كلاكيت للمرة الالف: قتيل على الدائرى
بجد الموضوع بقى زيادة اوى عن اللزوم... فى ظرف 4 ايام صادفت اتنين ميتين على الدائرى فى حوادث
الاول يوم الثلاثاء اللى فات و انا مروح من الدائرى (هربا من زحام وسط البلد) كان فيه قتيل حوالى الساعة 5:45 قبل مطلع محور صفت اللبن... عربية جين 2 خبطت واحد و الراجل توفى... طيب اللى اتخبط دة كان بيهبب ايه على الدائرى؟... و اللى خبطة ذنبة ايه يقضى اول يوم فى رمضان فى اقسام و نيابة و تحقيقات؟؟؟... الراجل المتوفى كان فى تانى حارة من اليمين... يعتى فاضلة مترين و يبقى فى نص الدائرى تماما
الغريب فى الموضوع ان حوالين مكان الحادث ناس كتير واقفة و محتلة اول حارة على اليمين بالكامل و دول مش بيبصوا على الحادث... دول بيبصوا على الطريق كما لو كانوا منتظرين اوتوبيس او مكروباص... هنا ظهر السبب الحقيقى للحوادث دى و هو ان الناس بتستعمل الطريق الدائرى كما لو كان شارع الازهر... مكروباصات تنزل ناس و تركب ناس و ناس عدى من يمين الدائرى الى شمالة و العكس... و احنا اللى فى الاخر ندفع تمن تخلف الناس دى و اهمالها
انا كنت حكتب عن الموضوع فى يوميها بس كبرت دماغى و قلت ملهاش لزمة انكد على الناس... لحد ما كنت مروح من الرحاب ابارح و قابلت القتيل التانى
فى المنطقة اللى امام برج سما (كما لو كانت المنطقة دى موعودة بالمصايب) انا كنت ماشى فى اتجاة المعادى و الطريق وقف بشكل غريب مع ان الساعة 12:15 صباحا... بعد ما مشى الطريق بشوية لقيت الشرطة قافلة الحارتين الشمال بتوعنا و فيه قتيل ممدد على الارض... الغريب ان تقريبا الحادث حصل على الجانب التانى من الطريق لان الناحية التانية كان فيه هرج و مرج و شرطة و ناس ملمومة و الطريق واقف تماما... اعتقد دة واحد (او اكتر) كان بيعدى الناحية التانية وواحد شالة و من شدة الصدمة وقع على الاتجاة المعاكس
تشاء الصدف ان مكان الحادث على بعد امتار من كوبرى عبور مشاه بيتعمل فى الحتة دى كما لو كان اللى حدد موقع الكوبرى عارف ان المنطقة دى مشئومة... برضة بعد مكان الحادث كان فيه بهايم بتعدى الطريق الدائرى بالعرض الساعة 12:15 فى عز الضلمة... كما لو كان الناس اللى ماتت دى ماتت لسبب اخر غير انهم كانوا بيعدوا الطريق الدائرى
الحادثتين دول يعتبروا التالتة و الرابعة اللى كان فيها ناس ماتت قدام عينى خلال فترة استعمال الطريق الدائرى... الاولى كانت من 4 سنين تقريبا و كانت عربية نص نقل خبطت ولد شكلة 15 او 17 سنة فوق الكوبرى الكبير اللى بيقطع النيل على الطريق الدائرى... محدش يسال كان الواد بيعمل ايه على الكوبرى اللى فى نص النيل على الدائرى لانى من 4 سنوات بدور على اجابة السؤال دة و مش عارف الصراحة... الحادث كان فى اول حارة على الشمال يعنى الواد كان فى نص الكوربى تماما
الحادث التانى كان من حوالى سنة و كان فى اول حارة شمال برضة... بس المرة دى معقد لاصحاب السيارات اللى كان حظها سىء و شاركت فى الحادث... واحد بجلابية خبطتة سيراتو جديدة نوفى بدون لوحات و طيرتة فسقط اما عربية نص نقل و نزل تحت العجل... العربية مادستوش بس هو لازق فى العربية... هنا اعتقد العربية اللى من غير نمر حتخش فى مشاكل حتى لو موقفها سليم بالنسبة للحادث و بتاع النقل جت رجلة فى الحوار بدون ذنب
ربنا يكفينا شر الطريق و شر البهايم
MMamdouh