الموضوع: فلذات الأكباد........ وتنشيف الدماغ

المشاركة الأصلية كتبت بواسطة devilishtigers

انا فاكر وانا صغير انهم كانوا بيربطوني بالحبل بتاع السبت من شقاوتي
مرة اطلع فوق سور البلكونة واعمل نفسي راكب حصان ومرة ابوظ الفيديو ومرة اتنطط على الكراسي من فوق ومرة اعد ازق في الدولاب لغاية الضرفة ما تتخلع واحطها على الارج واعمل زحليقة دا غير اللي كان بيحصل في الحضانة.
انا مش متجوز واكيد مش مخلف بس انا لغاية دلوقتي مربي اتنين صبيان من العيلة كان لما بيعمل حاجة مامته تقوله هقول لمحمود يفضل يعيط ومعلش ومش هعمل كدا تاني. رغم اني عمري ما ضربته ولا زعقت فيه (ساعات بتكلم معاه بحدة بس من غير زعيق وساعات بالنظرات) بس وصلت معاه كدا بسبب اني خليتوه يحبني جدا جدا وعلى طول اخليه يتكلم معايا واعد اتكلم معاه اكنوا كبير ويخاف انو يعمل حاجة تزعلني ولو حد قالي انو عمل حاجة قدامي اندهلوا واجيبوا قدامي وقبل ما اتكلم يكون عيط علشان ما ازعلش منه.
بجد الاطفال في السن دا بيفهموا جدا الكلام اللي بيتقالهم بس المهم اواي يوصلهم.
وبلاش انو لما يشاور على حاجة يلاقيها او انو لما يخش مكان يشد اي حاجة. مرة كدا ومرة كدا لو بيصعب عليك معلش بس انت مش بتبخل عليه او مش عايز تجبله لأ انت بتربيه وبتعوده.
وربنا يباركلكم في عيالكم وتشوفوهم احسن ناس
وربنا معاكم في اللي بيعملوه انتم السابقون ونحن اللاحقون.

انا وانا صغير كنت اشقا منك في مره لبست روب ماما زي فرافيرو (كنت بحبه جدا) وفتحت الشباك وقلت بصوت عالي انا جااااااااااااااااااااي وهوب لسه بنط اختي لحقتني من رجلي

المشاركة الأصلية كتبت بواسطة devilishtigers

انا فاكر وانا صغير انهم كانوا بيربطوني بالحبل بتاع السبت من شقاوتي
مرة اطلع فوق سور البلكونة واعمل نفسي راكب حصان ومرة ابوظ الفيديو ومرة اتنطط على الكراسي من فوق ومرة اعد ازق في الدولاب لغاية الضرفة ما تتخلع واحطها على الارج واعمل زحليقة دا غير اللي كان بيحصل في الحضانة.

انت فكرتني بنفسي، بعد ما كنت هاتوه منهم كذا مرة بقوا يربطوني بحبل في رجلي لما نخرج. في مرة كانوا بيصلوا في الحرم سبتهم و قعدوا يدوروا عليا نص ساعة لحد ما فقدوا الأمل و الآخر لقيوني بعيد بالعب بأكواب مياه زمزم (أملاها و أدلقها و هكذا)
موضوع الفيديو ده عادي كنت عامله حصالة تلاقي جواه فلوس و معالق و شوك إلخ...
ساعات أصحى الصبح أفتح باب الثلاجة و أكسر البيض كله على الأرض
و طلع عليا كذا اسم أشهرهم "فساد البر و البحر" و "صاروخ" و ده مش من فراغ
صدقت كده لما شفت نفسي في صور و فيديو في أفراح قديمة بتاعة قرايبنا تلاقي حاجة بتجري كده في وسط الفرح ما تعرفش ده بيعمل إيه و رايح فين
كنت لما أنهمك في مشروع فساد و حد ينادي عليا من بعيد "يا أحماااااد" يكون الرد مني " لأ " يعرفوا أني باعمل/عملت مصيبة

و أفتكر أني كنت باتعرض للضغط النفسي كأسلوب عقاب و ساعات باتضرب عادي جداً

الغريب أني لما أشوف طفل بيعمل عشر اللي كنت باعمله من شقاوة و عند ماباعرفش أستحمل و أعرف قد إيه أهلي تعبوا في تربيتي و مش عارف هاربي أطفال ازاي لما أتجوز