخويا ضربه - وهو كان يحب اخويا جداً ويحب ينام عند رجليه كل يوم - فالقط زعل وطفش 15 يوم
وبعدين رجع خاسس خالص وطبعا مش نضيف وعاوز يستحمى - وكان بينونو بصوت عالى - بيعط - وراح نونو عند اوضة اخويا ، اخويا فتحله ولما لقيه مش نضيف مرضيش يدخلوا ، القط نونو بصوت عالى وعيط ، وبعدين طفش ومرجعش تانى خالص ، مع انه كان عندنا 6 سنين - ومعروف ان القطط بتربط بالمكان الى اتربط بيه - ولو اتنقل لمكان تانى بيكون منزعج جداً - عكس الكلاب بترتبط بصاحبها مش بالمكان

التطعيمات: فى نفس الشارع الى ساكن فيه ن يوجد صيدليه بيطريه - فيها دكتور بيطرى - بأودى القطط عنده

ذكر ام أنثى : دى ترجع لك ، انا بحب لعب القطط خالص - عشان كدا بحب الذكر اكثر من الانثى
وعلى فكره اكثر وقت تلعب قيه القطط وهى صغيره (أول سنه) بعد كدا بيصاب بالخمول
الذكر بيكون انشط وممكن يلعب على كبر - بس على خفيف - وبيكون حجمه اكبر - انا بحب القطط الكبيره
الانثى هاديه عن الذكر غالباً - فالموضوع يرجع لك.
وبعدين القطط فيها الغبى والذكى أنت وحظك بقى
بس القط الذكى بيكون ممتع جدا
كان عندى قط لما العب معاه كان بيلعب من غير ما يخرج اظافره - وممكن كنت العب معاه بالساعه والاتنين قبل ما انام
وبخاصه لما تلاعبه بحاجه بتتحرك او تقلبه على ظهره على السرير وتلعب بايدك فى بطنه (ذى ما تكون بتزغزغ طفل صغير) - بس دا للقطط الصغيره ، عشان لما بيكبر ممكن يتضايق من حركة الزغزغه دة ويتغابى عليك
وكان عندى قط نانى - اى لعب معاه بالدم على طول - لانه كان بيحب يلعب باظافره البيه - هههههههه
بس لما تقص له اظافره بيبقى الخوف اقل

المهم ابعد عن القط الشرس (النافور) - لان دا هيكرهك فى القطط كلها
والقط النافور الى لو ضايقتة شويا أو ازعجته بصوت عالى (خضيته) أو حد غريب حاول يمسكه فى البيت - تلقيه فى وضع هجوم وتأهب ويعمل صوب بحيح كدا ببقه ذى ما يكون ثعبان بيبخ