الموضوع: محتاجة نصيحتكو ضروري و بسرعة ....بيطفشوني من الشغل اعمل ايه ؟؟

ثالثا اذا كانت الاصابه في مواعيد قبل موعد العمل بساعه او بعد مواعيد انتهاء العمل بساعه من حقك قانونا مطالبة الشركه بتعويض اصابة عمل لانه من المعروف قانونا في قانون العاملين انه في حالة اصابة الموظف قبل بدء مواعيد العمل بساعه او بعد مواعيد العمل بساعه فانها تحتسب اصابة عمل .

كلام حضرتك صح بس بشرط انه مايكونش فى انحراف على طريق العمل بشكل يضيع السند القانونى اللى حضرتك قولته
بمعنى تانى انه بجانب العامل الزمنى اللى هو الساعه قبل وبعد مواعيد العمل فى عنصر مكانى اللى هو وقوع الاصابه فى طريق العمل المألوف او اذا حدث انحراف عنه يكون فى حدود المعقول وبسبب قهرى ومايزيدش السير فى هذا الطريق عن ساعه بأى حال من الاحوال

المشاركة الأصلية كتبت بواسطة largeman

حضراتكوا هقول لكم الشغل بيجي ازاي مع انها مش حاجة فيها فلسفة
انا اول ما اتخرجت من الكلية من 9 سنين كنت بقعد علي النت بالساعات و ابتديت ابعت الـ cv بتاعي لكمية شركات و بنوك لا حصر لها و طبعا في خلال التحاقي في الكلية اخدت كمية كورسات انجليزي و كمبيوتر لاحصر لها من الجامعة الامريكية و شركة ibm بس طبعا هي صفت خلاص من مصر بعد الكورسات بفترة و بعدين بكل سهولة لاقيت اعلان في الجرنال ان شركة سياحة عايزة محاسبين و فعلا روحت و قبلت فورا و في نفس الوقت كان معايا اكتر من 55 واحد بيقدم في نفس الوظيفة لكن الحمدلله قبلت في الوظيفة
بعد كده سبت الشغل لأن جالي شغل في الحكومة في مكان متميز جدا فاشتغلت فورا
بعد شغلي في الحكومة بشهر بالظبط جالي شغل في شركة غبور في ابورواش و جالي شغل تاني في شركة الشرق للتامين طبعا مصر للتامين اشترت الشركة ديه من حوالي سنة و بعد كده جالي شغل تالت من شركة تحلية مياه مصرية امريكية
يبقي كده في شغل ولا مفيش
الشغل يا جماعة موجود لكن المهم انك تكون عندك الامكانيات المناسبة لشغل وظيفة الاحلام
دور و اكيد هتلاقي شغل زي ما كان اول شغلي عن طريق اعلان صغير جدا جدا في جريدة الاهرام

ياسيدي الفاضل كل الكلام دة عارفينة و عارفين ازاي تنشر السي في في مواقع توظيف

انما حضرتك بتتكلم على خريج جديد بيدور على شغل من 9 سنين

اقرا ردي الاولاني تاني

انا باقول :" اليومين دول" مافيش شغل

و الازمة الاقتصادية في العالم و احنا عندنا عدم استقرار داخلي
و نسبة البطالة ارتفعت 34% السنة الماضية

و 17% فقدوا شغلهم

انا باتكلم دلوقتي

مش من 9 سنين

من سنتين كان الشغل ماتوفر و اسهل من اليوم

و خريج جديد عاوز اي شغلانة ب مرتب قليل غير حد متخرج من سنين و معاه خبرة و مش حايقبل شغلانة بالفين مثلا

و النهاردة سوق العمل غير من 9 سنين خالص

انا ليا اصدقاء فقدوا شغلهم من سنة لسنة و نص بسبب شركات صفت و قفلت و خففت عمالة و انهت عقود و بقالهم اكتر من سنة بيدوروا على شغل مش لاقيين
وناس خبرة و لغات و كمبيوتر و كل شوية ينزلوا في مستوى الوظيفة لاقل و مش لاقيين

البلد اليومين دول مافيهاش شركات بتعين بسهولة (مش بلدنا بس دة العالم كلة و راجع التقارير الاقتصادية عالنت عن البطالة في امريكا و الدول العربية و منهم السعودية و اوروبا "ياراجل دة اليونان و اسبانيا و ايطاليا و المجر حايفلسوا"

و العالم كلة فية ازمة اقتصادية طاحنة من 2008 لليوم

و مش كون واحد لقى شغل يبقى اي حد حايلاقي شغل دي في الاخر ارزاق و ارادة ربنا
بس برضة مش نشجع حد انة يرمي استقالتة و يفقد وظيفتة و احنا شايفين البلد و الازمة و البطالة في الدنيا كلها عاملة ازاي, و عصفور في اليد لغاية ماتلاقي حاجة تانية


و تاني النهاردة غير من 9 سنين و خريج جديد غير اللي عندة خبرة و بيدور على مرتب كبير و وظيفة تناسب امكانياتة و خبراتة و مش حايقبل باقل منها

لو انتى اشتغلتى فى الشحن وعندك خبره فى الsales
ابعتيلى السى فى بتاعك على الايميل وربنا يقدرنى واساعد
m_elkholy_83@hotmail.com